Dap News...Admin

ប៊ីស្កេក៖ យន្តហោះមួយគ្រឿងប្រភេទ AN-២ បានធ្លាក់កាលពីថ្ងៃសុក្រ ទី២៤ ខែឧសភា នៅភាគខាងត្បូង ប្រទេស កៀហ្ស៊ីស៊ីស្ថាន បណ្តាលឲ្យមនុស្សទំាងអស់ នៅលើយន្តហោះនោះ ចំនួនបីនាក់ស្លាប់។

ទីភ្នាក់ងារព័ត៌មានចិន ស៊ិនហួ ចេញផ្សាយថ្ងៃសៅរ៍ ទី២៥ ខែឧសភា ឆ្នាំ២០១៣ ដោយផ្អែកតាម ការលើកឡើងរបស់ក្រសួង ស្ថានការណ៍អាសន្នរបស់ ប្រទេស កៀហ្ស៊ីស៊ីស្ថានថា ឧប្បតិហេតុធ្លាក់នេះ បានកើតឡើងកាលពីវេលាម៉ោង ១០ព្រឹក ម៉ោងក្នុងតំបន់ នៅពេលដែលយន្តហោះ មួយគ្រឿងនោះ កំពុងដំណើរការបាញ់ថ្នាំគីមី សម្លាប់សត្វកណ្តូប នៅស្រុក អាក់ស៊ី តំបន់ ចាឡាល់ អាបេដ។

ជនរងគ្រោះចំនួនបីនាក់ ក្នុងនោះមាន អាកាសយានិកហ្វឹកហាត់ម្នាក់ មេបញ្ជាការម្នាក់ និងអ្នកជំនាញខាងសារធាតុគីមី ការការពាររុក្ខជាតិម្នាក់។ ក្រោយកើតហេតុ សាកសពត្រូវបានគេរកឃើញ នៅកន្លែងកើតហេតុផងដែរ។

ពាក់ព័ន្ធនឹងការ ឧប្បតិហេតុធ្លាក់នេះដែរ ការិយាល័យព្រះរាជអាជ្ញារ កៀហ្ស៊ីស៊ីស្ថាន បានបើកការស៊ើបអង្កេត ឧក្រិដ្ឋកម្មមួយ ចំពោះការធ្លាក់នេះហើយ៕

អ៊ីស្តង់ប៊ុល៖ ក្រុមប្រឆំាងធំ នៅក្នុងប្រទេសស៊ីរី បាននិយាយកាលពីថ្ងៃសុក្រ ទី២៤ ខែឧសភាថា ពួកគេរង់ចំាសម្រាប់កាយវិការ ដែលមានឆន្ទៈ ពីរដ្ឋបាលស៊ីរី ខណៈពួកគេពិភាក្សានៅទីក្រុង អ៊ីស្តង់ប៊ុល ប្រទេស តួកគី អំពីសន្និសីទ សារព័ត៌មានអន្តរជាតិ នៅទីកុ្រង សឺណែវ នៅពេលខាងមុខនេះ។

ទីភ្នាក់ងារព័ត៌មានចិន ស៊ិនហួ ចេញផ្សាយថ្ងៃសៅរ៍ ទី២៥ ខែឧសភា ដោយស្រង់សម្តីអ្នកនាំពាក្យ ក្រុមបង្រួបបង្រួមជាតិស៊ីរី (SNC) លោក ខាលីដ សាលី នៅក្នុងសន្និសីទសារព័ត៌មាន បន្ទាប់ពីកិច្ចប្រជុំក្រុមប្រឹក្សា សម្រាប់ថ្ងៃទីពីរថា «យើងចង់បញ្ឈប់ការបង្ហូរឈាម ដូច្នេះវាមានសារៈសំខាន់ណាស់ សម្រាប់កាយវិការដែលមានឆន្ទៈ ពីភាគីទំាងពីរ»។ លោកបន្តថា «យើងចង់ធ្វើឲ្យមានភាពប្រាកដប្រជាថា ប្រសិនបើយើងចូលរួមកិច្ចចរចានេះ ការបង្ហូរឈាមនៅក្នុងប្រទេសស៊ីរី នឹងបញ្ឈប់»។

