aaa

Saturday, Feb 13th

| English Version | dapnews: 012 722 337, 097 9999 883, email: soyvicheth@gmail.com

ឧត្តមសេនីយ៍ឯក មាស ស៊ីផាន នាំយកថវិការមូលនិធិ របស់សម្តេច ស ខេង ផ្តល់ជូនស្ត្រីទើបសម្រាលកូន និងគ្រួសារ មរណៈ ចំនួន ៥០នាក់ នៅឃុំព្រែកជីក

E-mail Print PDF

បាត់ដំបង៖ នាយឧត្តមសេនីយ៍ ម៉ៅ ច័ន្ទដារ៉ា អគ្គនាយក អត្តសញ្ញាណកម្ម នៃក្រសួងមហាផ្ទៃ កាលពីព្រឹកថ្ងៃទី១៣ ខែកុម្ភៈ ឆ្នាំ២០១៦ ម្សិលមិញនេះ បានឲ្យតំណាងរបស់លោក ឧត្តមសេនីយ៍ឯក មាស ស៊ីផាន អគ្គនាយករងអត្តសញ្ញាណកម្ម និងជាប្រធានក្រុមការងារ គណបក្សប្រជាជនកម្ពុជា ឃុំព្រែកជីក ស្រុករុក្ខគីរី ខេត្តបាត់ដំបង និងក្រុមការងារ នាំយកនូវថវិការមូលនិធិ របស់សម្តេច ក្រឡាហោម ស ខេង ផ្តល់ជូនដល់ស្ត្រី ដែលទើបសម្រាលកូន និងគ្រួសារ មរណៈ ចំនួន៥០នាក់ នៅក្នុងភូមិចំនួន៧។

បើតាមឧត្តមសេនីយ៍ឯក មាស ស៊ីផាន បានឲ្យដឹងថាអំណោយ និងថិវកា របស់សម្តេចក្រឡាហោម ស ខេង ដែលផ្តល់ជូននេះ ក្នុងមួយគ្រួសារទទួលបាន ថវិកា ២០ម៉ឺនរៀល ដែលសរុបថវិការទំាងអស់មានចំនួន ១០លានរៀល។

ក្នុងនោះដែរ ឧត្តមសេនីយ៍ឯក មាស ស៊ីផាន ក៏បានពំានំានូវការផ្តាំផ្ញើរសួរសុខទុក្ខ ពីសំណាក់ សម្តេច អគ្គមហាសេនាបតីតេជោ ហ៊ុន សែន និងសម្តេចក្រឡាហោម ស ខេង សម្តេចមានការអបអរសាទ ចំពោះប្រជាពលរដ្ឋ ដែលរស់នៅមានសេក្តីសុខ ជាពិសេសស្ត្រី ដែលទើបនិងបានឆ្លងទន្លេ រួច ពុំមានគ្រោះថ្នាក់ដល់ជីវិត និងសូមឲ្យបងប្អូនទាំងអស់ ខិតខំថែរក្សារសុខភាព ឲ្យបានល្អ ជាពិសេសខិតខំ បង្ករបង្កើនផល ដើម្បីជីវភាពគ្រួសារ។ ទន្ទឹមនោះផងដែរ ឧត្តមសេនីយ៍ឯក មាស ស៊ីផាន បានបញ្ជាក់ថា សម្តេច មានការសោកស្តាយនិង សូមចូលរួមរំលែកទុក្ខយ៉ាងក្រៀមក្រំ ចំពោះ ក្រុមគ្រួសារដែលមរណៈ។

ឧត្តមសេនីយ៍ឯក មាស ស៊ីផាន បានជម្រាបជូនទៅកាន់ប្រជាពលរដ្ឋក្នុងឃុំ ព្រែកជីកថា ក្នុងនាមឯកឧត្តម ជាមន្ត្រីរាជការ គឹមានតួនាទីបម្រើប្រជាពលរដ្ឋទូទៅ ដោយមិនប្រកាន់និន្នាការនយោបាយឡើយ រួមទាំងអំណោយដែលជាមូលនិធិ របស់សម្តេច ក្រឡាហោមផងដែរ មូនិធិសម្តេច ក្រឡាហោម គឺត្រូវឧបត្ថម្ភជូនស្ត្រីសម្រាលកូន និងគ្រួសារមរណៈ ជារៀងរាល់ខែ។ ជាមួយគ្នានោះ លោកឧត្តមសេនីយ៍ឯក ក៏មិនអនុញ្ញាតឲ្យមន្ត្រីណាម្នាក់ ធ្វើបាបប្រជាពលរដ្ឋបានឡើយ ហើយក៏បានប្រាប់ទៅកាន់សមាជិក បក្សឃុំ និងប្រជាពលរដ្ឋ សូមឲ្យរាយការណ៏ជូន ប្រសិនបើមានមន្ត្រីណាម្នាក់ ធ្វើបាបប្រជាពលរដ្ឋ ដោយអយុត្តិធម៏ ដែលធ្វើឲ្យប៉ះពាល់ការគាំទ្ររ ពីសំណាក់ប្រជាពលរដ្ឋ មកលើគណបក្សប្រជាជនកម្ពុជា៕

