left
Safe Home
Safe Home
Safe Home

Dap News...Admin

Saturday, Apr 18th

| English Version | dapnews: 012 571 704, 097 9999 883, email: lim.cheavutha@gmail.com

You are here:
 
AAP

អ.ហ ឃាត់ខ្លួនអ្នកជួញដូរ ថ្នាំញៀន ៦នាក់ ដកហូតថ្នាំ ជាងកន្លះគីឡូក្រាម

E-mail Print PDF

ភ្នំពេញ៖ កម្លាំងកងរាជអាវុធហត្ថ (អ.ហ) ខណ្ឌមានជ័យ បានឃាត់ខ្លួនក្រុមជួញដូរថ្នាំញៀន ៦នាក់ និង ដកហូត ថ្នាំញៀនបានជាងកន្លះគីឡូក្រាម ព្រមទាំងវត្ថុតាងមួយចំនួនទៀត នៅក្នុងប្រតិបត្តិការរបស់ខ្លួនកាលពីថ្ងៃទី១៦, ១៧ ខែមេសា ឆ្នាំ២០១៥កន្លងទៅនេះ។

បើតាមរបាយការណ៍របស់កងរាជអាវុធហត្ថខណ្ឌមានជ័យ បានឲ្យដឹងថា ជនសង្ស័យទាំង៦នាក់ ដែលបានឃាត់ ខ្លួន ១. ឈ្មោះ សៅ សម្បត្តិ អាយុ ២៥ឆ្នាំ មុខរបរយោធា ស្នាក់នៅទីស្នាក់ការខណ្ឌទួលគោគ, ២. ឈ្មោះ សេង ភក្តី អាយុ ១៧ឆ្នាំ មុខរបរមិនពិត ប្រាកដ រស់នៅភូមិសន្សំកុសល្យ សង្កាត់បឹងទំពុន ខណ្ឌមានជ័យ, ៣. ឈ្ម វ៉ាន ដារ៉ារិទ្ធ អាយុ ១៩ឆ្នាំភេទប្រុស, ៤. ឈ្មោះ សុ គុន្ធាពុទ្ធិរិទ្ធ អាយុ ១៨ឆ្នាំ ភេទ ប្រុស, ៥. ឈ្មោះ ងៀត សាទីរ៉ា អាយុ ២៤ឆ្នាំ ភេទប្រុស និងទី៤. ឈ្មោះ តឹក ស្រីមុំ អាយុ ២៥ឆ្នាំ ភេទស្រី។

ជាមួយការឃាត់ខ្លួននេះ កម្លាំងកងរាជអាវុធហត្ថដកហូតបានថ្នាំញៀនជាងកន្លះគីឡូក្រាម ក្នុងនោះរួមមាន៖ ថ្នាំ ក្រាមពណ៌សថ្លាចំនួន ០៧កញ្ចប់ធំ និង ៣១កញ្ចប់តូច, ថ្នាំគ្រាប់ ០១កញ្ចប់ មានចំនួន ០២គ្រាប់។ ក្រៅពីថ្នាំ ញៀន សមត្ថកិច្ចដកហូតជញ្ជីងថ្លឹងថ្នាំចំនួន ២, អាវុធខ្លី ម៉ាក CF 98-9 លេខ:៥១៤២ គ្រាប់ចំនួន១៥គ្រាប់, រថ យន្តម៉ាកម៉ាសដា ពណ៌ស ស្លាកលេខ ភ្នំពេញ 2AT-7888 ០១គ្រឿង, ម៉ូតូ ២គ្រឿង, ទូរស័ព្ទចំនួន ០២គ្រឿង រួម និងឧបករណ៍សេពគ្រឿងញៀនមួយចំនួនទៀត។

ក្រោយឃាត់ខ្លួនជនសង្ស័យទាំង៦ ត្រូវបានកសាងសំណុំរឿងបញ្ជូនទៅទីបញ្ជាករដ្ឋានកងរាជអាវុធហត្ថរាជធានី ភ្នំពេញ ដើម្បីចាត់ការបន្តទៅតាមច្បាប់៕

រាជរដ្ឋាភិបាល សម្រេចកាត់ដីជម្លោះ ១១៥.៤១ហិកតា ពីអាជ្ញាធរអប្សរា ជូនប្រជាពលរដ្ឋ ៧៤៧គ្រួសារ

E-mail Print PDF

សៀមរាប៖ ដីជម្លោះដ៏រ៉ាំរ៉ៃរវាងប្រជាពលរដ្ឋក្នុងសង្កាត់ ស្លក្រាម និងអាជ្ញាធរអប្សរា ទំហំ ១១៥,៤១ហិកតា ត្រូវ បានរាជរដ្ឋាភិបាលកម្ពុជា សម្រេចប្រគល់ឲ្យប្រជាពលរដ្ឋវិញហើយកាលពីថ្ងៃទី១៧ ខែមេសា ឆ្នាំ២០១៥ម្សិល មិញនេះ ការប្រកាសសម្រេចបានធ្វើឡើងបន្ទាប់ពីជំនួបដោយផ្ទាល់រវាងសម្តេចតេជោ ហ៊ុន សែន នាយករដ្ឋមន្រ្តី កម្ពុជា ជាមួយប្រជាពលរដ្ឋមានជម្លោះកាលពីថ្ងៃទី១៣ ខេមេសា កន្លងទៅនេះ។

ជាមួយនឹងការសម្រេចរបស់រាជរដ្ឋាភិបាលនេះ លោក ឃឹម ប៊ុនសុង អភិបាលខេត្តសៀមរាប នៅព្រឹកថ្ងៃទី១៨ ខែ មេសា នេះ បាននាំយកសេចក្តីសម្រេចទៅប្រកាសជូនប្រជាពលរដ្ឋ និងចាប់ផ្តើមរៀបចំចាត់ចែងកាត់ដីទាំងនេះ ប្រគល់ជូនប្រជាពលរដ្ឋវិញ។

អនុក្រឹត្យរបស់រាជរដ្ឋាភិបាល ដែលចុះហត្ថលេខាដោយសម្តេចតេជោ ហ៊ុន សែន កាលពីថ្ងៃទី១៧ ខែមេសា បាន សម្រេចកាត់ដីទំហំ ១១៥.៤១ហិកតា ចេញពីផ្ទៃដីបុរីសណ្ឋាគារអង្គរសៀមរាប ដែលគ្រប់គ្រងដោយអាជ្ញាធរអប្ស រា ជូនប្រជាពលរដ្ឋចំនួន ៧៤៧គ្រួសារ រស់នៅភូមិបឹងដូនប៉ា និង ភូមិចុងកៅស៊ូ សង្កាត់ស្លក្រាម ខេត្តសៀមរាប។