ជាមួយគ្នានោះដែរ លោក សាលី បានបន្ថែមថា ពួកគេចង់បានការបំភ្លឺបន្ថែមទៀត ព័ត៌មានលម្អិត និងសារៈសំខាន់ភាគច្រើន ការអញ្ជើញជាផ្លូវការ ពីអង្គការសហប្រជាជាតិ មុនពេលដែលពួកគេចូលរួម ក្នុងការសម្រេចចិត្តចុងក្រោយ ថាតើពួកគេនឹងត្រូវចូលរួម ជាលើកទីពីរទៀត សម្រាប់កិច្ចពិភាក្សានៅទីក្រុង សឺណែវ ឬក៏អត់។

ទន្ទឹមនឹងនោះដែរ លោកក៏បានចោទប្រកាន់ កងកម្លំាងរដ្ឋាភិបាលស៊ីរីថា បានប្រើប្រាស់អាវុធគីមី ក្នុងទីក្រុង អាដ្រា នៅមុនការពិភាក្សានៅទីក្រុង សឺណែវ ដោយលោកនិយាយថា «ខ្ញុំត្រូវតែរំឮកថារបបនេះ កាលពីម្សិលមិញ បានប្រើប្រាស់អាវុធគីមី នៅក្នុងទីក្រុង អាដ្រា បណ្តាលកងកម្លំាង របស់យើងចំនួន ០៥នាក់ស្លាប់ និង៥០នាក់ទៀតរងរបួស»៕

អ្នកនាំពាក្យ ក្រុមបង្រួបបង្រួមជាតិស៊ីរី (SNC) លោក ខាលីដ សាលី

មីនស្កិ៍៖ មន្រ្តីបេឡារុសមួយរូប បាននិយាយកាលពីថ្ងៃសុក្រថា ប្រទេស រុស្ស៊ី និងបេឡារុស បានព្រមព្រៀងគ្នា ក្នុងការប្រើប្រាស់យន្តហោះ គ្មានមនុស្សបើក ដើម្បីយាមល្បាតនៅតាម ព្រំដែនប្រទេសទំាងពីរ។

ទីភ្នាក់ងារព័ត៌មានចិន ស៊ិនហួ ចេញផ្សាយកាលពីរាត្រីថ្ងៃសុក្រ ទី២៤ ខែឧសភាថា ប្រទេស បេឡារុស បានចរចាជាមួយប្រទេសជិតខាង និងសា្ថប័នអន្តរជាតិមួយចំនួន ដើម្បីធ្វើឲ្យមានភាពប្រាកដប្រជា ពីបញ្ហាសន្តិសុខនៅតាមព្រំដែន ក្នុងតំបន់ ចាប់តំាងពីពាក់កណ្តាលទីពីរឆ្នាំ២០១២។ នេះបើតាមលោក អាឡិចសាន់ឌ័រ ប៊យយេកកូ ប្រធានគណៈកម្មាធិការ ព្រំដែនរដ្ឋរបស់បេឡារុស បា្រប់អ្នកសារព័ត៌មានក្នុងស្រុក។

លោក ប៊យយេកកូ និយាយថា បេឡារុស កំពុងអនុវត្ដគម្រោងសហប្រតិបត្តិការ ជាច្រើននៅក្នុងតំបន់ខុសៗគ្នា ជាមួយនឹងប្រទេស អ៊ុយក្រែននិង ឡេតូនី ដើម្បីលើកកម្ពស់សន្ដិសុខ នៅតាមបណ្តោយព្រំដែនរួមរបស់ពួកគេ៕