លួចកាត់ខ្សែក ក្មេងស្រែក ត្រូវឳពុកក្មេង ចាប់ជាប់ប្រគល់ ជូនសមត្ថកិច្ច

E-mail Print PDF

កណ្តាល៖ ជនសង្ស័យម្នាក់ត្រូវបាន ប្រជាពលរដ្ឋចាប់ជាប់ខណៈកំពុងធ្វើសកម្មភាពលួចកាត់ខ្សែក ក្មេងអាយុ ៦ឆ្នាំ ពេលឳពុកពមកមើលកន្លែងជិះសេះហោះ ស្ថិតនៅនៅចំណុចវត្តសុវណ្ណមរកត ភូមិកំពង់ចំលង ឃុំកំពង់ចំលង ស្រុកខ្សាច់កណ្តាល ខេត្តកណ្តាល នៅម៉ោងប្រមាណ ៨៖៣០នាទី យប់ថ្ងៃទី១៣ ខែកុម្ភៈ ឆ្នាម២០១៦នេះ។

មន្រ្តីនគរបាល បានឲ្យដឹងថា ក្មេងប្រុសរងគ្រោះ ឈ្មោះ ចាប ចំណាន អាយុ ៦ឆ្នាំ នៅភូមិកំពង់ចំលង ឃុំកំពង់ចំលង ស្រុកខ្សាច់កណ្តាល ខេត្តកណ្តាល មានឪពុកឈ្មោះ យ៉ាន់ ចាប អាយុ ៤៨ឆ្នាំ និងម្តាយឈ្មោះ សឹង នី អាយុ ៤៥ឆ្នាំ។ ឯជនសង្ស័យ ត្រូវឃាត់ខ្លួនឈ្មោះ ឡុង នឿន ភេទប្រុស អាយុ ២៩ឆ្នាំ មុខរបរ លក់ដូរ មានទីលំនៅភូមិល្វាង ឃុំថ្នល់ដំបង ស្រុកជើងព្រៃ ខេត្តកំពង់ចាម ក្នុងនោះវត្ថុតាងចាប់យក រួមមាន ខ្សែលោហ:ធាតុពណ៌ក្រហម ចំនួន០១, បន្តោង ចំនួន០១ និងកូនកន្ត្រៃដែក ចំនួន០១។

មន្រ្តីនគរបាល បានបន្តទៀតថា នៅម៉ោង៨យប់ ថ្ងៃទី១៣ ខែកុម្ភៈ នេះ លោក យ៉ាន់ ចាប បានជិះម៉ូតូឌុបប្រពន្ធឈ្មោះ សឹង នី និងកូនប្រុស ចាប ចំណាន ចេញពីផ្ទះមកមើលល្ខោនបាសាក់ នៅក្នុងវត្តសុវណ្ណមរកត ពេលមកដល់ លោក យ៉ាន់ ចាប បានពកូនមកមើលកន្លែងជិះសេះហោះ លុះដល់វេលាម៉ោង ២០៖៣០នាទី ក្មេងប្រុស ចាប ចំណាន ដែលមានអាយុ៦ឆ្នាំ បានស្រែកប្រាប់ឳពុកខ្លួនថា មានចោលលួចកាត់ខ្សែក។

មន្រ្តីនគរបាល បានបញ្ជាក់ទៀតថា ក្រោយពីឮសំឡេងស្រែក លោក យ៉ាន់ ចាប ត្រូវជាក៏ស្ទុះចាប់ជនល្មើស ជនសង្ស័យ ឡុង នឿន បន្ទាប់បានរកឃើញខ្សែក និងកូនកន្ត្រៃដែក នៅលើដីក្រោមជើង ក្រោយមកបានប្រគល់ជូនសមត្ថកិច្ច នគរបាលប៉ុស្តិ៍ កំពង់ចំលង និងដើម្បីចាត់ការតាមនីតិវិធីច្បាប់៕

ស្លាប់ ៣នាក់ និងរបួស ៩នាក់ ដោយសារគ្រោះថ្នាក់ ចរាចរណ៍ថ្ងៃទី១៣ ខែកុម្ភៈ

E-mail Print PDF

ភ្នំពេញ៖ គ្រោះថ្នាក់ចរាចរណ៍នៅទូទាំងប្រទេស នៅថ្ងៃទី១៣ ខែកុម្ភៈ ឆ្នាំ២០១៦ម្សិលមិញ បណ្ដាលឲ្យមនុស្សចំនួន ៣នាក់ បានស្លាប់បាត់បង់ជីវិត និង៩នាក់ផ្សេងទៀត បានរងរបួសធ្ងន់ និងស្រាល។

យោងតាមនាយករដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការដ្ឋាន នគរបាលជាតិ បានឲ្យដឹងថា គ្រោះថ្នាក់ចរាចរណ៍ ថ្ងៃទី១៣ ខែកុម្ភៈ កើតឡើងចំនួន ៥លើក, ស្លាប់ ៣នាក់, របួសធ្ងន់ ៧នាក់ និងរបួសស្រាល ២នាក់។

បណ្តាលឲ្យខូចខាតម៉ូតូចំនួន ៨គ្រឿង និងយានផ្សេងៗ ១គ្រោះ។ មូលបណ្តាលមកពីបើកបរលឿនចំនួន ១លើក, មិនប្រកាន់ស្តាំ ២លើក, ប្រជែងគ្រោះថ្នាក់ ១លើក និងមិនគោរសិទ្ធិ ១លើក៕