លោក ឃឹម ប៊ុនសុង បានថ្លែងប្រាប់មជ្ឈមណ្ឌលព័ត៌មានដើមអម្ពិលនៅព្រឹកថ្ងៃទី១៨ ខែមេសា ឆ្នាំ២០១៥នេះ ក្រោយពីទទួលបានអនុក្រឹត្យពីប្រមុខរាជរដ្ឋាភិបាល ស្តីពីការកាត់ផ្ទៃដីទំហំសរុប ១១៥.៤១ហិកតា ចេញពីផ្ទៃដីបុរី សណ្ឋាគារអង្គរសៀមរាប ដើម្បីធ្វើប្រទានកម្មជាកម្មសិទ្ធិជូនប្រជាពលរដ្ឋ ដែលបានកាន់កាប់ប្រើប្រាស់ និងដាំដុះ ជាក់ស្តែង នៅក្រុងសៀមរាប រូបលោក រួមនិងមន្រ្តីពាក់ព័ន្ធមួយចំនួន បានអញ្ជើញចុះទៅប្រកាសកាត់ដីជូនប្រជា ពលរដ្ឋ។ ក្នុងនោះផ្ទៃដីទំហំ ៥១,៤៣ហិកតា កាត់ជូនប្រជាពលរដ្ឋនៅភូមិដូនប៉ា ចំនួន ៥៦៨គ្រួសារ និង ផ្ទៃដីទំ ហំ ៦៣,៩៨ហិកតា កាត់ជូនប្រជាពលរដ្ឋភូមិចុងកៅស៊ូ ចំនួន ១៧៩គ្រួសារ។

លោកអភិបាលខេត្តសៀមរាប បានបញ្ជាក់ទៀតថា ក្រោយពីប្រកាសកាត់ដីជូនប្រជាពលរដ្ឋ តាមអនុក្រឹត្យរបស់ ប្រមុខរាជរដ្ឋាភិបាល នៅម៉ោងប្រមាណជិត១១ព្រឹកថ្ងៃទី១៨ ខែមសានេះ ប្រជាពលរដ្ឋបានសម្តែងការអបអរសា ទរ និង រីករាយយ៉ាងខ្លាំង និងបានថ្លែងអំណរគុណចំពោះសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ដែលបានសម្រេចកាត់ដីជូនពួកគាត់ ដើម្បីបានរស់នៅ និងប្រកបរបររកស៊ីចិញ្ចឹមជីវិតប្រចាំថ្ងៃ។

សូមបញ្ជាក់ថា ជម្លោះដីធ្លីរវាងប្រជាពលរដ្ឋនៅសង្កាត់ស្លក្រាម ជាមួយអាជ្ញាធរអប្សរានេះ បានកើតមានជាច្រើនឆ្នាំ មកហើយ រហូតមានផ្ទុះអំពើហិង្សាថែមទៀតផង តែមិនទទួលបានដំណោះស្រាយណាមួយពីអាជ្ញាធរពាក់ព័ន្ធនោះ ទេ។

ជម្លោះទាំងអស់នេះ ត្រូវបានបញ្ចប់ទាំងស្រុងក្នុងជំនួបដោយផ្ទាល់រវាងសម្តេចតេជោ ហ៊ុន សែន ជាមួយប្រជាពល រដ្ឋមានជម្លោះ និងអាជ្ញាធរពាក់ព័ន្ធនៅមូលដ្ឋាន កាលពីថ្ងៃទី១៣ ខែមេសា ឆ្នាំ២០១៥កន្លងទៅ ក្នុងឱកាសចូលរួម ព្រឹត្តិការណ៍អង្គរសង្រ្កាន្ត។

នៅក្នុងឱកាស នៃការអញ្ជើញចូលរួមដោះស្រាយជម្លោះដីធ្លី ដោយផ្ទាល់ចាប់តាំងពីម៉ោង៥ល្ងាច ដល់ ៩យប់នោះ សម្តេចតេជោ ហ៊ុន សែន បានតាមដានស្តាប់ដោយយកចិត្តទុកដាក់បំផុត ពីការលើកឡើងរបស់ប្រជាពលរដ្ឋ ប្រធានភូមិ គណៈអភិបាលខេត្ត ប្រធានការិយាល័យសុរិយោដីខេត្តសៀមរាប។

សម្តេចតេជោនាយករដ្ឋមន្រ្តីបានដាក់បទបញ្ជាដោយផ្ទាល់មាត់ជូនគណៈអភិបាលខេត្តសៀមរាប លោកប្រធាន ការិយាល័យសុរិយោដីខេត្តត្រូវធ្វើការងារដ៏មានសារៈសំខាន់ជាអាយុជីវិតរបស់ប្រជាពលរដ្ឋនេះ ឱ្យបានហ្មត់ចត់ បំផុត ជាមួយថ្នាក់ដឹកនាំអាជ្ញាធរអប្សរា ដើម្បីកាត់បែងចែកដីទំនាស់ជូនប្រជាពលរដ្ឋប្រើប្រាស់ជាកម្មសិទ្ធិផ្ទាល់ខ្លួន ឱ្យបានត្រឹមត្រូវ។

សម្តេចតេជោ ក៏បានបញ្ជាក់ផងដែរថា បន្ទាប់ពីការកាត់ដីទំនាស់ពីអាជ្ញាធរអប្សរាជូនប្រជាពលរដ្ឋហើយ សម្តេច នឹងស្ថាបនាផ្លូវបេតុងមានទទឹងជាង ១០ម៉ែត្រ បណ្តោយប្រវែង ២.៥០០ម៉ែត្រ ចាប់ផ្តើមពីចំណុចផ្លូវកៅស៊ូ មាត់ ស្ទឹងជាប់របងវត្តឥន្ទកោសីរហូតទៅភ្ជាប់នឹងផ្លូវ៦០៕

នគរបាល ខេត្តព្រះសីហនុ ឃាត់ខ្លួនចោរលួច ទ្រព្យសម្បត្តិ របស់ភ្ញៀវ នៅឆ្នេរអូរឈើទាល ៦នាក់

