left
Safe Home
Safe Home
Safe Home

Dap News...Admin

Sunday, Aug 30th

| English Version | dapnews: 012 571 704, 097 9999 883, email: lim.cheavutha@gmail.com

You are here:

នាយករដ្ឋមន្ត្រី ម៉ាឡេស៊ី ប្រកែកមិនលាលែង ពីតំណែង និង អំពាវនាវ ឲ្យរួបរួមជាតិ

E-mail Print PDF

គូឡាឡាំពួរ៖ លោកនាយករដ្ឋមន្ត្រី ម៉ាឡេស៊ី ណាជីប រ៉ាហ្សាក់ បានប្រកែក មិនព្រមលាលែង ចេញពីតំណែង នោះឡើយ បើទោះបីជាបាតុករ កាន់តែច្រើន បានប្រមូលផ្តុំគ្នា តវ៉ា ប្រឆាំង ចំពោះរូបលោក កាលពីសប្តាហ៍មុននេះ ក៏ដោយ។ ឆ្លើយតប ទៅកាន់ក្រុមបាតុករវិញ លោក ណាជីប បានអំពាវនាវឲ្យប្រជាជាតិ អាស៊ីអាគ្នេយ៍មួយនេះ ធ្វើការរួបរួមគ្នាឡើងវិញ។

សារព័ត៌មាន BBC បានចេញផ្សាយនៅថ្ងៃចន្ទ ទី៣១ ខែសីហា ឆ្នាំ ២០១៥ នេះទៀតថា ប្រជាជនម៉ាឡេស៊ី រាប់ពាន់ នាក់បាន ប្រមូលផ្តុំគ្នាតវ៉ា នៅតាមដងផ្លូវសំខាន់ៗ ក្នុងរដ្ឋធានី គូឡាឡាំពួរ កាលពីចុងសប្តាហ៍ កន្លងទៅនេះ ដោយ អំពាវនាវឲ្យលោកនាយករដ្ឋមន្ត្រី ណាជីប រ៉ាហ្សាក់ លាលែងចេញពីតំណែង ក្រោមបទចោទប្រកាន់ថារូបលោក បានលួចបន្លំ យកប្រាក់ជំនួយសាធារណ ដាក់ក្នុងហោប៉ៅខ្លួនឯង។

ទោះបីជាយ៉ាងណាក៏ដោយ លោក ណាជីប បានអះអាងថា ការធ្វើបាតុកម្មបែបខាងលើនេះ គឺមិនសមស្របទៅនឹង របៀបរបប ក្នុងនាមម៉ាឡេស៊ី ជាប្រទេសប្រជាធិបតេយ្យនោះឡើយ។ លោក ណាជីប បានធ្វើការបដិសេធយ៉ាង ដាច់ខាត ថាលោកមិនបានលេបត្របាក់ថវិកា ជំនួយសាធារណចំនួន ៧០០លានដុល្លារអាមេរិក ដូចពាក្យចរចាម អារាមនោះឡើយ៕

 

បាតុករជប៉ុន ១២ម៉ឺននាក់ តវ៉ាប្រឆាំងច្បាប់ ថ្មីស្ដីពីសន្ដិសុខជាតិ

E-mail Print PDF

តូក្យូ៖ កាលពីថ្ងៃអាទិត្យ ម្សិលមិញនេះ ក្រុមបាតុករជាច្រើន បានប្រមូលផ្ដុំគ្នានៅតាម ទីតាំងជាង ២០០ កន្លែង ទូទាំង ប្រទេសជប៉ុន ដោយអំពាវនាវឲ្យលុបចោល ច្បាប់ស្ដីពីសន្តិសុខជាតិ ដ៏ចម្រូងចម្រាស់មួយ ដែលលោក នាយករដ្ឋមន្ត្រីជប៉ុន ស៊ីនហ្សូ អាបេ ចង់ឲ្យអនុម័ត ក្នុងការពង្រឹងតួនាទី របស់កងទ័ពជប៉ុន នៅបរទេស។