តេជោ សែន និងភរិយា ផ្ញើក្តីស្រឡាញ់ ពីបេះដូងជូនជនរួមជាតិ

E-mail Print PDF

ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅព្រឹកថ្ងៃទី១៤ កុម្ភៈ នេះ រួមនិងភរិយា បានផ្ញើក្តីស្រឡាញ់របស់លោកទំាងពីរ ជូនដល់ជនរួមជាតិខ្មែរ ទូទាំងប្រទេស ក៏ដូចជាបងប្អូនខ្មែរនៅក្រៅប្រទេសផងដែរ។

ក្នុងបណ្តាញទំនាក់ទំនងសង្គមហ្វេសប៊ុក ផ្ទាល់ខ្លួនសម្តេច បានសរសេរថា "ខ្ញុំនិងភរិយា សូមផ្ញើជូននូវក្តីស្រឡាញ់ ពីបេះដូងដល់ជនរួមជាតិ ទូទាំងប្រទេស! ថ្ងៃទី១៤ កុម្ភៈ គឺជាថ្ងៃអបអរសាទរ នៃក្តីស្រឡាញ់ ដែលជាទិវាអន្តរជាតិ ភាសាអង់គ្លេសហៅថា (Valentine’s Day)។ ថ្ងៃនេះយើងចូលរួមបង្ហាញ និងផ្តល់នូវក្តីមេត្តាករុណា និងក្តីស្រឡាញ់ចំពោះខ្លួនយើងផង ចំពោះឪពុកម្តាយ អាណាព្យាបាល ជីដូនជីតា ប្តីប្រពន្ឋ កូនចៅ អុំ ពូម៉ីង មិត្តភ័ក្តិ និងមិត្តរួមអាជីពការងារជាដើម"។ល។

សម្តេចបាន សរសេរទៀតថា "ខ្ញុំសង្ឃឹមថា សេចក្តីស្រឡាញ់ពីមនុស្សម្នាក់ និងចែករំលែកទៅដល់មនុស្ស នៅជុំវិញខ្លួនយើងផង និងដល់មនុស្សជាច្រើន នៅទូទាំងប្រទេស ទន្ទឹមនិងពិភពលោក កំពុងចូលរួមអបអរសាទរ ទិវានៃក្តីស្រឡាញ់នៅថ្ងៃនេះ។ ចំពោះយុវវ័យ គឺមិនត្រូវគិតថា ថ្ងៃនេះ គឺជាថ្ងៃនៃបុណ្យសង្សារតែប៉ុណ្ណោះទេ តែជាថ្ងៃពិសេស ដែលក្មួយៗ មានឱកាសបង្ហាញ នូវក្តីស្រឡាញ់ចំពោះឪពុកម្តាយ ជីដូនជីតា លោកគ្រូ អ្នកគ្រូ និងមនុស្សដែលនៅជុំវិញខ្លួន ព្រោះក្តីស្រឡាញ់ គឺជាសុភមង្គមសម្រាប់មនុស្សគ្រប់រូប ហើយដែលម្នាក់ៗ អាចផ្តល់អោយគ្នា ទៅវិញទៅមកបានគ្រប់ពេលវេលាទាំងអស់"។

សម្តេច បានបញ្ជាក់បន្ថែមថា "ខ្ញុំ និងភរិយាស្រឡាញ់ពលរដ្ឋកម្ពុជា និងយុវជន យុវនារីទូទាំងប្រទេស និងសូមជូនពរបងប្អូន ជនរួមជាតិពោរពេញ ដោយក្តីស្រឡាញ់ និងសុភមង្គលគ្រប់ពេលជានិច្ច"៕

តេជោ សែន ដឹកនាំប្រតិភូ ជាន់ខ្ពស់កម្ពុជា ចេញដំណើរទៅ ចូលរួមកិច្ចប្រជុំ កំពូលពិសេសរវាង អាស៊ាន-សហរដ្ឋអាមេរិក

E-mail Print PDF

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា នាព្រឹកថ្ងៃទី១៤ ខែកុម្ភៈ ឆ្នាំ២០១៦នេះ បាន ដឹកនាំប្រតិភូជាន់ខ្ពស់កម្ពុជា ទៅកាន់ សហរដ្ឋអាមេរិក តាមការអញ្ជើញរបស់ ប្រធានាធិបតីអាមេរិក បារ៉ាក់ អូបាម៉ា (Barack Obama) ដើម្បីចូលរួមកិច្ចប្រជុំ កំពូលពិសេសរវាង អាស៊ាន-សហរដ្ឋអាមេរិក៕

សាលាខណ្ឌ ពោធិ៍សែនជ័យ ប្រារព្វទិវា ដឹងគុណមនុស្សចាស់

E-mail Print PDF

ភ្នំពេញ៖ ដើម្បីឲ្យក្មេងៗជំនាន់ក្រោយចេះប្រតិបត្តិដល់មនុស្សចាស់ឲ្យបានល្អ ធ្វើឲ្យមនុស្សចាស់ទទួលបានភាពកក់ក្តៅ កុលបុត្រកុលធីតា ដែលជាកូនចៅជំនាន់ក្រោយទើបសាលាខណ្ឌពោធិ៍សែនជ័យ បានយកថ្ងៃទី១៣ ខែកុម្ភៈ ឆ្នាំ២០១៦ ជាថ្ងៃបុណ្យនៃសេចក្តីស្រឡាញ់ មកធ្វើជាពិធីប្រារព្វដឹងគុណ ដល់មនុស្សចាស់ និងបានលើកទឹកចិត្តដល់មនុស្សចាស់ ឲ្យចេះតស៊ូ និងចេះរកការងារសម្រាប់មនុស្សចាស់ផងដែរ ពិធីនេះប្រព្រឹត្តទៅ នៅបរិវេណសាលាខណ្ឌពោធិ៍សែនជ័យ។ ដែលមានការចូលរួម ពីមនុស្សចាស់៦៣៥នាក់ ដែលបានអញ្ជើញមកពី សមាគមន៍មនុស្សចាស់ទាំង ១០សង្កាត់ក្នុងខណ្ឌពោធិ៍សែនជ័យ។