E-mail Print PDF

ព្រះសីហនុ ៖ កម្លាំងនគរបាល ខេត្តព្រះសីហនុ បានធ្វើការស្រាវជ្រាវ រហូតឈានទៅ ដល់ការឃាត់ខ្លួន ជនសង្ស័យចំនួន៦នាក់ ក្នុងនោះ មានទាំងអនីតិជន ជាប់ពាក់ព័ន្ធ និងសកម្មភាព លួចទ្រព្យ សម្បត្តិ របស់ប្រជាពលរដ្ឋ នៅតំបន់ឆ្នេរអូរឈើទាល កាលពីល្ងាចថ្ងៃទី១៧ ខែមេសា ឆ្នាំ២០១៥។

ការស្រាវជ្រាវ តាមចាប់ខ្លួន ជនសង្ស័យ ទាំងនេះ បានធ្វើឡើងក្រោយ ពីមានពាក្យបណ្តឹង របស់ប្រជាពលរដ្ឋ ជុំវិញការ បាត់បង់សម្ភារ នៅឆ្នេរអូរឈើទាល កាលពីថ្ងៃទី១៦ ខែ មេសា ឆ្នាំ២០១៥។

មន្រ្តីនគរបាលព្រហ្មទណ្ឌ ខេត្តព្រះសីហនុ បានបញ្ជាក់ថា ក្រោយទទួលបានពាក្យ របស់ប្រជាពលរដ្ឋ ជុំវិញការបាត់ ទ្រព្យ និងសម្ភារ ខណៈកំពុងលេងទឹកសមុទ្រ នៅឆ្នេរអូរឈើទាល នោះ ស្នងការនគរបាលខេត្ត លោកឧត្តម សេនីយ៍ ជួន ណរិន្ទ បានបញ្ជាឲ្យ នគរបាលជំនាញ និងនគរបាល មូលដ្ឋាន ចុះទៅធ្វើការស្រាវជ្រាវ ជាបន្ទាន់ រហូតចាប់បាន ជនសង្ស័យទាំង៦នាក់ តែម្តង។

បើតាមមន្រ្តីនគរបាល មុខសញ្ញា សង្ស័យទាំង៦នាក់ រួមមាន  ទី១-ឈ្មោះ ប្រុស ដារី ភេទស្រី អាយុ១៦ឆ្នាំ ទី២-ឈ្មោះ ម៉ៅ រី ភេទស្រី អាយុ១៥ឆ្នាំ ទី៣-ឈ្មោះ សេង ជួច ភេទស្រី អាយុ១៣ឆ្នាំ ទី៤-ឈ្មោះ ហង្ស ស្រីនិច ភេទស្រី អាយុ១៣ឆ្នាំ ទី៥-ឈ្មោះ ទី ធីតា ភេទស្រី អាយុ១៣ឆ្នាំ និងទី៦-ឈ្មោះ ស្វាយ ថន ភេទស្រី អាយុ៤៧ឆ្នាំ ជាអ្នកទួលផលចោរកម្ម។

ក្រោយការចាប់ខ្លួន មុខសញ្ញាទាំងនេះ សមត្ថកិច្ច បានដកហូត វត្ថុតាង រួមមាន៖ កាបូបយួរដៃពណ៌ក្រហម ចំនួន០១ កូនសោរ រថយន្ត ចំនួន០១,ទូរស័ព្ទ ចំនួន០១គ្រឿង និងលុយចំនួន៥០$។

ប៉ុន្តែ ដោយពិនិត្យលើនីតិវិធី ក្នុងការអនុវត្តជំនាញ លោកឧត្តម សេនីយ៍ ស្នងការនគរបាលខេត្ត បានពិភាក្សារជាមួយ នឹងស្ថាប័ន តុលាការ ហើយក៏សំរេចឃាត់ខ្លួន មុខសញ្ញាសង្ស័យចំនួន៣នាក់ ដើម្បីបញ្ជូន ទៅសាលាដំបូង ដើម្បីចាត់ការតាមនីតិវិធីមានឈ្មោះ ទី១-ឈ្មោះ  ប្រុស ដារី ទី២- ឈ្មោះ ម៉ៅ  រី និងទី៣- ឈ្មោះ ស្វាយ ថន ។

ចំពោះជនសង្ស័យចំនួន៣នាក់ ជាអនីតិជន សមត្ថកិច្ច ប្រគល់ អោយអណាព្យាបាល ធ្វើកាអប់រំកែប្រែ រីឯសម្ភារ និងវត្ថុតាង ប្រគល់អោយជនរងគ្រោះវិញ៕

ហៅមិត្តភ័ក្រ្តមកផឹកស៊ីនៅផ្ទះ កើតជម្លោះបាញ់គំរាមផ្លាតគ្រាប់ចំកូនស្រីខ្លួនឯង អាយុ៦ឆ្នាំស្លាប់, រត់គេចបាន២ម៉ោង PM ក្រុងភ្នំពេញចាប់បានវិញ

E-mail Print PDF

(ភ្នំពេញ)៖ បុរសម្នាក់ និងក្រុមគ្រួសារទាំងមូលកំពុងមានទុក្ខ យ៉ាងក្រៀមក្រំជាទីបំផុត និងមានវិប្បដិសេរីអស់មួយជីវិត ដោយសារតែកូនស្រី ជាទីស្រឡាញ់របស់ខ្លួនអាយុ៦ឆ្នាំ ត្រូវបានមិត្តភ័ក្រ្តដកកាំភ្លើងបាញ់ផ្លាតចំស្លាប់ នៅពេលដែលកំពុងផឹកស៊ីនៅក្នុងផ្ទះ ខណៈជនបង្កមានផ្ទុះជម្លោះជាមួយសង្សារបស់ខ្លួន។ ហេតុការណ៍ដ៏គួរឲ្យរន្ធត់ខាងលើនេះ បាន កើតឡើង កាលពីវេលាម៉ោងប្រមាណ៤៖៣០នាទី រសៀលថ្ងៃទី១៧ ខែមេសា ឆ្នាំ២០១៥ ស្ថិតនៅសង្កាត់កាកាប ខណ្ឌពោធិ៍សែនជ័យ ។