សាន់ហ្វ្រាន់ស៊ីសស្កូ៖ អាជ្ញាធរអាមេរិកបាននិយាយថា ស្ពានហាយវ៉េ ដែលសំខាន់មួយ ស្ថិតនៅរដ្ឋវ៉ាស៊ីនតោន សហរដ្ឋអាមេរិក បានបាក់កាលពីល្ងាច ថ្ងៃព្រហស្បតិ៍ បណ្តាលឲ្យធា្លក់រថយន្ត និងមនុស្សមួយចំនួន ចូលទៅក្នុងទន្លេ ដែលនៅខាងក្រោមនោះ។

ទីភ្នាក់ងារព័ត៌មានចិន ស៊ិនហួ ចេញផ្សាយនៅថ្ងៃសុក្រ ទី២៤ ខែឧសភា បានឲ្យដឹងថា មិនមានសេចក្តីរាយការណ៍ ពីចំនួនអ្នកស្លាប់នោះទេ ហើយក្នុងឧប្បតិហេតុបាក់ស្ពាននេះ មនុស្សបីនាក់ ត្រូវបានគេជួយសង្គ្រោះ និងបញ្ជូនទៅកាន់មន្ទីរពេទ្យ ខណៈក្រុមអ្នកមុជទឹក និងក្រុមជួយសង្គ្រោះផ្សេងទៀត បានបន្តការស្រាវជ្រាវ អ្នករងគ្រោះរហូតដល់យប់ជ្រៅ។

ស្ពានដែលបាក់នេះ ជាស្ពានដែលភ្ជាប់រវាងរដ្ឋ ស៊ីដថល សហរដ្ឋអាមេរិក ទៅកាន់ទីក្រុង វ៉ាន់ខូវើ ប្រទេស កាណាដា ហើយត្រូវបានសាងសង់ឡើង កាលពីឆ្នាំ១៩៥៥។ ទាក់ទិននឹងការបាក់នេះដែរ ភ្លាមៗនៅមិនទាន់មាន សេចក្តីរាយការណ៍ អំពីមូលហេតុដែលបណ្តាល ឲ្យបាក់នៅឡើយទេ។ ការបាក់នេះ បានកើតឡើងនៅពេល ចាប់ផ្តើមសម្រាប់ពេលវេលាមួយ ដ៏រវល់នៃថ្ងៃឈប់សម្រាក ចុងសប្តាហ៍ប្រចាំឆ្នាំរបស់អាមេរិក៕

ការ៉ាកាស៖ ប្រភពពីមន្រ្តីវ៉េណេស៊ុយអេឡា បានឲ្យដឹងថា ភ្នាក់ងារ ៥នាក់ មកពីកងកម្លំាងប៉ូលីសជាតិ (PNB) នៃប្រទេស វ៉េណេស៊ុយអេឡា និងសមាជិកក្រុមអាកាសយានិក ឧទ្ធម្ភាគចក្រ បានស្លាប់កាលពីថ្ងៃព្រហស្បតិ៍ នៅពេលដែលឧទ្ធម្ភាគចក្រ មួយគ្រឿងនោះ បានធ្លាក់នៅភាគខាងលិច ទីក្រុងការ៉ាកាស។

ទីភ្នាក់ងារព័ត៌មានចិន ស៊ិនហួ ចេញផ្សាយថ្ងៃសុក្រ ទី២៤ ខែឧសភា ឆ្នាំ២០១៣ថា ឧប្បតិហេតុនេះ បានកើតអំឡុងពេលមាន ប្រតិបត្តិការជួយសង្គ្រោះ វិស្វករដែលគេបានចាប់ជម្រិត ចំនួនពីរនាក់។ ប្រធាន PNB លោក ល្វីស ការ៉ាប៊ីន បាននិយាយថា ឧប្បតិហេតុធ្លាក់នេះ បានកើតឡើងកាលពីវេលាម៉ោង ០៧ និង៣០នាទីព្រឹក ម៉ោងក្នុងតំបន់ នៅផ្លូវហាយវ៉េមួយកន្លែង តំបន់ភាគខាងលិចទីក្រុង ការ៉ាកាស។