នៅក្នុងពិធីនោះលោក ហែម ដារិទ្ធិ អភិបាលខណ្ឌពោធិ៍សែនជ័យ បានមានប្រសាសន៍ថា ថ្ងៃទី១៣ ខែកុម្ភៈ ជាថ្ងៃបុណ្យនៃសេចក្តីស្រលាញ់ ហើយលោកបានយកថ្ងៃនេះធ្វើជាពិធីប្រារព្វដឹងគុណដល់មនុស្សចាស់។ លោកបានបន្តថា ការប្រារព្វពិធី ដឹងគុណដល់មនុស្សចាស់នេះ បន្ទាប់ពីលោកបានឡើងកាន់តំណែង ជាអភិបាលខណ្ឌនៅឆ្នាំ២០១៥ គឺលោក បានប្រារព្វម្តងរួចមកហើយ ដូច្នេះលើកនេះជាលើកទី២ហើយ ដែលលោកបានដឹកនាំមន្ត្រីសាលាខណ្ឌ ប្រារព្វពិធីដឹងគុណដល់មនុស្សចាស់។

លោកបានបន្តថា មនុស្សចាស់ មានសារៈសំខាន់ណាស់ ដូច្នេះយើងជាអ្នកជំនាន់ក្រោយ យើងត្រូវដឹងគុណដល់មនុស្សចាស់ ត្រូចតែប្រារព្វប្រតិបត្តិដល់មនុស្សចាស់ឲ្យបានល្អ ធ្វើយ៉ាងណាឲ្យគាត់ ទទួលបានភាពកក់ក្តៅ យើងជាមនុស្សជំនាន់ក្រោយ ពីព្រោះបើគ្មានពួកគាត់ ក៏មិនមានពួកយើងគ្រប់គ្នានោះដែរ ម្យ៉ាងវិញទៀតការប្រារព្វពិធីដឹងគុណដល់មនុស្សចាស់ នាពេលនេះ គឺចង់ឲ្យក្មេងៗជំនាន់ក្រោយ យកថ្ងៃនេះជាថ្ងៃដឹងគុណដល់មនុស្សចាស់ ហើយចេះគោរពគ្នាទៅវិញទៅមក ហើយសូមឲ្យយុវជនទាំងអស់យកថ្ងៃនេះ តបស្នងសងគុណដល់មនុស្សដែលយើងស្រឡាញ់។

លោកបានបន្ថែមថា ចំពោះមនុស្សចាស់ គឺពួកគាត់ត្រូវការមានការយកចិត្តទុកដាក់ពីក្មេង ប៉ុន្តែលោកយាយលោកតា ឬក៏ពូមីងអស់ត្រូវប្រកបកាងារស្រាលៗ ទៅតាមអ្វីដែលអាចធ្វើបាន ដើម្បីទទួលបានចំណូលបន្ថែម សម្រាប់ទ្រទ្រង់ជីវភាពគ្រួសារបន្ថែម ចុងបញ្ចប់លោកបាន ជូនវត្ថុអនុស្សាវរីយ៍ ដល់មនុស្សចាស់ ដែលចូលរួម ៦៣៥នាក់ ម្នាក់ៗសារុង១ និងថវិការ៥ម៉ឺនរៀលផងដែរ៕

Update៖លទ្ធផងបង្ហាញថា ឃាតករសម្លាប់នារីកាត់ក្បាល មានតែម្នាក់ប៉ុណ្ណោះ នៅសៀមរាប

E-mail Print PDF

សៀមរាប៖ ក្រោយការសួរនាំពីកម្លាំងសមត្ថកិច្ចជំនាញ ទីបំផុតជនសង្ស័យ ចាន់ ឆាយយា បានសារភាពថា ករណីឃាតកម្មនេះ គឺប្រព្រឹត្តតែឯងនោះទេ ពុំមានជនទីបីចូលរួមនោះ ឯម្នាក់ដែលត្រូវឃាត់ខ្លួននៅឧត្តរមានជ័យនោះ គ្រាន់តែខ្លួនឆ្លើយដាក់ដោយសារភ័យពេក។

សូមបញ្ជាក់ថា នៅម៉ោងប្រមាណជិត៧យប់ ថ្ងៃទី១៣ ខែកុម្ភៈ ឆ្នាំ២០១៦ នេះ ជនសង្ស័យ ចាន់ ឆាយយា ត្រូវបានកម្លាំងកងរាជអាវុធហត្ថខេត្តសៀមរាប សហការជាមួយកម្លាំងនគរបាលព្រហ្មទណ្ឌខេត្តសៀមរាប ឃាត់ខ្លួនបាននៅភូមិ ព្រៃចាស់ ឃុំគោកដូង ក្រុងសៀមរាប ខេត្តសៀមរាប ជនសង្ស័យមានមុខរបរជា ហ្គាយថៃ។