អធិការនគរបាល ខណ្ឌពោធិ៍សែនជ័យ លោក យឹម សារ៉ាន់ បានថ្លែងថា មុនពេលកើតហេតុម្តាយក្មេងស្រីបាត់បង់ជីវិត បានហៅមិត្តភ័ក្រ្តរបស់ខ្លួន ដែលជាជនបង្ក មកផឹកស៊ីនៅផ្ទះក្នុងន័យរាប់អានគ្នា។ ពេលនោះជនបង្កក៏បានមកជាមួយសង្សារបស់ខ្លួនផងដែរ ។

លោក យឹម សារ៉ាន់ អធិការបានបន្តទៀតថា លុះពេលកំពុងផឹកស៊ី បានប្រហែលជា១ម៉ោង ស្រាប់តែជនបង្កមានជម្លោះជាមួយសង្សា ក៏ដកកាំភ្លើងខ្លី បាញ់គំរាមមួយគ្រាប់ តែ សំណាងអាក្រក់ គ្រាប់កាំភ្លើងនោះក៏ផ្លាតត្រូវ ក្មេងស្រីរងគ្រោះបណ្តាលឲ្យស្លាប់ភ្លាមៗ នៅកន្លែងកើតហេតុតែម្តង។ ក្រោយកើតហេតុជនបង្កបានរត់គេចខ្លួន បាត់ស្រមោល ខណៈកម្លាំងនគរបាលរបស់លោកបាននិង កំពុងធ្វើការស្រាវជ្រាវតាមចាប់។ លោក យឹម សារ៉ាន់ បានបញ្ជាក់ថា ក្មេងស្រីរងគ្រោះមានឈ្មោះ ហ៊ឹម វណ្ណនីទៀង។

ក្រោយកើតហេតុបានរយៈពេល២ម៉ោង កម្លាំងកងរាជអាវុធហត្ថរាជធានីភ្នំពេញ បានចាប់ឃាត់ខ្លួនជនសង្ស័យ ហើយបាននឹងកំពុងកសាងសំណុំរឿងបញ្ជូនទៅតុលាការរាជធានីភ្នំពេញ៕

www.freshnewsasia.com

លោក ហ៊ុយ វណ្ណៈ នាយកគ្រប់គ្រង ព័ត៌មាន CNC ត្រូវបានតែងតាំង ជាអនុរដ្ឋលេខាធិការ ក្រសួងមហាផ្ទៃ

E-mail Print PDF

ភ្នំពេញ ៖ លោក ហ៊ុយ វណ្ណៈ ជានាយកគ្រប់គ្រងព័ត៌មាន ទូរទស្សន៍ CNC ត្រូវបាន ប្រមុខរដ្ឋស្តីទី សម្តេចអគ្គមហាធម្មពោធិសាល ជា ស៊ីម ចេញ ព្រះរាជក្រឹត្យ តែងតាំងជា អនុរដ្ឋលេខាធិការ ក្រសួងមហាផ្ទៃ ។

ការចេញ ព្រះរាជក្រឹត្យ ខាងលើនេះ បានធ្វើឡើងតាំងពីថ្ងៃទី១១ ខែមេសា ឆ្នាំ២០១៥ បានបង្ហាញការភ្ញាក់ផ្អើល យ៉ាងខ្លាំង និងមិនចង់ជឿគ្រប់គ្នា ពីសំណាក់ក្រុម អ្នកសារព័ត៌មាន រួមអាជីព និងមន្រ្តីរាជរដ្ឋាភិបាលមួយចំនួន៕

រថយន្តបុកម៉ូតូ នៅលើផ្លូវ ជាតិលេខ៣៣ ស្លាប់ក្មេងស្រី២នាក់ និង របួសធ្ងន់ម្នាក់

E-mail Print PDF

-អភិបាលខេត្ត នាំយកថវិកា និងអំណោយ ឧបត្ថម្ភក្រុមគ្រួសារក្មេងស្រី រងគ្រោះ

កែប ៖ គ្រោះថ្នាក់ចរាចរណ៍មួយ បានកើតឡើង នៅលើផ្លូវជាតិលេខ៣៣ ក្នុងភូមិដំណាក់ចំបក់ សង្កាត់អូរក្រសារ ក្រុងកែប ខេត្តកែប កាលពីវេលាម៉ោង ១០៖៣០នាទី ព្រឹកថ្ងៃទី១៧ ខែមេសា ឆ្នាំ២០១៥ បណ្តាលឲ្យក្មេងស្រី២នាក់ បានស្លាប់ និងម្នាក់ទៀងរងរបួសធ្ងន់ ។

គ្រោះថ្នាក់ចរាចរណ៍ខាងលើនេះ បាន កើតឡើង ដោយសារតែ រថយន្តមួយគ្រឿងម៉ាក JEEP ពាក់ស្លាកលេខ OI 6322 បើកបុកក្មេងស្រី៣នាក់ ខណៈកំពុងជិះម៉ូតូC125តាមដងផ្លូវ។

ស្នងការ នគរបាល ខេត្តកែប លោកឧត្តមសេនីយ៍ អ៊ីង សំអុល បានថ្លែងថា ក្រោយ កើតហេតុ អ្នកបើករថយន្ត បានគេចខ្លួន ចោលរថយន្តនៅកន្លែងកើត ហេតុ។

លោកឧត្តមសេនីយ៍ បានបន្តទៀតថា ក្រោយកើតហេតុ ភ្លាមៗ កម្លាំង នគរបាល របស់លោក បានពិនិត្យ នឹងនាំយកវត្ថុតាង ពាក់ព័ន្ធមក រក្សាទុក ដើម្បី ចាត់ការបន្តតាមច្បាប់ ។

ដោយឡែក រសៀលថ្ងៃនេះ លោក កែន សត្ថា អភិបាលខេត្តកែប និងជាប្រធាន សាខាកាកបាទក្រហមខេត្ត បាននាំយក ថវិកា ទៅចូលរួមបុណ្យសពរួមមាន៖  ទី១ លោក ធិន សាហឿន ឪពុកបង្កើត សព ឈ្មោះ ហៀវ សៅរ៍រី អាយុ១៥ឆ្នាំ និងទី២ លោក ខាត់ ទឹម ឪពុកសពឈ្មោះ ថាវ ស្រីលីម អាយុ១៨ឆ្នាំ ។ ទាំងពីរនាក់រស់ នៅភូមិដំណាក់ចំបក់ សង្កាត់ក្រុងកែប ។