ពាក់ព័ន្ធនឹងការធ្លាក់នេះដែរ មិនទាន់មានការបញ្ជាក់ ច្បាស់លាស់ភ្លាមៗនោះ នៅឡើយទេ ប៉ុន្តែបើតាមលោក ការ៉ាប៊ីន បានប្រាប់ថា បណ្តាលមកពីលក្ខខណ្ឌ អាកាសធាតុ ខណៈអ្នកខ្លះទៀតបាននិយាយថា ឧទ្ធាម្ភាគចក្របានធ្លាក់ភ្លាមៗ បន្ទាប់ពីទាក់នឹងខ្សែកាប ដែលនៅកម្ពស់ខ្ពស់។

លោក ការ៉ាប៊ីន បន្តថា សមាជិកទំាងអស់នៅលើ ឧទ្ធម្ភាគចក្រនោះ បានស្លាប់ រួមមាន អាកាសយានិក អាកាសយានិកបម្រុង អ្នកបច្ចេកទេសម្នាក់ និងប៉ូលីសពីរនាក់។ លោកបន្ថែមថា ឧទ្ធម្ភាគចក្រនេះ សហការគំាទ្រដោយប៉ូលីស ក្នុងប្រតិបត្តិទៅជួយសង្គ្រោះ វិស្វករពីរនាក់ ដែលត្រូវបានគេចាប់ជម្រិត ពីក្រុមហ៊ុនអគ្គីសនី ខូផូលិក ដែលជាក្រុមហ៊ុមរដ្ឋ វ៉េណេស៊ុយអេឡា៕

អង់ការ៉ា៖ រដ្ឋមន្រ្តីពាណិជ្ជកម្ម និងគយរបស់តួកគីលោក ហាយ៉ាទី យ៉ាស៊ីហ្ស៊ី បាននិយាយកាលពី ថ្ងៃព្រហស្បតិ៍ថា តួកគីនឹងកសាងជញ្ជំាង ដែលមានប្រវែង ២,៥គីឡូម៉ែត្រ នៅតាមបណ្តោយព្រំដែន ជាមួយប្រទេស ស៊ីរី ដើម្បីការពារពីការឆ្លងកាត់ ដោយខុសច្បាប់។

ទីភ្នាក់ងារព័ត៌មានចិន ស៊ិនហួ ចេញផ្សាយថ្ងៃសុក្រ ទី២៤ ខែឧសភា ឆ្នាំ២០១៣ថា ជញ្ជាំងនឹងត្រូវសាងសង់ឡើង នៅតាមបណ្តោយច្រកទ្វារ ស៊ីលវ៉េហ្គោស៊ូ ខេត្ត ហាតាយ ព្រំដែនជាមួយនឹងប្រទេសស៊ីរី។ លោកបន្ថែមថា កិច្ចព្រមព្រៀងដំបូង សម្រាប់ការចុះហត្ថលេខា ជាមួយនឹងកងកម្លំាងតួកគី ត្រូវបានគេត្រៀមរួចរាល់ហើយ ក្នុងការសាងសង់ជញ្ជាំងនេះ។

លោករដ្ឋមន្រ្តីបាននិយាយថា «យោងតាមកិច្ចព្រមព្រៀងនោះ យើងបានកំណត់គម្រោងមួយ ដែលមានគោលបំណងដើម្បី បង្កើនសុវត្ថិភាពនៃតំបន់យោធានេះ ដោយបានកសាងជាផ្នែកមួយ នៃបន្លាលួស ជញ្ជាំងបេតុង រួមជាមួយនឹងប្រព័ន្ធ កាមេរ៉ាសន្តិសុខផងដែរ»។

ច្រកទ្វារ ស៊ីលវ៉េហ្គោស៊ូ មានប្រវែងយ៉ាងតិចជាង ១០គីឡូម៉ែត្រ ពីទីក្រុង រ៉ាយហាន់លី ប្រទេស តួកគី ហើយក៏ជាកន្លែង ដែលធ្លាប់មានការវាយប្រហារ ដោយគ្រាប់ចំនួនពីរ បណ្តាលឲ្យមានអ្នកស្លាប់ចំនួន មនុស្ស ៥១នាក់ និងច្រើនជាង ១០០នាក់ទៀតរងរបួស កាលពីថ្ងៃទី១១ ខែឧសភា។