ទីភ្នាក់ងារសារតព័ត៌មាន ក្យូដូជប៉ុន ចេញផ្សាយថ្ងៃទី០១ ខែសីហា ឆ្នាំ២០១៥ នេះបន្ដទៀតថា ក្រុមបាតុករ មាន លក្ខណៈជាទ្រង់ទ្រាយធំ បានប្រមូលផ្ដុំគ្នា នៅផ្នែកខាងមុខនៃអគារ ចំ កណ្តាលទីក្រុង តូក្យូ ដែលមានចំនួន ក្រុមអ្នកតវ៉ាប្រមាណជា ១២ម៉ឺននាក់ នេះបើយោងតាម កាលលើកឡើងរបស់ក្រុម អ្នករៀបចំ។ នៅក្នុងនោះ ដែរបណ្ដាមេដឹកនាំគណបក្សប្រឆាំង ដូចជាលោក កាស៊ូយ៉ា អូកាដា ប្រធាន គណបក្សប្រជាធិបតេយ្យជប៉ុន និងលោក កាហ្សូ ស៊ីអ៊ិ ប្រធានបក្សកុម្មុយនីស្តជប៉ុន ក៏មានវត្តមានចូលរួមក្នុងព្រឹត្តិការណ៍តវ៉ា ស្ដីពីការបញ្ជូន ទាហានទៅកាន់បរទេសនេះដែរ។

បណ្ដាមេដឹកនាំគណបក្សប្រឆាំង បានរួមគ្នាសន្យាថា នឹងធ្វើការងាររួមគ្នា ដើម្បីជម្រុញឲ្យ រដ្ឋាភិបាល របស់លោក អាបេ ធ្វើការលុបចោលនូវច្បាប់នេះ។ ហើយជាមួយគ្នានេះដែរប្រធាន គណបក្សប្រជាធិប តេយ្យជប៉ុន ហៅកាត់ថា DPJ បាននិយាយថា “រដ្ឋបាលរបស់នាយករដ្ឋមន្រ្តី ជប៉ុនលោក អាបេ ត្រូវតែ យល់ថា ប្រជាពលរដ្ឋសាមញ្ញ មានអារម្មណ៍យ៉ាងណាចំពោះវិបត្តិ និងកំហឹងមួយនេះ”។

យ៉ាងណាមិញ រដ្ឋាភិបាលលោកអាបេ កំពុងមានបំណងឆ្លងឲ្យផុតនូវច្បាប់នេះ ហើយ បច្ចុប្បន្នច្បាប់នេះកំពុង ត្រូវបានពិភាក្សាឡើងនៅសភាជាន់ខ្ពស់ជប៉ុន ដែលនឹងត្រូវដាក់ ឲ្យដំណើរការជាធរមាន នៅចុងខែ កញ្ញា ខាងមុខនេះ។

គណបក្សប្រជាធិបតេយ្យសេរី ដែលកំពុងកាន់អំណាច និងគណបក្សកូមេតូ ជាដៃគូចម្រុះ របស់ ខ្លួននោះទន្ទឹម នឹងនេះដែរ បានបដិសេធថា ការប្រមូលផ្ដុំគ្នាជាទ្រង់ទ្រាយធំបំផុត តវ៉ាប្រឆាំងនឹងច្បាប់ស្ដីពី សន្ដិសុខជាតិនេះ នឹងមិនមានឥទ្ធិពលលើការពិភាក្សា និង សម្តែងភាពខ្នះខ្នែងក្នុងការអនុម័តច្បាប់នេះ ឡើងរបស់សភាជាន់ ខ្ពស់នោះទេ៕

ទីក្រុងបុរាណ របស់ស៊ីរី ទទួលរកការបំផ្លាញ យ៉ាងដំណំ ក្រោមស្នាដៃ IS

E-mail Print PDF

ដាម៉ាស៖ ពួកសកម្មប្រយុទ្ធ រដ្ឋអ៊ីស្លាម (IS) បានធ្វើការបំផ្លិចបំផ្លាញ ប្រាសាទបុរាណ ដែល មានអាយុកាលជាង ២ពាន់ឆ្នាំ ស្ថិតនៅក្នុងទីក្រុង ផាលម៉ាយរ៉ា របស់ប្រទេសស៊ីរី កាលពីចុង សប្តាហ៍កន្លងទៅនេះ។ នេះបើតាមសាក្សី ដែលបាន ដឹងសកម្មភាពបំផ្លាញ របស់ក្រុម IS ប្រាប់សារព័ត៌មាន BBC នៅថ្ងៃចន្ទ ទី៣១ ខែសីហា ឆ្នាំ២០១៥។