តាមមន្រ្តីសាលាខេត្តកែប ជំនួយឧបត្ថម្ភ១គ្រួសារ ទទួលបាន ប្រាក់១.៨០០.០០០រៀល មី ទឹកសុទ្ធ មុង និងសម្ភារមួយចំនួនទៀត៕

ក្មេងស្ទាវ បើកម៉ូតូកៀរគ្នា កើតជម្លោះ បាញ់មួយគ្រាប់ រងរបួសធ្ងន់

E-mail Print PDF

ស្វាយរៀង ៖ យុវជនម្នាក់ បានរងរបួសធ្ងន់ ដោយភាគីម្ខាងទៀត ជាក្មេងស្ទាវ ដូចគ្នា បាញ់ប្រហារមួយគ្រាប់ កាលពីវេម៉ោង ៥៖៣០នាទី ល្ងាចថ្ងៃទី១៧ ខែមេសា ឆ្នាំ២០១៥ ស្ថិតនៅជិត ស្ពានអូរស្មាច់ ក្រុងស្វាយរៀង ខេត្តស្វាយរៀង ដែលការបាញ់ ប្រហារខាងលើនេះ បណ្តាលមកពី បើកម៉ូតូកៀរគ្នា ។

លោក កុយ សុភាព នាយការិយាល័យ ព្រហ្មទណ្ឌកំរិតធ្ងន់ ខេត្តស្វាយរៀង បានថ្លែងឲ្យដឹងថា មុនពេលកើតហេតុ ជនរងគ្រោះ និង ជនបង្ក បានបើកម៉ូតូ ដើរលេង ស្រាប់តែ បើកដល់ចំណុចស្ពានអូរស្មាច់ ក៏មានជម្លោះ រហូតមានការផ្ទុះអាវុធតែម្តង។

លោកបានបន្តទៀតថា ក្រោយកើតហេតុ ជនបង្ក បានបើកម៉ូតូរត់គេចខ្លួនបាត់ ខណៈសមត្ថកិច្ច កំពុងធ្វើការស្រាវជ្រាវ តាមចាប់៕

៣ថ្ងៃចូលឆ្នាំ ខេត្តកំពត ទទួលបានភ្ញៀវទេសចរ ជាង ៧ម៉ឺននាក់

E-mail Print PDF

កំពត៖ ៣ថ្ងៃ នៃពិធីបុណ្យចូលឆ្នាំថ្មីប្រពៃណីរបស់ខ្មែរ ចាប់ពីថ្ងៃទី១៤ ដល់ ១៦ ខែមេសា ឆ្នាំ២០១៥នេះ ខេត្ត កំពត ទទួលបានភ្ញៀវទេសចរជាតិ និងអន្តរជាតិ ជាង ៧ម៉ឺននាក់។

លោក សយ ស៊ីណុល ប្រធានមន្ទរទេសចរណ៍ខេត្តកំពត បានប្រាប់ឲ្យមជ្ឈមណ្ឌលព័ត៌មានដើមអម្ពិលឲ្យដឹងថា អំឡុងពេលបុណ្យចូលឆ្នាំថ្មីនេះ ភ្ញៀវជាតិ និង អន្តរជាតិ បានទៅធ្វើដំណើរកម្សាន្តនៅបណ្តារមណីយដ្ឋាននានា ក្នុងខេត្តកំពត មានការកើនឡើងច្រើន បើធៀបនឹងឆ្នាំ២០១៤កន្លងទៅ។

បើតាមលោក សយ ស៊ីណុល ភ្ញៀវជាតិ មានចំនួន ៧៣.៦៣១នាក់ កើនឡើង ២,៤៣ភាគរយ និងភ្ញៀវអន្តរជាតិ មានចំនួន ២.២៩៨នាក់ កើនឡើង ៧,៧៣ភាគរយ៕

រយៈពេល៥ថ្ងៃ បុណ្យចូលឆ្នាំ គ្រោះថ្នាក់ចរាចរណ៍ នៅខេត្តរតនគិរី មាន៤ករណី ស្លាប់មនុស្ស៦នាក់

E-mail Print PDF

-កូនប្រុសអភិបាលរងខេត្ត លោក លី វិន្ទ បើករថយន្តបុកគេស្លាប់ និងរបួស ៣នាក់

រតនគិរីៈ ក្នុងរយៈពេល៥ថ្ងៃ(១៣ ដល់១៧ ខែមេសា )  នៃពិធីបុណ្យ ចូលឆ្នាំខែ្មរប្រពៃណីជាតិ គេសង្កេតឃើញថា គ្រោះថ្នាក់ ចរាចរណ៍ បានកើតឡើង ជាច្រើនករណី ដែលធ្វើឲ្យមនុស្សស្លាប់ និងរបួសជាច្រើននាក់។ យោងតាម របាយការណ៍ នគរបាលចរាចរណ៍ នៃស្នងការនគរបាល ខេត្តរតនគិរី បានឲ្យដឹងថា រយៈពេល៥ថ្ងៃគឺចាប់ពីថ្ងៃទី១៣ ដល់ថ្ងៃទី១៧ ខែមេសា  នៃពិធីបុណ្យ ចូលឆ្នាំប្រពៃណីជាតិ គ្រោះថ្នាក់ចរាចរណ៍ ចំនួន៥លើកស្មើរ នឹង៤ករណី។ 

ករណីទី១ ម៉ូតូដួលតែឯង ករណីទី២ រថយន្តតូចបុកក្មេង ករណីទី៣ ម៉ូតូបុកម៉ូតូ ករណីទី៤ រថយន្តបុកម៉ូតូ។ របាយការណ៍ ខាងលើ បញ្ជាក់ឲ្យដឹងថា ការខូចខាត និងបាត់បង់ដោយស្លាប់ មនុស្សចំនួន៦នាក់ ក្នុងនោះក្មេង ស្រី២នាក់ ។ រងរបួសធ្ងន់ចំនួន៧នាក់ ក្នុងនោះស្រី២នាក់ និងរបួសស្រាល៨នាក់ ក្នុងនោះស្រី៣នាក់។ ខូចខាតម៉ូតូចំនួន៤គ្រឿង និងរថយន្តចំនួន២គ្រឿង។  លោកវរសេនីយ៍ទោ មឿង សារិទ្ធ នាយការិយាល័យ ចរាចរណ៍ នៃស្នងការនគរបាល ខេត្តរតនគិរី ប្រាប់ឲ្យដឹងថា បើប្រៀបធៀប និងពិធីបុណ្យចូលឆ្នាំខ្មែរ ប្រពៃណីជាតិ ឆ្នាំ២០១៤ ករណីគ្រោះចរាចរណ៍មានការថយចុះ។ 