ជនសង្ស័យ ចាន់ ឆាយយា បានឆ្លើយថា បានស្គាល់នារីរងគ្រោះ នៅចុងឆ្នាំ២០១០ គ្រាលដែលនាធ្វើការជាសន្តិសុខ ពេលនោះ គាត់បានស្រឡាញ់នារីរងគ្រោះ ប៉ុន្តែត្រូវឳពុកម្តាយនាងបំបែក។ ជនសង្ស័យក៏បានបញ្ជាក់ថា គម្រោងសម្លាប់នារីរងគ្រោះកាត់ក្បាលនេះ ពុំមានពាក់ព័ន្ធនិងអ្នកផ្សេងនោះទេ មនុស្សដែលត្រូវឃាត់ខ្លួននោះ តាមពិតគាត់ចេះតែឆ្លើយដាក់ទៅ ដោយសារភ័យពេក ខណៈក្លាយពេលដែលកម្លាំងសមត្ថកិច្ចឃាត់ខ្លួន។

បើតាមមន្រ្តីកងរាជអាវុធហត្ថ បានឲ្យដឹងថា តាមការឆ្លើយសារភាព ជនសង្ស័យបានរៀបរាប់ថា ខ្លួនខឹងនឹងឳពុកម្តាយ នារីរងគ្រោះ ដែលបានបំបែកខ្លួន ចេញពីនាង ក៏ព្រោះតែម្តាយឳពុកនាង បានដឹងថា គាត់ជាមនុស្សមិនល្អ ខិលខូច ហើយម្យ៉ាងទៀតមានប្រពន្ធកូនថែមទៀត ដូច្នេះក៏បានហាមឃាត់កូនមិនឲ្យស្រឡាញ់ជនសង្ស័យ ខណៈនេះហើយដែលធ្វើឲ្យជនសង្ស័យកើតចិត្តខឹង ហើយគិតថា របស់អ្វីដែលខ្លួនយកមិនបាន អ្នកផ្សេងក៏យកមិនបានដូចគ្នា ហើយឈានដល់ការរៀបចំគម្រោងសម្លាញ់នារីដែលខ្លួនស្រឡាញ់ចោលតែម្តង។

Update សវតារឿង៖ មន្រ្តីកងរាជអាវុធហត្ថខេត្តសៀមរាប បានឲ្យដឹងថា ឃាតករដែលសម្លាប់នារីម្នាក់កាត់ក្បាល នៅក្នុងផ្ទះសំណាក់ប្រាសាទកែវ ត្រូវបានឃាត់ខ្លួននៅម៉ោងជិត៧យប់ថ្ងៃទី១៣ ខែកុម្ភៈនេះ ស្ថិតនៅក្រោយផ្ទះ ស្ថិតនៅភូមិព្រៃចាស់ សង្កាត់ដូង ក្រុងសៀមរាប ពោលជិតព្រលានយន្តហោះ ខណៈដែលជនសង្ស័យរូបនេះ បានព្យាយាមយកក្បាលនារីរងគ្រោះដុតចោល ឯម្នាក់ទៀតត្រូវបានឃាត់ខ្លួននៅខេត្តឧត្តរមានជ័យ។

មន្រ្តីកងរាជអាវុធហត្ថខេត្តសៀមរាប បានឲ្យដឹងថា តាមការសន្និដ្ឋានជំហានដំបូងករណីនេះ គឺកើតចេញពីរឿងស្នេហាត្រីកោណ ហើយឃាតករដែលបានសម្លាប់នារីរងគ្រោះនេះ មានឈ្មោះ ច័ន្ទ ឆៃយ៉ា ហៅសារ៉ាត់ មុខមុខរបរជាអ្នកនាំភ្ញៀវទេសចរណ៍ថៃ គ្រោងការឃាតកម្មនេះ គឺមានផែនការច្បាស់លាស់ និងមានជំនាញថែមទៀតផង។ មុនធ្វើសកម្មភាពសម្លាប់ជនរងគ្រោះ បានណាត់ជួបគ្នាជាមួយនារីរងគ្រោះ ក្នុងបន្ទប់ផ្ទះសំណាក់ ខណៈនេះ ជនសង្ស័យបានវាយចំកណ្តាលដើមទ្រូងនារីរងគ្រោះឲ្យសន្លប់ រួចបានយកខ្សែរិតកឲ្យស្លាប់ បន្ទាប់ក៏បានអារក នារីរងគ្រោះរួចរត់គេចខ្លួនបាត់។

មន្រ្តីកងរាជអាវុធហត្ថ ក៏បានបញ្ជាក់បន្ថែមទៀតថា ដោយឡែកឃាតករម្នាក់ទៀត ត្រូវបានឃាត់ខ្លួននៅក្នុងខេត្តឧត្តរមានជ័យ ហើយពេលនេះកំពុងបញ្ជូនខ្លួនមកកាន់ខេត្តសៀមរាប។

ទីបំផុតឃាតករ សម្លាប់នារីម្នាក់កាត់ក្បាល នៅក្នុងផ្ទះសំណាក់ប្រាសាទកែវ ត្រូវបានកម្លាំងនគរបាលចាប់ខ្លួនបាន ហើយ បន្ទាប់ពីជនសង្ស័យរូបនេះ បានព្យយាមរត់គេចនៅល្ងាចថ្ងៃទី១៣ ខែកុម្ភៈ ឆ្នាំ២០១៦នេះ។