ទាក់ទងនឹងការ វាយប្រហារនេះដែរ មេដឹកនាំតួកគី បានភ្ជាប់ទំនាក់ទំនងនៃ ការវាយប្រហារនេះ ជាមួយក្រុមគាំទ្ររដ្ឋាភិបាល និងអង្គការស៊ើបការណ៍ ក្នុងប្រទេសស៊ីរី ប៉ុន្តែទោះជាយ៉ាងណាក៏ដោយ មន្រ្តីរដ្ឋាភិបាលទីក្រុង ដាម៉ាស ក៏បានបដិសេធផងដែរ ចំពោះការចោទប្រកាន់នេះ៕

រដ្ឋមន្រ្តីពាណិជ្ជកម្ម និងគយរបស់តួកគីលោក ហាយ៉ាទី យ៉ាស៊ីហ្ស៊ី

ដាម៉ាស៖ ប្រភពពីមន្រ្តីយោធាស៊ីរីមួយរូប បាននិយាយដោយបដិសេធ ចំពោះសេចក្តីរាយការណ៍ ព័ត៌មានដែលថា ក្រុមឧទ្ទាមបានវាយប្រហារ ចូលពន្ធនាគារ ស្ថិតនៅភាគខាងជើងទីក្រុង អាឡេពប៉ូ ដោយនិយាយថា ក្រុមឧទ្ទាមគ្រាន់តែវាយ បាញ់ប្រហារដោយបាញ់ គ្រាប់កំាភ្លើងត្បាល់ ទៅលើទីនោះ ដោយបានបណ្តាលឲ្យអ្នកទោស មួយចំនួនស្លាប់តែប៉ុណ្ណោះ។

ទីភ្នាក់ងារព័ត៌មានចិន ស៊ិនហួ ចេញផ្សាយថ្ងៃសុក្រ ទី២៤ ខែឧសភា ឆ្នាំ២០១៣ ដោយផ្អែកតាមប្រភពពីយោធា ដែលបានចេញផ្សាយ តាមកញ្ចក់ទូរទស្សន៍រដ្ឋស៊ីរី កាលពីថ្ងៃព្រហស្បតិ៍ថា ក្រុមភេរវជន មិនអាចចូលវាយលុក ពន្ធនាគារបានទេ ដោយបន្ថែមថា អ្នកទោសជាច្រើនបានរងរបួស អំឡុងពេលដែលក្រុមឧទ្ទាមទំាងនោះ វាយប្រហារដោយគ្រាប់កំាភ្លើងត្បាល់។

ជាមួយគ្នានោះដែរ ក្រុមឧទ្ទាមដែលមានការ គំាទ្រពីប្រទេសលោកខាងលិច បានព្យាយាមវាយប្រហារ ទៅលើពន្ធនាគារ ក្នុងរយៈពេលជាង មួយខែមកនេះ ដើម្បីរំដោះមិត្តភកិ្តរបស់ ពួកគេមួយចំនួន។ ខណៈនោះដែរ ក្រុមអ្នកអង្កេតការណ៍ សិទ្ធិមនុស្សប្រចំានៅស៊ីរី ដែលជាអ្នកគាំទ្រក្រុម ប្រឆំាងបាននិយាយថា មនុស្សចំនួន ០៧នាក់បានស្លាប់ នៅតំបន់ ម៉ាសាខេន ហាណាណូ ក្នុងទីក្រុង អាឡេពប៉ូ កាលពីថ្ងៃព្រហស្បតិ៍ ដោយសារការ ទម្លាក់គ្រាប់បែក នៅក្នុងសង្កាត់នោះ។

