ព័ត៌មានជាតិ

មន្រ្តីកាំកុងត្រូលខេត្តកំពង់ធំ រកឃើញភេសជ្ជៈFanta, ២៤កេស ហួសកាលបរិច្ឆេទ និងប្រហិតសាច់មាន់២គីឡូ ខូចគុណភាព លក់នៅផ្សារតាំងគោក មន្រ្តីជំនាញដកហូតទុកដុតកម្ទេចចោល

កំពង់ធំ ៖ សាខាកាំកុងត្រូលខេត្តកំពង់ធំ នៅថ្ងៃទី២៤ ខែឧសភា ឆ្នាំ២០១៩នេះ បានសហការជាមួយមន្ទីរពាណិជ្ជកម្ម និងគណៈកម្មការផ្សារ បានបន្តចុះពិនិត្យ និងផ្សព្វផ្សាយអំពីគុណភាព សុវត្ថិភាព ម្ហូបអាហារ នៅផ្សារតាំងគោក ភូមិតាំងគោក ឃុំសូយោង ស្រុកបារាយណ៍ ខេត្តកំពង់ធំ រកឃើញទឹកក្រូច និងប្រហិត ខូច គុណភាព ។

មន្រ្តីសាខាកាំកុងត្រូលខេត្តកំពង់ធំ បានថ្លែងថា បន្ទាប់ពីបានពិនិត្យ ដោយប្រើតេស្តឃីត Test Kit ទៅលើម្ហូបអាហារមួយចំនួន ដែលកំពុងដាក់តាំង លក់នៅក្នុងផ្សារតាំងគោក រួចមកជាលទ្ធផល គឺទទួលបានលទ្ធផលល្អ ដោយពុំបានរកឃើញវត្តមានសារធាតុគីមីហាមឃាត់ នៅក្នុងផលិតផលម្ហូបអាហារ ទាំងនោះឡើយ។

ចំពោះការពិនិត្យមើលលើផលិតផលគ្រឿង កំប៉ុង ដប និងផលិតផលវិចខ្ចប់រួច ក្រុមការងារបានរកឃើញផលិតផលមួយចំនួន ហួសកាលបរិច្ឆេទ និងខូចគុណភាព ដូចជា ភេសជ្ជៈ ម៉ាក Fanta ចំណុះ ៣៥០ ml ផលិតនៅប្រទេសកម្ពុជា ចំនួន២៤កេស និង៤ដប ហួសកាលបរិច្ឆេទ និងប្រហិតសាច់មាន់ ក្រុមហ៊ុន CP ចំនួន២គីឡូក្រាម និងទឹកក្រូចម៉ាកកូកាកូឡា រស់ជាតិកាហ្វេ ចំណុះ៣៣០ml ចំនួន៥កំប៉ុង ផលិតផលនៅប្រទេសកម្ពុជា ។ខូចគុណភាព បានធ្វើកំណត់ហេតុដកហូត យកទុកដុតកំទេចចោល ។

ទន្ទឹមនឹងការចុះត្រួតពិនិត្យគុណភាពទំនិញ ក្រុមកាងារក៏បានចែកផ្សាយនូវ រូបភាព Poster និងណែនាំដល់ អាជីវករ អ្នកលក់ដូរ និងអ្នកប្រើប្រាស់ ឲ្យបានយល់ដឹងអំពីរបៀប នៃការដាក់តាំងលក់ផលិតផល ចំណីអាហារឲ្យនៅដាច់ពីគ្នាពីថ្នាំសម្លាប់សត្វល្អិត និងកសិកម្ម និងរបៀប នៃការជ្រើសរើសផលិតផលម្ហូប អាហារមាន សុវត្ថិភាព ដល់ការបរិភោគជាដើម។

មន្ត្រីកាំកុងត្រូល ក៏បានអំពាវនាវដល់អាជីវករ អ្នកចែកចាយ លក់ដុំ លក់រាយ អ្នកផលិត នាំចូលចែកចាយ ត្រូវតែមានប្រភពច្បាស់លាស់ សិនមុននឹងទទួលលក់ ហើយបញ្ជប់ការលាយបន្ថែមនូវសារធាតុគីមីហាត់ទៅលើ ផលិតផលម្ហូបអាហារដែលធ្វើឲ្យប៉ះពាល់ ដល់សុខភាពអ្នកប្រើប្រាស់៕

To Top