យ៉ាងណាក៏ដោយ មន្រ្តីនគរបាល នៅមិនទាន់បានបញ្ជាក់ច្បាស់លាស់ថា ជនសង្ស័យត្រូវបានឃាត់ខ្លួននៅក្នុងតំបន់ណានោះទេ ប៉ុន្តែមន្រ្តីនគរបាល បានបញ្ជាក់ថា ក្រោយពីធ្វើសកម្មភាពសម្លាប់នារីរងគ្រោះ ដោយកាត់ក្បាល ជនសង្ស័យបានយកក្បាលនារីរងគ្រោះនោះទៅដុតចោល។

សវតារឿង៖ គិតមកត្រឹមម៉ោង ៥ល្ងាថ្ងៃទី១៣ ខែកុម្ភៈ ឆ្នាំ២០១៦នេះ ក្រោយពីបើកការស៊ើបអង្កេត យ៉ាងយកចិត្តទុក ដាក់ពីសំណាក់សមត្ថកិច្ច ខេត្តសៀមរាប សាកសពក្មេងស្រី ដែលគេប្រទះ ឃើញនៅក្នុងបន្ទប់លេខ៣០១ នៃផ្ទះ សំណាក់ប្រាសាទកែវ ត្រូវបានសមត្ថកិច្ចស្គាល់អត្តសញ្ញាណហើយ នារីរងគ្រោះ គឺឈ្មោះ កេង ធីតា អាយុ២៤ឆ្នាំ មានម្តាយឈ្មោះ ឡេង សិលា រស់នៅភូមិបឹងខ្នាត ឃុំខ្នាត ស្រុកពួក ខេត្តសៀមរាប។

បច្ចុប្បន្នសមត្ថកិច្ច កំពុងសួរនាំម្តាយជនរងគ្រោះ និងធ្វើការស្រាវជ្រាវ រកព័ត៌មានបន្ថែម ដើម្បីឈានដល់ការចាប់ខ្លួន ជនដៃដល់ក្នុងរឿង ឃាតកម្មដ៏សាហាវព្រៃផ្សៃនេះ។

គួរបញ្ជាក់ថា កាលពីវេលាម៉ោង១២ ថ្ងៃទី១៣ ខែកុម្ភះ ឆ្នាំ២០១៦នេះ ការភ្ញាក់ផ្អើលពេញខេត្តសៀមរាប ដោយសារតែប្រទះឃើញសាកនារីវ័យជាង២០ឆ្នាំម្នាក់ដេកស្លាប់ក្នុងបន្ទប់៣០១ នៃផ្ទះសំណាក់ប្រាសាទកែវ ផ្លូវផ្សារញ៉ែ ក្នុងភូមិតាភុល សង្កាត់ស្វាយដង្គុំ ក្រុង/ខេត្តសៀមរាប ដែលសពនារីរងគ្រោះត្រូវបានឃាតករសម្លាប់ កាត់ក្បាលយកទៅបាត់ បន្សល់ទុកតែខ្លួនត្រឹមករចុះក្រោមរួចរុំជាមួយភួយពណ៌ផ្កាឈូក ហើយញាត់សពចូល ក្រោមគ្រែ ដល់ម៉ោង១២បុគ្គលិកផ្ទះសំណាក់ខាងលើបានចូលរៀបន្ទប់ក៏ប្រទះឃើញសពតែម្តង។ ពេលនេះសពនារីរងគ្រោះពុំទាន់មានប្រភពណាមួយបញ្ជាក់ថា ការស្លាប់របស់នាងត្រូវបានឃាតករ សម្លាប់ដោយមូលហេតុអ្វីនៅឡើយទេ។ នៅល្ងាចថ្ងៃដដែលនេះក្រោយពិនិត្យរួចរាល់ សមត្ថកិច្ចបានប្រគល់ឲ្យសាច់ញាតិនិងអាណាព្យាបាលមក ទទួលយកទៅធ្វើបុណ្យតាមប្រពៃណីហើយ៕

សង្គ្រាមដណ្តើមប្រេង ចុងក្រោយ បានត្រឹមតែនាំមកនូវគ្រោះមហន្តរាយ

E-mail Print PDF

 

ជាការរួមចំណេះដឹង អំពីបច្ចុប្បន្នភាព នយោបាយ ដែលអត្ថបទ ស្រាវជ្រាវនេះ មិនឆ្លុះបញ្ចាំង នូវគោលគំនិត ឬទស្សនៈ នយោបាយ របស់អ្នកសរសេរ ឡើយ!

វិភាគ៖ តើសម្តេចតេជោ រក្សាទំនាក់ទំនងល្អ ជាមួយចិន ខុស ឬត្រូវ ?

E-mail Print PDF

ភ្នំពេញ៖ តាំងពីអតីតកាលមក ប្រទេសកម្ពុជាមានទំនាក់ទំនងយ៉ាងល្អ និងជិតស្និទ្ធបំផុត ជាមួយសាធារណរដ្ឋប្រជាមានិតចិន ដោយអតីតព្រះមហាវីរក្សត្រ ព្រះករុណា ព្រះបាទ សម្តេចព្រះនរោត្តម សី ហនុ ព្រះបរមរតនកោដ្ឋ ព្រះអង្គទ្រង់បានបង្ហាញនូវព្រះរាជហឫទ័យ គោរពស្រឡាញ់រាប់អានជាមួយចិន ដូចជាបងប្អូនបង្កើត និងជាមហាមិត្តយ៉ាងស្មោះស្ម័គ្រតែមួយគ្មានពីរ។ ការចាត់ទុកនេះ ក៏ព្រោះតែសាធារណរដ្ឋប្រជាមានិតចិន គឺជាប្រទេសតែមួយគត់ ដែលបានជួយជ្រោមជ្រែងប្រទេសកម្ពុជា ក្នុងគ្រាដែលកម្ពុជា បានជួបនូវគ្រោះអាសន្ន។