ចំណែកក្រុមអ្នក អង្កេតការណ៍សិទ្ធិមនុស្ស ដែលមានទីតំាងនៅចក្រភព អង់គ្លេសវិញបាននិយាយថា អំពើហិង្សាបានកើតឡើង នៅតំបន់មួយចំនួន ក្នុងទីក្រុង អាឡេពប៉ូ និងកន្លែងខ្លះទៀត ក្នុងប្រទេស ដែលកំពុងចលាចលមួយនេះ។

គួរបញ្ជាក់ផងដែរថា បើយោងតាមតួលេខថ្មីៗ របស់អង្គការសហប្រជាជាតិ បានឲ្យដឹងថា វិបត្តិរយៈពេល ២៦ខែមកនេះ ក្នុងប្រទេសស៊ីរី ត្រូវបានគេអះអាងថា បណ្តាលឲ្យមានអ្នកស្លាប់ជាង ៧ម៉ឺននាក់ហើយ ខណៈរាប់ម៉ឺននាក់ទៀត បាត់បង់ផ្ទះសម្បែង រត់ទៅនៅប្រទេសជិតខាង៕

វ៉ាស៊ីនតោន៖ រដ្ឋាភិបាលសហរដ្ឋអាមេរិក នៅថ្ងៃព្រសហ្បតិ៍ ទី២៣ ខែឧសភា បានដាក់ទណ្ឌកម្មជាថ្មីទៀត ក្រុមហ៊ុន និងអង្គភាពសាមីចំនួន ២០របស់ប្រទេស អ៊ីរ៉ង់ ដែលបានជាប់ទាក់ទង នឹងកម្មវិធីមីស៊ីល និងនុយក្លេអ៊ែររបស់ រដ្ឋាភិបាលទីក្រុង តេហេរ៉ង់។

ទីភ្នាក់ងារព័ត៌មានចិន ស៊ិនហួ ចេញផ្សាយនៅថ្ងៃសុក្រ ទី២៤ ខែឧសភា ឆ្នាំ២០១៣ថា នៅក្នុងសេចក្តីថ្លែងការណ៍មួយ ដែលចេញដោយ ក្រសួងរតនាគារជាតិ អាមេរិក បានចោទប្រកាន់បណ្តា ក្រុមហ៊ុនទំាងនោះថា បានផ្គត់ផ្គង់ និងផ្តល់សេវាដែលមានសក្តានុពល ចំពោះកម្មវិធីអាវុធនុយក្លេអ៊ែរ លួចលាក់របស់អ៊ីរ៉ង់។

មន្រ្តីក្រសួងរតនាគារជាតិអាមេរិក និយាយថា ការដាក់ទណ្ឌកម្មថ្មីនេះ ជាការរៀបចំដើម្បីបង្កើនសម្ពាធ ទៅលើរដ្ឋាភិបាលទីក្រុង តេហេរ៉ង់ ដោយការរឹតបន្តឹង ទណ្ឌកម្មប្រឆំាងក្រុមហ៊ុន ដែលជាផ្នែកនៃថាមពលរបស់អ៊ីរ៉ង់ ដែលបានបង្ហាញឲ្យឃើញ ពីបណ្តាញទំនាក់ទំនងនៃ សាយភាយនុយក្លេអ៊ែរសំខាន់ របស់ប្រទេសនេះផងដែរ។

គួរបញ្ជាក់ផងដែរថា សហរដ្ឋអាមេរិក បានហាមប្រាមមិនឲ្យពលរដ្ឋខ្លួន ធ្វើពាណិជ្ជកម្មជាមួយនឹងបុគ្គល ក្រុមហ៊ុន និងអង្គភាពសាមី ក្នុងប្រទេសអ៊ីរ៉ង់ ដែលស្ថិតក្នុងគោលដៅ នៃការដាក់ទណ្ឌកម្មរបស់ អាមេរិកនោះទេ ប្រសិនជាមាន ទ្រព្យសម្បត្តិរបស់ពួកគេ ដែលស្ថិតក្រោមយុត្ថាធិការ របស់អាមេរិក គឺត្រូវបានបង្កកផងដែរ៕