ចំពោះប្រាសាទ ដែលបានទទួលរងការខូចខាតយ៉ាងដំណំនោះ មានឈ្មោះថា ប៊ែល។ រហូត មកដល់ពេលនេះ ពុំទាន់មានរូបភាព ឬ សាក្សីណាមួយបញ្ជាក់ថា វាបានទទួលរងការខូចខាត ដល់កម្រិតណានោះឡើយ ដោយគ្រាន់ តែសាក្សីដែលបានដឹង ពីសកម្មភាពបំផ្លាញនោះ បាន ឮសំឡេងផ្ទុះយ៉ាងកក្រើក ចេញពីតំបន់ប្រាសាទ។

ជុំវិញការបំផ្លាញទីក្រុងបុរាណ ក្រោយវាយដណ្តើមបានពីប្រទេសស៊ីរី នោះដែរ កាលពីមួយ សប្តាហ៍មុន ពួក IS ក៏ធ្លាប់បានធ្វើការបង្ហោះនូវរូបភាព មួយចំនួនទៀត ស្តីពីការបំផ្លាញផ្នែក មួយចំនួនរបស់ប្រាសាទបុរាណ បាអាល់ ហ្សាមីន។ គួរបញ្ជាក់ថា ពួកឧទ្ទាមរដ្ឋអ៊ីស្លាម បាន ធ្វើការរឹបអូសទីក្រុង ផាល់ម៉ាយរ៉ា កាលពីខែឧសភា ដែល ប្រការនេះ វាបានបង្កការព្រួយ បារម្ភយ៉ាងខ្លាំងសម្រាប់ ក្រុមអ្នកអភិរក្សបេតិកភណ្ឌពិភពលោក៕

ហ្សកដានី អះអាងថា មានករណីវីរុស MERS ចំនួនបីបានកើតឡើង

E-mail Print PDF

អេមមែន៖ ភ្នាក់ងារព័ត៌មាន Petra បាននិយាយថា ប្រទេស ហ្សកដានី បានធ្វើសេចក្តី រាយការណ៍កាលពីថ្ងៃអាទិត្យម្សិលមិញនេះអំពី ករណីថ្មីនៃ ការបង្កមេរោគផ្លូវដង្ហើម (MERS) ដែលកំពុងរីករាលដាលនៅទូទាំងតំបន់។

លោក Mohammad Abdullat ជាប្រធាននាយកដ្ឋាន ជំងឺឆ្លងនៅក្រសួងសុខាភិបាល បានឱ្យ ដឹងក្នុងសេចក្តីថ្លែងការណ៍មួយកាលពីថ្ងៃអាទិត្យថា ករណីជំងឺផ្លូវដង្ហើម(MERS) ដែលបាន កើតឡើងចំពោះបុរសក្នុងវ័យ ៥០ឆ្នាំ ត្រូវបានរាយការណ៍ថាជាករណីទីបី ដែលបានធ្វើ ការចម្លងចម្លងវីរុសតិចជាងមួយសប្តាហ៍មកនេហ។

លោកបាននិយាយទៀតថា ករណីថ្មីនៃ ជំងឺផ្លូវដង្ហើម(MERS) កើនឡើងជាលំដាប់ចាប់តាំងពីឆ្នាំ ២០១២ មកម្ល៉េះ។ ជាមួយគ្នាដែរ ការកើននៃជំងឺផ្លូវដង្ហើមជាបន្តបន្ទាប់បែបនេះ បានបណ្តាល ឱ្យ មានភាពភ័យស្លន់ស្លោ នៅទូទាំងតំបន់ក្នុងរយៈពេលប៉ុន្មានឆ្នាំចុងក្រោយនេះ ដោយបាន ជំរុញឱ្យរដ្ឋាភិបាលចាប់ផ្តើមយុទ្ធនាការផ្សព្វផ្សាយ អំពីវិធានការ ព្រមានតំណាក់កាលដំបូង ដើម្បីប្រឹងប្រែងទប់ស្កាត់ការរីករាលដាលនៃមេរោគនេះ។