នៅខែមេសា ឆ្នាំ១៩៥៥ ព្រះបរមរតនកោដ្ឋ សម្តេចព្រះនរោត្តម សី ហនុ បានជួបជាលើកដំបូង ជាមួយលោក ជូ អេនឡាយ នាយករដ្ឋមន្រ្តីនៃប្រទេសចិន នៅទីក្រុងបានឌុង ប្រទេសឥណ្ឌូនេស៊ី ក្នុងឱកាសសន្និសីទកំពូល នៃបណ្តាប្រទេសអាស៊ី-អាហ្រ្វិច។ រាប់ចាប់ពីពេលនោះមកកម្ពុជា-ចិន បានចាប់ផ្តើម មានទំនាក់ទំនងការទូត ជាមួយគ្នាបន្តិចម្តងៗ រហូតមានទំនាក់ទំនងស្អិតល្មួតដូចបច្ចុប្បន្ននេះ។

នៅដើមឆ្នាំ១៩៥៨ ចិនបានចាប់ផ្តើមផ្តល់ជំនួយដល់កម្ពុជា បើទោះជាចិន និងកម្ពុជា មិនទាន់មានទំនាក់ទំនងការទូតជាផ្លូវការ ជាមួយគ្នាក៏ដោយ។ នៅពេលនោះ កម្ពុជា គឺជាប្រទេសទី១ ដែលមិនកាន់របបកុម្មុយនិស្ត ដែលបានទទួលជំនួយពីចិនកុម្មុយនិស្ត។ ជំនួយដែលមហាមិត្តចិន បានជួយកម្ពុជា មានដូចជា ក្នុងការបង្កើតរោងចក្រចំនួន៦ អាកាសយានដ្ឋាន មន្ទីរពេទ្យជាដើម ក្រៅពីនេះចិន បានជួយកម្ពុជា ជាច្រើនក្នុងការអភិវឌ្ឍន៍ប្រទេស។ ជាមួយគ្នានេះ ចិនក៏បានជួយផ្គត់ផ្គង់ផងដែរ នូវបរិក្ខារសម្រាប់កងទ័ពកម្ពុជា ទាំងថ្មើរជើង និងទ័ពអាកាស ដើម្បីឲ្យកម្ពុជា មានគ្រឿងសព្វាវុធគ្រប់គ្រាន់ ដើម្បីការពារឯករាជ្យជាតិ។

យោងតាមព្រះរាជបន្ទូល ក្នុងវីដេអូឯកសាររបស់អតីតព្រះមហាវីរក្សត្រ ព្រះករុណា ព្រះបាទ សម្តេចព្រះនរោត្តម សីហនុ ព្រះបរមរតនកោដ្ឋ ដែលបានផ្តល់កិច្ចសម្ភាសន៍ ជាមួយទូរទស្សន៍ចិន CCTV4 កាលពីឆ្នាំ១៩៩៤ បានបង្ហាញថា «ក្រោយសម័យយើងខ្ញុំ ទាមទារបាននូវឯករាជ្យ ពេញលេញពីប្រទេសបារាំង នៅឆ្នាំ១៩៥៣ ក្នុងនាមជានិច្ចនូវប្រធាន ម៉ៅ សេទុង និងប្រជាជនចិន ឯកឧត្តម ជូ អេនឡាយ បានផ្តល់ជូនកម្លាំង តស៊ូជាតិកម្ពុជា នៅជំនួយដ៏មានសារសំខាន់ ដ៏អស្ចារ្យ និងគ្មានចំណង ដោយលក្ខខណ្ឌដូចសម័យដើម មុនសង្គ្រាមអីចឹងដែរ សម្រាប់គ្រប់ផ្នែកតស៊ូ ទាំងខាងនយោបាយ សេដ្ឋកិច្ច មនុស្សធម៌ សុខាភិបាល គឺជំនួយយ៉ាងច្រើនមហាសាល និងច្រើនមហិមានេះហើយ ដែលបានផ្តល់ជូនកម្លាំងតស៊ូមួយកម្រិតធំ និងជាក់ស្តែងក្នុងការសម្រេច នូវមហាជោគជ័យជាប្រវត្តិសាស្រ្ត នៃកម្លាំងតស៊ូប្រជាជនកម្ពុជា នាថ្ងៃទី១៧ ខែមេសា ឆ្នាំ១៩៧៥ រំដោះកម្ពុជាទាំងស្រុងនូវឯករាជ្យបរិបូណ៍ ក្នុងបូរណភាពទឹកដី»។

