ព័ត៌មានជាតិ

អគារចំនួន២ នៅក្រុងព្រះសីហនុ នឹងត្រូវរុះរើ ក្រោយពិនិត្យឃើញមានភាព ស្រុត ប្រេះស្រាំ និងទ្រេត

ភ្នំពេញ៖ ម្ចាស់សំណង់អគារចំនួន២ នៅក្រុងព្រះសីហនុ បានឯកភាពតាមការស្នើសុំរុះរើ របស់រដ្ឋបាលខេត្តព្រះសីហនុ ក្រោយមន្រ្តីជំនាញពិនិត្យឃើញមានភាព ស្រុត ប្រេះស្រាំ និងទ្រេត ។នេះបើយោងតាម បណ្ដាញទំនាក់ទំនង សង្គមហ្វេសប៊ុក រដ្ឋបាលខេត្តព្រះសីហនុ។

នៅក្នុងកិច្ចប្រជុំ ជាមួយម្ចាស់សំណង់ចំនួន០២ ដោយមានការចូលរួមពីម្ចាស់អគារ និងម្ចាស់ដី ថ្ងៃទី១២ ខែសីហា ឆ្នាំ២០១៩ លោក គួច ចំរើន អភិបាលខេត្តព្រះសីហនុ បានមានប្រសាសន៍ថា តាមមន្ត្រីបច្ចេកទេស នៃក្រសួងដែនដីនគរូបនីយកម្ម និងសំណង់បានសិក្សា វាយតម្លៃផលប៉ះពាល់យ៉ាងធ្ងន់ធ្ងរ មិនអាចអោយដំណើរការសាង សង់ និងដាក់អោយប្រើប្រាស់ ជាផ្លូវការនូវសំណង់ អគារពីរខាងលើ និងបានសំណូមពរ អោយម្ចាស់អគារទាំងពីរខាងលើអនុវត្ត តាម ការជូនដំណឹងរបស់មន្ត្រីជំនាញ ព្រោះវាអាចបង្កហានិភ័យដល់ប្រជា ពលរដ្ឋ ក៏ដូចជាបុគ្គលិកបំរើការងារនៅក្នុងអគារផងដែរ ។

ក្រោយពីបានស្តាប់ការបកស្រាយ ពីលោកអភិបាលខេត្តរួចមក លោក ស៊ូ ហ្វូពីង ZHU FUBING ម្ចាស់សំណង់អគារ មានទីតាំង ស្ថិតក្នុងភូមិ៤ សង្កាត់៤ ក្រុងព្រះសីហនុ (សំណង់ផ្នែកអគារ ខាងឆ្វេងអគារស្រុតប្រវែង ១១៧mm និងផ្នែកខាងស្តាំស្រុតប្រវែង ៩០mm និងប្រេះស្រាំ) ថ្មីៗនេះរដ្ឋបាលខេត្ត បានចេញ រុះរើសំណង់ ជាបន្ទាន់ ។ ស៊ូ ហ្វូពីង ZHU FUBING ម្ចាស់សំណង់យល់ព្រមរុះរើ តាមការណែនាំរបស់រដ្ឋបាលខេត្ត ក៏ប៉ុន្តែស្នើរសុំរដ្ឋបាលខេត្តជួយ សិក្សាបច្ចេកទេស និងលិខិតអនុញ្ញាតសាងសង់វិញ និងសុំពន្យា ពេលកិច្ចសន្យា តម្លៃនៃការជួលដី ។ ដោយឡែកសំណង់លោក MA SHUNDI ស្ថិតនៅភូមិ៣ សង្កាត់លេខ២ ក្រុងព្រះសីហនុ សំណង់មានការទ្រេតអគារ រដ្ឋបាលខេត្តបាន ចេញលិខិត ជម្លៀសមនុស្សចេញ និងរុះរើសំណង់ជាបន្ទាន់ ។ ព្រោះសំណង់នេះមន្ត្រីបច្ចេកទេស នៃក្រសួងដែនដី ពិនិត្យឃើញថា សំណង់មានហានិភ័យទ្រេតជាខ្លាំង ត្រូវរុះចេញ ។ ម្ចាស់សំណង់ក៏បានឯកភាព ក៏ប៉ុន្តែស្នើរសុំអោយរដ្ឋបាលខេត្ត ជួយសម្របសម្រួល ជាមួយម្ចាស់ដី តម្លៃជួលក្នុងការរុះរើ និងសុំជួយសម្រួលច្បាប់សាងសង់ ។

កិច្ចប្រជុំ បានឯកភាពតាមសំណើររបស់រដ្ឋបាលខេត្ត ដោយម្ចាស់ សំណង់អគារទាំងពីរខាងលើ បានឯកភាពតាមការស្នើសុំរុះរើ របស់រដ្ឋបាលខេត្តព្រះសីហនុ ហើយម្ចាស់ដីទាំងពីរ ក៏បានឯកភាព បន្ថែមកិច្ចសន្យា មិនគិតថ្លៃឈ្នួលរយះពេលរុះរើ សាងសង់ឡើងវិញ តាមការស្នើរសុំរបស់ម្ចាស់សំណង់ ៕

ដោយ បាន ធារ៉ូ

Facebook Comments

To Top