គួរបញ្ជាក់ដែរថា ប្រទេសអារ៉ាប៊ី សាអូឌីត បានក្លាយជាប្រទេសដែលមានអ្នកជំងឺ ផ្លូវដង្ហើម (MERS) ច្រើនជាងគេបំផុត ដោយមានអ្នកជំងឺឆ្លងរាប់រយនាក់ និងជាច្រើនអ្នកទៀត បានស្លាប់ដោយសារជំងឺនេះ៕

ប៉ូលិសថៃ ចាប់ជនសង្ស័យ ម្នាក់ទៀត ពាក់ព័ន្ធ ករណីបំផ្ទុះ គ្រាប់បែក ក្នុងទីក្រុងបាងកក

E-mail Print PDF

បាងកក៖ យោងតាមព័ត៌មាន Sky News ចេញផ្សាយនៅថ្ងៃទី២៩ ខែសីហា ឆ្នាំ២០១៥ បានឲ្យដឹងថា ប៉ូលិសថៃ បានចាប់ជនសង្ស័យម្នាក់ទៀត ដែលគេអះអាង និងជឿជាក់ថា ស្ទើរតែ ៩០% ហើយ គឺជាជនដែលទទួលខុសត្រូវ ក្នុងករណីបំផ្ទុះគ្រាប់បែក នៅទីក្រុងបាងកក កាលពីថ្ងៃទី១៧ ខែសីហា កន្លងទៅ។

សូមជម្រាបថា ករណីផ្ទុះគ្រាប់បែក នៅកណ្ដាលទីក្រុងបាងកក ប្រទេសថៃ ដែលបានកើតឡើង នៅថ្ងៃទី១៧ ខែសីហា ឆ្នាំ២០១៥ នោះ បានសម្លាប់មនុស្ស ២០នាក់ និងបណ្តាលឲ្យមនុស្ស ១០០នាក់ ផ្សេងទៀតរងរបួស៕

Photo by DAP-News

Photo by DAP-News

Photo by DAP-News

Photo by DAP-News

រដ្ឋមន្រ្តីការបរទេស​​ជប៉ុន៖ លើក​កម្ពស់​ការ​ចូល​រួម​របស់​ស្ត្រី​ក្នុង​សង្គម ដើម្បី​អ្នក​រាល់​គ្នា

E-mail Print PDF

តូក្យូ៖ រដ្ឋមន្រ្តីក្រសួងការបរទេសជប៉ុន លោក Fumio Kishida នៅថ្ងៃសៅរ៍ទី២៩ ខែសីហា ឆ្នាំ ២០១៥ បានថ្លែងថា ការលើកកម្ពស់ការចូលរួម របស់ស្រ្តី នៅក្នុងសង្គម មានន័យថា ជាការបំរើអ្នករាល់គ្នា រាប់ទាំងបុរស កុមារ និងមនុស្ស។

ថ្លែងនៅក្នុងពិធីបើកកិច្ចពិភាក្សាថ្នាក់កំពូលនៃសន្និសីទពិភពលោកសម្រាប់ស្រ្តី ហៅកាត់ថា WAW! (World Assembly for Women!) លើកទី២នៅទីក្រុងតូក្យូ លោករដ្ឋមន្រ្តី បានគូសបញ្ជាក់ថា “នៅថ្ងៃនេះ យើងបានរៀបចំឯកសារមួយស្តីពី ការអនុវត្តរបស់ជប៉ុន ស្តីពីWAW! To Do ដែលខ្ញុំបានធ្វើការសង្ខេបកាលពីធ្វើជាប្រធានអង្គប្រជុំឆ្នាំមុន។ ខ្ញុំសូមគូសបញ្ជាក់ថា “WAW! To Do” គឺជាឯកសារមួយដែលត្រូវបានចែកជូនដល់ពិភពលោក ដូច្នេះខ្ញុំសង្ឃឹមមិនមែនតែប្រជាជនជប៉ុនទេដែលបាន ប៉ុន្តែមនុស្សម្នានៅពិភពលោក នឹងទទួលបានឯកសារនេះផងដែរ”។