ជាមួយគ្នានេះដែរ ប្រជាពលរដ្ឋ នៅខេត្តរតនគិរី មានមតិលើកឡើងស្រដៀងគ្នាថា ពួកគាត់សង្កេតឃើញថា នគរបាលចរាចរណ៍ នៃស្នងការនគរបាលខេត្ត រឹតបណ្តឹងចំពោះតែ ពលរដ្ឋក្រីក្រ ជាពិសេសបងប្អូន ជនជាតិមកផាក ពិន័យយ៉ាងធ្ងន់ធ្ងរ តែសម្រាប់អ្នកមានលុយ មានអំណាច ហាក់បីដូចជា មើលរំលងដោយពួកគាត់ យករថយន្តស៊េរីទំនើបៗ ដូចជា រថយន្តធុនត្រា ឡង់គ្រីស័រ លុច្សស៊ីស និងរថយន្តបាឡែន ជាដើម ដែលភាគច្រើនគ្មានពន្ធ ដោយរូបភាព បិទកញ្ចក់ខ្មៅ គ្មានពាក់ស្លាកលេខ ជាមធ្យោបាយ ដឹកជញ្ជូនឈើ ប៉ុន្តែមិនដែលឃើញនគរបាលចរាចរណ៍ ចាប់យកមកធ្វើការផាកពិន័យតាមច្បាប់នោះទេ។

 គេរងចាំមើលករណី កូនប្រុសលោក លី វិន្ទ អភិបាលរងខេត្តបើករថយន្តម៉ាកFordពណ៌ទឹកប្រាក់ ពាក់ស្លាកលេខភ្នំពេញ2X7793 កាលពីរសៀល ថ្ងៃទី១៥ ខែមេសា បានបុកម៉ូតូមួយគ្រឿង បណ្តាលឲ្យក្មេងស្រីម្នាក់ស្លាប់ និងរបួសធ្ងន់ ស្រាល២នាក់ ខណៈពេលក្មេងស្រី ជិះម៉ូតូ៣នាក់មានទិសដៅពីលិច-កើតត្រង់ចំណុចមុខសណ្ឋាគារ ភ្នំស្វាយ ស្ថិតក្នុង ភូមិភ្នំស្វាយ សង្កាត់បឹង កន្សែង ក្រុងបានលុង បម្រុងបត់ស្តាំ ចូលផ្ទះ ហើយ ក្នុងហេតុការណ៍នេះ លោក លី វិន្ទ អង្គុយអែបក្នុង រថយន្តនោះដែរ។ ក្រៅពីសំណងដល់ក្រុមគ្រួសារ ជនរងគ្រោះនោះ តើនគរបាលចរាចរណ៍ នៃស្នងការនគរបាល ខេត្តកសាងសំណុំរឿង បញ្ជូនខ្លួនអ្នកបើករថយន្តទៅតុលាការដែរទេ?៕

តុលាការសម្រេច ឃុំខ្លួន ឧកញ៉ា ថោង សារ៉ាត់ នៅពន្ធនាគារព្រៃសរ (មានវីឌីអូ)

E-mail Print PDF

ភ្នំពេញ៖ ឧកញ៉ា ថោង សារ៉ាត់ ជនសង្ស័យជាមេខ្លោងបាញ់ ប្រហារឧកញ៉ា អ៊ឹង ម៉េងជឺ ដ៏រំជើបរំជួលក្នុងរាជធានីភ្នំ ពេញកាលពីចុងឆ្នាំ២០១៤ ត្រូវបានតុលាការសម្រេចបញ្ជូនខ្លួនទៅកាន់ពន្ធនាគារព្រៃសរហើយ នៅម៉ោង ៥ និង ២០នាទីល្ងាចថ្ងៃទី១៧ ខែមេសា ឆ្នាំ២០១៥នេះ ដោយចោទប្រកាន់ពីបទ ផ្តួចផ្តើមគំនិតក្នុងអំពើឃាតកម្មគិតទុក ជាមុន និងប្រើប្រាស់អាវុធដោយគ្មានការអនុញ្ញាត។

លោក ថោង សារ៉ាត់ ជនសង្ស័យជាមេខ្លោងនៃអំពើឃាតកម្មបាញ់សម្លាប់ឧកញ៉ា អ៊ឹង ម៉េងជឺ បន្ទាប់ពីព្យាយាមរត់ គេចខ្លួនអស់ជាច្រើនខែ ត្រូវបានកម្លាំងនគរបាលនាយកដ្ឋានសន្តិសុខផ្ទៃក្នុងក្រសួងមហាផ្ទៃ សហការជាមួយនគរ បាលវៀតណាម ចាប់ខ្លួននៅប្រទេសវៀតណាម និងបាននាំខ្លួនមកកម្ពុជា កាលពីយប់ថ្ងៃទី១៦ ខែមេសា ឆ្នាំ២០ ១៥នេះ។

សូមបញ្ជាក់ថា លោកឧកញ៉ា អ៊ឹង ម៉េងជឺ ប្រធានក្រុមហ៊ុនស៊ីម៉ង់ត៍ ថៅកែហាងលក់ពេជ្រ និងរកស៊ីជួញដូរដីខ្ទង់់ លានដុល្លារ ត្រូវបានឃាតក និងបក្ខពួកពីរនាក់ ជិះម៉ូតូបាញ់សម្លាប់នៅកណ្ដាលរាជធានីភ្នំពេញ ជាប់ហាងលក់ ផ្លែឈើមួយកន្លែងជិតរបងស្ដាតអូរឡាំពិក សង្កាត់ទួលស្វាយព្រៃទី២ ខណ្ឌចំការមន កាលពីថ្ងៃទី ២២ ខែវិច្ឆិកា ឆ្នាំ២០១៤។ សមត្ថកិច្ច បានដាក់ការសង្ស័យជុំវិញឃាតកម្មនេះថា គឺជារឿងគំនុំក្នុងមុខជំនួញ។

