វ៉ាស៊ីនតោន៖ មន្រ្តីក្រសួងការបរទេស សហរដ្ឋអាមេរិកបានឲ្យដឹង នៅថ្ងៃព្រហស្បតិ៍នេះថា កងកម្លាំងសន្តិសុខអ៊ីរ៉ង់ ប្រហែលជាបានសម្លាប់ពលរដ្ឋជាង ១.០០០នាក់ ចាប់តាំងពីការតវ៉ាប្រឆាំង នឹងរដ្ឋាភិបាល បានផ្ទុះឡើង នៅពាក់កណ្តាលខែវិច្ឆិកា ដោយសារការដំឡើងថ្លៃសាំងភ្លាមៗ មិនអាចទទួលយកបាន ដោយហៅថា ជាវិបត្ដិនយោបាយមិនធ្លាប់មានរយៈពេល ៤០ឆ្នាំរបស់ខ្លួន។
អ្នកតំណាងពិសេស សម្រាប់អ៊ីរ៉ង់លោក Brian Hook បានឲ្យដឹងនៅក្នុង សន្និសីទសារព័ត៌មានមួយថា “ឥឡូវនេះគឺជាពេលវេលា សម្រាប់ប្រជាជាតិទាំងអស់ ដើម្បីឈរជាមួយប្រជាជនអ៊ីរ៉ង់ ដោយផ្តាច់ការទូត និងការដាក់ទណ្ឌកម្មលើមន្ត្រីទាំងនោះ ដែលទទួលខុសត្រូវចំពោះការ សម្លាប់ជនជាតិអ៊ីរ៉ង់ ដែលគ្មានកំហុស” ។
លោកបានលើកឡើងថា រដ្ឋាភិបាលសហរដ្ឋអាមេរិក មិនអាចមានភាពប្រាកដប្រជា អំពីចំនួនអ្នកស្លាប់នោះទេពីព្រោះ “របបនេះរារាំងព័ត៌មាន” ប៉ុន្តែលោកបាននិយាយថា អ្នកដែលត្រូវគេធ្វើឃាតទំនងជា នឹងរាប់បញ្ចូលក្មេងយ៉ាងហោចណាស់ រាប់សិបនាក់ក្នុងនោះមានក្មេងអាយុពី ១៣ ទៅ ១៤ឆ្នាំ ៕
ដោយ ឈូក បូរ៉ា