បើតាមលោករដ្ឋមន្រ្តីការបរទេសជប៉ុន “WAW! for All” គឺជា ប្រធានបទសម្រាប់ឆ្នាំនេះ ហើយថ្ងៃនេះកិច្ចពិភាក្សាតុមូលកម្រិតខ្ពស់ មានការពិភាក្សាអំពីការបញ្ហានៃការចូលរួមរបស់បុរសនិងអ្នកឯទៀត ដើម្បីថ្លែងនូវការប្រឈមរបស់ស្រ្តីទៅនឹងការលំបាកដ៏ចម្បងៗជាច្រើនទៀត។
 
សម្រាប់បញ្ហាជាសាកលវិញ លោករដ្ឋមន្រ្តី បានថ្លែងថា “យើង ក៏មានវេទិកាចំនួន៣ផងដែរក្រោមប្រធានបទ អប់រំ ការកសាងសន្តិភាព និងកិច្ចសហប្រតិបត្តិការអន្តរជាតិ។ “ជប៉ុន នឹងធ្វើកិច្ចការដល់ខ្ពស់បំផុត ដើម្បីធ្វើឱ្យស.វ ទី២១ ជាពិភពលោក គ្មានការរំលោភសិទ្ធិមនុស្សប្រឆាំងស្រ្តី។ ខ្ញុំសង្ឃឹមថា កិច្ចពិភាក្សាថ្ងៃនេះ នឹងរួមចំណែក បង្កើតឱ្យមានតួយ៉ាងនូវពិភពលោកមួយបែបនេះ”។

សម្រាប់លោកស្រី Hariko Arimora រដ្ឋមន្រ្តីកិច្ចការនារីជប៉ុន បានថ្លែងការស្វាគមន៍ប្រកបដោយមោទនភាព ចំពោះវត្តមានរបស់បណ្តាភ្ញៀវមកពីជុំវិញពិភពលោក មកចូលរួមកម្មវិធីសន្និបាតនេះនាទីក្រុងតូក្យូ។
លោកស្រី បន្ថែមថា ប្រទេសជប៉ុន ជំរុញការចូលរួមរបស់ស្រ្តីមិនថាតែនៅក្នុងរបៀបវារៈអន្តរជាតិ ប៉ុន្តែថែមទាំងក្នុងស្រុកផងដែរ។
លោក បញ្ជាក់ថា “ជប៉ុន មានតួនាទីដើម្បីលើកកម្ពស់ស្រ្តី ឱ្យចូលរួមកាន់តែច្រើនក្នុងបណ្តាក្រុមហ៊ុន និងគ្រប់បណ្តាវិស័យទាំងអស់។ ជប៉ុន ក៏គាំទ្រផងដែរថា ស្រ្តី អាចភ្នាក់ងារឱ្យមានការផ្លាស់ប្តូរ ឆ្ពោះទៅរកការលើកកម្ពស់សេចក្តីថ្លៃថ្នូស្រ្តី”។
 
យ៉ាងណាក៏ដោយ បានលោក Fumio Kishida រដ្ឋបាលរបស់លោកនាយករដ្ឋមន្រ្តីShinzo Abe ជប៉ុនបានសម្រេចចិត្តហើយថា ជប៉ុននឹងយកតួនាទីនាំមុខគេ ក្នុងវិស័យស្រ្តី។
 
WAW! គឺជាគំនិតផ្តួចផ្តើមមួយរបស់លោកនាយករដ្ឋមន្ត្រី Abe៕

យូអ៊ិន ព្រមានទៅលើការស្លាប់ ជនអន្តោប្រវេសន៍ យ៉ាងច្រើនប៉ុន្មាន ថ្ងៃមកនេះ

E-mail Print PDF

អ.ស.ប ៖ លោក បាន គីមូន អគ្គលេខាធិការ នៃអង្គការសហប្រជាជាតិ បានព្រមានទៅលើករណី ដែលបង្កឲ្យ មានជនអន្តោប្រវេសន៍ ស្លាប់អស់ជាច្រើននាក់ នាពេលប៉ុន្មានថ្ងៃកន្លងមកនេះ។

ទូរទស្សន៍អង់គ្លេស ប៊ីប៊ីស៊ី បានផ្សព្វផ្សាយឲ្យដឹង កាលពីថ្ងៃទី២៨ ខែសីហា ឆ្នាំ២០១៥ថា លោក បាន គីមូន បានអំពាវនាវ "សូមឲ្យមាន ការចូលរួមទទួលខុស ត្រូវលើផ្នែកនយោយបាយ" ដើម្បីបញ្ចៀសនូវ "វិបត្តិនៃ សោកនាដកម្ម" ។