ក្រោយឃាតកម្មនេះ រយៈពេលប្រមាណ ១០ថ្ងៃ កម្លាំងសមត្ថកិច្ច បានឃាត់ខ្លួនអង្គរក្សរបស់លោក ថោង សារ៉ាត់ ចំនួន ៤នាក់រួមមាន៖ រួមមានទី១. ឈ្មោះ សៀង វាសនា អាយុ៤៤ឆ្នាំ រស់នៅផ្លូវលំ ភូមិភ្នៀត សង្កាត់ស្ទឹងមាន ជ័យ ខណ្ឌមានជ័យ ជាជនដៃដល់បាញ់សម្លាប់ឧកញ៉ាអ៊ឹង ម៉េងជឺ ហើយជននេះ មានតួនាទីជាអង្គរក្សការពារផ្ទាល់ ឧកញ៉ា ថោង សារ៉ាត់តែម្ដង, ទី២. ឈ្មោះ លី សៅ ហៅវី ជាជនជាតិវៀតណាម គឺជាអ្នកបើកម៉ូតូឌុបសៀង វាស នា ពេលធ្វើសកម្មភាព, ទី៣. ឈ្មោះ មាស សម្បត្ដិ និងទី៤. ឈ្មោះ កុយ ចាន់ថុល ជាអ្នកជិះម៉ូតូបិទគូទជាអ្នក ពិនិត្យមើលស្ថានភាពជាក់ស្ដែងនៅកន្លែង កើតហេតុ។

អង្គរក្សទាំង៤រូប ត្រូវបានតុលាការចោទប្រកាន់ពីបទឃាតកម្មគិតទុកជាមុន ប៉ុន្តែមិនទាន់ការប្រកាសសាលដីកា ផ្តន្ទាទោសយ៉ាងណានៅឡើយទេ។ ប៉ុន្តែបើតាមមាត្រា២០០ នៃក្រមព្រហ្មទណ្ឌ អង្គរក្សទាំង ៤រូប អាចនឹងត្រូវ ផ្តន្ទាទោសអស់មួយជីវិត។

ក្រោយការឃាត់ខ្លួន អង្គរក្សលោក ថោង សារ៉ាត់ បានសារភាព និងរៀបរាប់យ៉ាងលំអិត ជុំវិញគម្រោងសម្លាប់ ឧក ញ៉ា អ៊ឹង ម៉េងជឺ។ តាមចម្លើយសារភាព ពួកគេបានបញ្ជាក់ថា កាលពីថ្ងៃទី២០ ខែវិច្ឆិកា ឆ្នាំ២០១៤ ឧកញ៉ាថោង សារ៉ាត់ បានបញ្ជាពួកគេទាំង ៤នាក់ទៅសម្លាប់ឧកញ៉ាអ៊ឹង ម៉េងជឺ ដោយសន្យាផ្ដល់ផ្ទះម្នាក់មួយល្វែង និង លុយ មួយចំនួនទៀត។ ពេលនោះអង្គរក្សទាំង៤ នាក់បាន យល់ព្រមហើយឈ្មោះ លី សៅ បាននាំបក្ខពួកទាំង ៣នាក់ ទៅមើលគោលដៅនៅហាងលក់ពេជ្រហុងកុង របស់ជនរងគ្រោះ នៅក្បែរផ្សារទំនើបសូរិយា។ ក្រោយពីជនរង គ្រោះបើករថយន្ដម៉ាកលុច្សស៊ីស៥៧០ ពណ៌គ្រាប់អម្ពិល ទៅដល់មុខហាង ពួកគេ ទាំង៤នាក់ ក្រោយពីឃើញ ជាក់ស្ដែងក៏ត្រឡប់ ទៅផ្ទះមេរបស់ពួកគេវិញ នៅសង្កាត់ចាក់ អង្រែក្រោម ។

អង្គរក្សទាំងនេះបាននិយាយទៀតថា លុះដល់វេលាម៉ោងប្រមាណ ៩ព្រឹកថ្ងៃទី២១ ខែ វិច្ឆកា ឆ្នាំ២០១៤ សៀង វាសនា និង លី សៅ ជិះម៉ូតូម៉ាកសេ១២៥ រីឯ មាស សម្បត្ដិ និង កុយ ចាន់ថុល ជិះម៉ូតូវីវ៉ាចេញពីបុរី៩៩៩នៅ សង្កាត់ចាក់អង្រែក្រោម ខណ្ឌមានជ័យ ឆ្ពោះ ទៅកាន់ហាងលក់ពេជ្ររបស់ជនរងគ្រោះ។ ប៉ុន្ដែ ពេលទៅដល់ ហាងលក់ពេជ្រ ពួកគេមិនបានឃើញជនរងគ្រោះនៅទីនោះឡើយ រួច ក៏ត្រឡប់ទៅបុរី ។ លុះដល់ម៉ោង៩ព្រឹកថ្ងៃ ទី២២ ខែវិច្ឆិកា ឆ្នាំ២០១៤ សៀង វាសនា បានជិះម៉ូតូណៃហតតែម្នាក់ឯង ទៅផឹកកាហ្វេ នៅមុខច្រកចូលបុរី៩៩ ៩ រួចស្គេនមេដៃចូល ធ្វើការហើយនាំគ្នាលេងបៀរ ជាមួយបក្ខពួក ទាំង៣នាក់ទៀត ។ មកដល់ម៉ោង១និង៣០ នាទីរសៀលថ្ងៃទី២២ ខែវិច្ឆិកា លី សៅ បាន នាំពួកគេទាំង៣នាក់ចេញទៅស្ថានីយ៍ប្រេង ឥន្ធនៈកាល់តិច នៅទល់ មុខមជ្ឈមណ្ឌល កំសាន្ដ រ៉ក់ ដោយឈ្មោះលី សៅ និយាយថា ឧកញ៉ាអ៊ឹង ម៉េងជឺ ប្រហែលជាធ្វើដំណើរតាមផ្លូវនេះ រួចសៀង វាសនា បានជិះម៉ូតូតែម្នាក់ឯងទៅ ទិញទឹកសុទ្ធផឹកនៅក្រោយស្ថានីយប្រេង ស្រាប់តែឃើញរថយន្ដរបស់ ជនរងគ្រោះជិះចូលផ្ទះលក់គ្រឿងសង្ហារឹមមួយកន្លែងនៅម្ដុំបឹងត្របែកនោះ ។ ប្រហែលកន្លះម៉ោងក្រោយមកទៀត ជនរងគ្រោះ បានបើករថយន្ដត្រឡប់ទៅវិញ រួចហើយសៀង វាសនា បានជិះម៉ូតូតាមពីក្រោយរហូតដល់ ផ្ទះលក់ថ្ម ម៉ាបក្បែរក្រុមហ៊ុនជីពម៉ុង ជិតវត្ដទួលទំពូង ក៏ចូលទៅទីនោះ ។ បន្ទាប់មកសៀង វាសនា បានជិះម៉ូតូត្រឡប់ទៅបុរី ៩៩៩វិញ ដើម្បីនាំឈ្មោះលី សៅ ហើយត្រឡប់ទៅឈប់រង់ចាំមើលសកម្មភាពជនរងគ្រោះទៅទីណាទៀត ដើម្បី មានឱកាសបាញ់សម្លាប់តែម្ដង ។