លោកប្រធានយូអ៊ិន បានថ្លែងថា "តម្រូវការច្រើនណាស់ដែលចាំចាច់" ដើម្បីទប់ស្កាត់ការស្លាប់ជនអន្តោប្រវេសន៍ ដែលកំពុងព្យាយាមភៀស ខ្លួនទៅកាន់បណ្តាប្រទេសនៅអឺរ៉ុប ។

លោកបានអំពាវនាវថា សូមឲ្យបណ្តារដ្ឋទាំងឡាយដែលពាក់ព័ន្ធ "រក្សាសុវត្ថិភាព និងច្បាប់អំពីជន អន្តោប្រវេសន៍ឲ្យបាន ត្រឹមត្រូវ" ។

គួររំលឹកថា កាលពីថ្ងៃព្រហស្បតិ៍កន្លងមកនេះ មានពលរដ្ឋចំនួន៧១នាក់ ដែលគេស្គាល់ថា ជាពលរដ្ឋរ បស់ប្រទេស៊ីរី បានស្លាប់នៅក្នុង រថយន្តមួយដែលចតនៅក្នុងប្រទេសអូទ្រីស ហើយមានពលរដ្ឋ ប្រមាណ ២០០នាក់ទៀត ក៏ត្រូវបានស្ថិតក្នុង ស្ថានភាពគ្រោះថ្នាក់លិច ទូកនៅលីប៊ីដែរ ។

ប្រភពព័ត៌មានថ្មីៗ បានឲ្យដឹងថា រកឃើញសាកសពចំនួន១២នាក់ នៅក្នុងហេតុការណ៍លិចទូក នៅលីប៊ី ។

លោក បាន គីមូន បានថ្លែងថា "សហគមន៍អន្តរជាតិ ត្រូវតែកំណត់ឲ្យបានទៅលើការរកដំណោះស្រាយជម្លោះទាំងឡាយ និងបញ្ហា ដែលធ្វើ ឲ្យពលរដ្ឋបាត់បង់អាយុជីវិត ដូច្នេះជម្រើសដ៏ស្តួចស្តើងនោះ ពលរដ្ឋត្រូវបង្ខំចិត្តជម្លៀសខ្លួនចេញពី តំបន់ដែលគ្រោះថ្នាក់បែបនេះឯង"" ៕

វៀតណាម ដោះលែងអ្នកទោស​ ១៨០០០នាក់ ឲ្យមានសេរីភាព

E-mail Print PDF

ហាណូយ ៖ ទូរទស្សន៍ប៊ីប៊ីស៊ី បានផ្សាយ កាលពីថ្ងៃទី២៨ ខែសីហា ឆ្នាំ២០១៥ថា កាលពីថ្ងៃសុក្រម្សិលមិញ រដ្ឋាភិបាលនៃ សាធារណរដ្ឋសង្គមនិយម វៀតណាម បានធ្វើការដោះលែងអ្នកទោសចំនួន ១៨០០០នាក់ ឲ្យមានសេរីភាពឡើងវិញ ។

ការសម្រេចដោះលែងឲ្យមានសេរីភាពនេះ គឺបានធ្វើឡើងចំខួបរំលឹក នៃការទទួលបានឯករាជ្យភាព ពេញលេញពីបារាំង ដែលជាខួបលើកទី៧០ នៃការដណ្តើមបានឯករាជ្យ ពីបារាំងដែលធ្វើអណា និគមមកលើវៀតណាម ។

គេបានដឹងថា អ្នកទោសប្រមាណជាង១៨០០០នាក់ ដែលត្រូវបានដោះលែងឲ្យមានសេរីភាពវិញនោះ មានអ្នកខ្លះភាគច្រើន ជាប់ពាក់ព័ន្ធនឹង ឃាតកម្ម និងគ្រឿងញៀន ប៉ុន្តែអ្នកទោសចំនួន៣៤រូប ក្នុងចំណោម អ្នកទោសជាង១ពាន់នាក់នោះជាជនបរទេសដែលបានប្រព្រឹត្តទោស ហើយជាប់ពន្ធនាគារនាពេលកន្លងមក ។

ទោះបីជាមានការដោះលែងអ្នកទោសដ៏ច្រើនបែបនេះក្តី សម្រាប់អ្នកទោសខាងផ្នែកនយោបាយវិញ មិនមានការ អនុញ្ញាត្តឲ្យ ដោះលែងឲ្យមានសេរីភាពនៅឡើយទេ ។ នេះបើផ្អែកតាមអ្នកសង្កេត ការណ៍មួយចំនួនបានឲ្យដឹងយ៉ាងដូច្នេះ ។

គួរបញ្ជាក់ថា កាលពីឆ្នាំ២០០៩ ដែលជាការរៀបចំពិធីឡើងកាន់តំណែងប្រធានាធិបតីវៀតណាមនោះ ក៏បានធ្វើការដោះលែងអ្នកទោស ប្រមាណជាង១០ពាន់នាក់ឲ្យមានសេរីភាពវិញដែរ ៕

សន្និបាត​ពិភព​លោក​ស្តីពី​ស្ត្រី​លើកទី២ ត្រូវ​បាន​បើក​ជា​ផ្លូវការ (មានវីដេអូ)

E-mail Print PDF

តូក្យូ៖ លោកនាយករដ្ឋមន្ត្រីជប៉ុន Shizo Abe បានមានប្រសាសន៍ថា នៅឆ្នាំនេះ សន្និបាតពិភពលោកដើម្បីស្ត្រី ឬហៅកាតថាWAW បានជ្រើសរើសប្រធានបទ មួយក្រោមចំណងជើងថា “WAW for All!” ។ នៅក្នុងសារនេះ គឺដើម្បីឲ្យស្រ្តីនិងបុរសធ្វើកិច្ចសហប្រតិបត្តិការជាមួយគ្នា បង្កើតសង្គមមួយដែលអាចបង្ក លក្ខណៈងាយស្រួលមួយដល់ស្ត្រីនិងបុរស នៅក្នុងការរួមរស់ជាមួយគ្នាប្រកបដោយសន្តិភាព។

យ៉ាងណាក៏ដោយ បើយោងតាមការបញ្ជាក់ របស់លោកនាយករដ្ឋមន្ត្រី ការប្រឈមដ៏ធំជាច្រើននាពេលបច្ចុប្បន្ន នៅក្នុងប្រទេសជប៉ុន គឺការធ្លាក់ចុះនូវចំនួនប្រជាពលរដ្ឋ តាមរយៈការធ្វើឲ្យមានការសម្រេចចិត្ត ក្នុងការពន្យាកំណើត ឬក៏អត្រាកំណើតមានការថយចុះ។

លោកនាយករដ្ឋមន្ត្រី ក៏បានគូសបញ្ជាក់បន្ថែមផងដែរថា រដ្ឋាភិបាលជប៉ុនបានជំរុញការទទួលយកនូវបុគ្គលិក មន្ត្រីរាជការជាស្ត្រីជាង៣០ភាគរយ នៅក្នុងឆ្នាំសារពើរភណ្ឌ នាឆ្នាំនេះ។ លោកបានបន្ថែមថា ខណៈដែលរដ្ឋាភិបាលរបស់លោក កំពុងតែជំរុញការលើកម្ពស់ ការតែងតាំងស្រី ក្នុងការងារសម្រេចចិត្ត នៅក្នុងមន្ត្រីសាធារណៈ វាគឺជាការចាំបាច់ណាស់ដើម្បីធ្វើឲ្យស្រី្តខ្លួនឯងផ្ទាល់ ធ្វើការសិក្សារៀនសូត្រកាន់តែពូកែ មានគំនិតចេះដឹងកាន់តែទូលំទូលាយ ហើយមានលទ្ធភាពទទួលខុសត្រូវ។
លោកនាយករដ្ឋមន្ត្រីបានគូសបញ្ជាក់ថា លោកនឹងបេ្តជ្ញាខិតខំប្រឹងប្រែង បង្កើតឲ្យមាននូវសង្គមមួយនៅក្នុងប្រទេសជប៉ុន ក៏ដូចជានៅក្នុងពិភពលោក ដល់ការជំរុញការ លើកកម្ពស់ស្រី្ត និងបុរសឲ្យកាន់តែបានល្អនិងស្មើភាពគ្នានៅក្នុងសង្គម។