ជនដៃដល់ទាំងនេះ បានសារភាពទៀត ថា លុះក្រោយមកជនរងគ្រោះបានចេញពីផ្ទះ លក់ថ្មម៉ាបហើយចូលទៅ ផ្សារទំនើបផាកវ៉េ រួចពួកគេបានជិះម៉ូតូបង្ហួស ទៅបុរី៩៩៩សិន រហូតដល់ម៉ោង៤និង៣០នាទីរសៀលថ្ងៃ ពួកគេ ទាំងពីរនាក់ បានជិះម៉ូតូពីរគ្រឿងប្រដាប់ ដោយអាវុធខ្លីពីរដើមឆ្ពោះតម្រង់ទៅហាងលក់ពេជ្ររបស់ជនរងគ្រោះនៅ ក្បែរផ្សារធំថ្មី ។ រហូតដល់យប់ថ្ងៃដដែលនោះ ជនរង គ្រោះបានបើករថយន្ដតែម្នាក់ឯង ចេញពី ហាងលក់ពេជ្រ ឆ្ពោះមកតាមផ្លូវហ្សាលដឺ ហ្គោល ហើយពេលឈប់រថយន្ដចូលទិញផ្លែ ឈើ ពួកគេទាំងពីរនាក់ មានឱកាសល្អនៅ ពេលនោះ ក៏ធ្វើសកម្មភាពឱ្យលី សៅ ឈប់ ម៉ូតូ ដោយឡែកសៀង វាសនា លោតពីលើ ម៉ូតូទៅបាញ់ជនរងគ្រោះ រហូតដល់ស្លាប់មុន ពេលបើកម៉ូតូគេចខ្លួន ខណៈដែលមាស សម្បត្ដិ និងកុយ ចាន់ថុល ជាអ្នកជិះម៉ូតូបិទគូទ តាម ក្រោយ។

សំណុំរឿងឃាតកម្មឧកញ៉ា អ៊ឹង ម៉េងជឺ ឪពុកម្តាយរបស់លោក ថោង សារ៉ាត់ គឺលោក ថោង ចំរើន និង អ្នកស្រី កែវ សារី ក៏ត្រូវបានតុលារឃុំខ្លួននៅពន្ធនាគារព្រៃសផងដែរ ដោយជាប់ចោទពីការប្រើប្រាស់ និងលាក់ទុក្ខអាវុធ ខុសច្បាប់។ សំណុំឃាតកម្ម ដ៏កក្រើករាជធានីភ្នំពេញនាចុងឆ្នាំ២០១៤មួយនេះ ក៏ត្រូវបាននាយករដ្ឋមន្រ្តីកម្ពុជា សម្តេចតេជោ ហ៊ុន សែន បញ្ជាឲ្យបង្កើតគណៈកម្មការស៊ើបអង្កេតទៅលើសំណុំរឿងមួយនេះ កាលពីខែកុម្ភៈ ឆ្នាំ ២០១៥នេះ៕

បុណ្យចូលឆ្នាំ៣ថ្ងៃ គ្រោះថ្នាក់ចរាចរ ឆក់យកជីវិតមនុស្ស ៣៧នាក់ របួសធ្ងន់ស្រាល ២៤៨នាក់

E-mail Print PDF

ភ្នំពេញ៖ ក្នុងឱកាសបុណ្យចូលឆ្នាំថ្មីប្រពៃណីខ្មែររយៈពេល ៣ថ្ងៃកន្លងទៅ (១៤-១៦ ខែមេសា) គ្រោះថ្នាក់ចរាចរ លើដងវិថី បានផ្តាច់ជីវិតមនុស្ស ៣៧នាក់ និងរងរបួសធ្ងន់ស្រាល ២៤៨នាក់។ នេះបើយោងតាម របាយការណ៍ របស់អគ្គស្នងការដ្ឋាននគរបាលជាតិ។

យោងតាមរបាយការណ៍ ដែលចេញផ្សាយនៅថ្ងៃទី១៧ ខែមេសា បានឲ្យដឹងថា រយៈពេល ៣ថ្ងៃនេះ គ្រោះថ្នាក់ បានកើតឡើងចំនួន ១៣២ករណី បណ្តាលឲ្យមនុស្សស្លាប់ ៣៧នាក់ មានស្រី ៩នាក់ និងបណ្តាលឲ្យរបួសធ្ងន់ ស្រាល ២៤៨នាក់ ក្នុងនោះធ្ងន់ ១៤១នាក់ ស្រាល ១០៧នាក់។

របាយការណ៍បន្តថា គ្រោះថ្នាក់ចរាចរ ១៣២ករណីនេះ បង្កឲ្យខូចខាតយានយន្តសរុបជិត ២០០គ្រឿង ក្នុងនោះ មានម៉ូតូជាង ១៥៧គ្រឿង រថយន្តធុនតូច និងធំ ជិត៤០គ្រឿង ព្រមទាំងយានយន្តផ្សេងទៀត។ មូលហេតុ ដែល បណ្តាលឲ្យមានគ្រោះថ្នាក់ចរាចរកើតឡើងមកពីការបើកលើសល្បឿនកំណត់ បើកបរក្នុងស្ថានភាពស្រវឹង បើកបរ ប្រជែងគ្នា មិនគោរពសិទ្ធគ្នាក្នុងពេលបើកបរ ការបត់ខុស មិនប្រកាន់ស្តាំ និងមិនពាក់មួកសុវត្ថិភាពផងដែរ៕

Page 1 of 360

Photo by DAP-NEWS
Photo by DAP-NEWS
Photo by DAP-NEWS
Photo by DAP-NEWS
Photo by DAP-NEWS
Photo by DAP-NEWS
Photo by DAP-NEWS
Photo by DAP-NEWS