សម្រាប់លោកស្រី Ellen Johnson Sirleaf ប្រធានាធិបតីប្រទេសលីបេរីយ៉ា បានថ្លែងនៅក្នុងពិធីបើកសន្និបាតនេះផងដែរថា លោកនាយករដ្ឋមន្ត្រីAbe ពិតជាមានឧត្តមភាពខាងគំនិតលើកកំពស់ស្ត្រី ក្នុងការចូលរួមឆាកនយោបាយ ក៏ដូចជាសេដ្ឋកិច្ចសង្គម មិនថានៅក្នុងឬក្រៅប្រទេសនោះទេ។

លោកស្រីប្រធានាធិបតី ក៏សូមអំពាវនាវ ឲ្យអ្នកទាំងអស់គ្នា ចូលរួមជាមួយលោកនាយករដ្ឋមន្ត្រីAbe ដែលបានផ្តួចផ្តើមគំនិត ធ្វើកិច្ចប្រជុំWAW ដែលប្រទេសជប៉ុនបានធ្វើជាលើកទីពីរ នៅក្នុងឆ្នាំនេះ ដើម្បីរួមចំណែកដល់ការលើកកម្ពស់ ចំពោះបញ្ហាស្រ្តីនិងបុរស ឲ្យកាន់តែស្មើភាពគ្នា និងបានចូលរួមចំណែក ក្នុងការអភិវឌ្ឍន៍សង្គមប្រកបដោយនិរន្តភាព។

ជាមួយគ្នានេះផងដែរ លោកស្រី Michelle Obama ភរិយារបស់លោកប្រធានាធិបតី អាម៉េរិក Barack Obama ក៏បានផ្ញើរសារវីដេអូដល់អង្គប្រជុំផងដែរ ជាមួយ នឹងការកោតសរសើរ លោកនាយករដ្ឋមន្ត្រីAbe ដែលបានខិតខំក្នុងភារកិច្ចរបស់ខ្លួន ក្នុងការរួមចំណែកជួយជំរុញនិងលើកកំពស់ស្រ្តី ជាពិសេសតាមរយៈ ការបង្កើតឲ្យមានសន្និបាតនេះឡើង នៅប្រទេសជប៉ុន នាពេលនេះ។

លោកស្រីបានថ្លែងបញ្ជាក់ថា បញ្ហាស្រីមិនមែនជាបញ្ហាដាច់ដោយឡែកណាមួយ របស់ប្រទេសណាមួយនោះទេ ក៏ប៉ុន្តែបញ្ហារួមរបស់យើងទាំងអស់គ្នា ហើយរដ្ឋាភិបាលរបស់លោកប្រធានាធិបតីអាម៉េរិក Barack Obama ព្រមទាំងលោកស្រីផ្ទាល់ក៏បានបង្កើតឲ្យមានកម្មវិធីមួយដែលមានឈ្មោះថា«Let Girls’ learn» ដែលនេះជាចំនុចផ្តើមមួយ របស់លោកស្រីផ្ទាល់ នៅក្នុងកិច្ចខិតខំប្រឹងប្រែងលើកកម្ពស់ស្រ្តីនិងកុមារ ឲ្យបានចូលរួមនៅក្នុងសង្គមឲ្យបានកាន់តែច្រើនឡើងផងដែរ។

គួរជម្រាបជូនផងដែរថា សន្និបាតនេះ គឺជាគំនិតផ្តួចផ្តើមផ្ទាល់របស់លោកនាយករដ្ឋមន្ត្រីជប៉ុន Shinzo Abe នាឆ្នាំ២០១៤កន្លងទៅនៅប្រទេសជប៉ុន ហើយលើកនេះ បានប្រារព្ធធ្វើឡើងនៅទីក្រុងតូក្យូ ប្រទេសជប៉ុនម្តងទៀត ដែលមានអ្នកចូលរួមមកពីបណ្តាប្រទេសជាច្រើននៅជុំវិញពិភពលោក ព្រមទាំងមន្ត្រីអ្នកជំនាញការមកពី អង្គការអន្តរជាតិនានាជាង១០០អង្គការផងដែរ៕

Page 1 of 63