នៅខែកក្កដា ១៩៥៨ កម្ពុជាដឹកនាំដោយសម្តេច នរោត្តម សីហនុ ក៏បានប្រកាសទទួលស្គាល់របបចិនកុម្មុយនិស្ត ហើយចង់ភ្ជាប់ទំនាក់ទំនង ការទូតជាមួយចិន។ នៅអង្គការសហប្រជាជាតិ សម្តេចព្រះនរោត្តម សីហនុ បានខិតខំខ្នះខ្នែងជួយសាធារណរដ្ឋប្រជាមានិតចិន ដើម្បីដណ្តើម អាសនៈពីចិនតៃវ៉ាន់ ពីព្រោះនៅពេលនោះ តៃវ៉ាន់ គឺជាអ្នកកាន់កាប់អាសនៈចិន ប្រចាំអ.ស.ប. ដោយសារតែមានប្រទេសជាច្រើន បន្តគាំទ្រ រដ្ឋាភិបាលចិនតៃវ៉ាន់ ហើយបដិសេធមិនទទួលស្គាល់របបចិនកុម្មុយនិស្ត។ ក៏ប៉ុន្តែ នៅឆ្នាំ១៩៦៧ ក្រោយពេលចលនាកុម្មុយនិស្តកម្ពុជា (ខ្មែរក្រហម) បានកក្រើកឡើងកាន់តែខ្លាំង ប្រឆាំងនឹងរដ្ឋាភិបាលសម្តេចនរោត្តម សីហនុ ចិនកុម្មុយនិស្ត បែរជាមកគាំទ្រពួកខ្មែរក្រហមទៅវិញ ដែលធ្វើឲ្យទំនាក់ទំនងរវាងសម្តេចព្រះនរោត្តម សីហនុ និងចិន ត្រូវប្រេះស្រាំ ស្ទើរតែបែកបាក់គ្នា។ រហូតដល់ក្រោយពេល ដែលសម្តេចព្រះនរោត្តម សីហនុ ត្រូវបានធ្វើរដ្ឋប្រហារទម្លាក់ ដោយសេនាប្រមុខ លន់ ណុល ទើបទំនាក់ទំនងជាមួយចិន ចាប់មានភាពស្អិតល្មួតឡើងវិញ ដោយចិនបានផ្តល់ទីស្នាក់អាស្រ័យដល់ សម្តេច ព្រះនរោត្តម សីហនុ និងបាន ជួយទំនុកបម្រុង ឲ្យបង្កើតជារដ្ឋាភិបាលរួបរួមជាតិ ជាមួយខ្មែរក្រហម។ ការជួយរបស់ចិនមកលើរាជរដ្ឋាភិបាលកម្ពុជានេះ បានធ្វើឲ្យអង្គសម្តេចឪ ចាត់ទុកចិន ជាមហាមិត្តចិត្តមួយថ្លើមមួយ និងដឹងគុណូបក្ការជានិច្ច ចំពោះរដ្ឋាភិបាលចិន ដែលបានជួយដល់ កម្ពុជា។ ទាំនាក់ទំនងយ៉ាងស្អិតល្មួតនេះ គឺបានចាក់ឫសយ៉ាងរឹងមាំ ពីមួយថ្ងៃទៅមួយថ្ងៃ តាមរយៈអតីតព្រះមហាវីរក្សត្រ ព្រះករុណា ព្រះបាទ សម្តេចព្រះនរោត្តម សីហនុ ព្រះបរមរតនកោដ្ឋ រហូតដល់រាជរដ្ឋាភិបាលបច្ចុប្បន្ន ដែលដឹកនាំដោយ សម្តេចអគ្គមហាសេនាបតីតេជោ ហ៊ុន សែន។

នៅថ្ងៃទី១៥ ខែតុលា ឆ្នាំ២០១២ អតីតព្រះមហាវីរក្ស ព្រះករុណា ព្រះបាទ សម្តេចព្រះនរោត្តម សី ហនុ ព្រះបរមរតនកោដ្ឋ ព្រះអង្គទ្រង់បានយាងសោយទិវង្គត នៅសាធារណរដ្ឋប្រជាមានិតចិន។ ប៉ុន្តែបើទោះបីជាព្រះបរមរតនកោដ្ឋ បានយាងសោយទីវង្គតទៅហើយក្តី ប៉ុន្តែទំនាក់ទំនងរវាងកម្ពុជា-ចិន មិនបានបាត់បង់ទៅជាមួយនោះឡើយ ពោលគឺ ព្រះមហាក្សត្រ និងរាជរដ្ឋាភិបាលកម្ពុជា ដែលដឹកនាំដោយសម្តេច តេជោសែន គឺនៅតែបន្តដង្ហែតាមព្រះរាជតម្រិះ របស់អង្គសម្តេចឪជាប់ជានិច្ច។
នៅគ្រានោះ ឧបនាយករដ្ឋមន្រ្តី វូបាហ្គោ នៃសាធារណៈរដ្ឋប្រជាមានិតចិន ដែលបានចូលរួមក្នុងព្រះរាជពិធីដង្ហែ ព្រះបរមសពសម្តេចព្រះសីហនុ ពីទីក្រុងប៉េកាំងប្រទេសចិន មកកាន់ព្រះរាជាណាចក្រម្ពុជា បានលើកឡើងថា “ប្រទេសចិន និងប្រជាជនចិនចំនួន១៣០០លាននាក់ និងនៅជាមួយប្រជាជនកម្ពុជាជាដរាប”។

ដោយឡែក សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានសន្យានៅចំពោះព្រះភក្ត្រ របស់ព្រះបរមរតនកោដ្ឋ ទាំងទឹកភ្នែក និងក្តីក្តុកក្តួលថា «ទូលព្រះបង្គំ នឹងការពារព្រះរាជបល័្លង្ក ការពាររាជានិយម ការពាសម្តេចម៉ែ និងការពាព្រះមហាក្សត្រ សូមព្រះអង្គកុំព្រួយព្រះទ័យ”។

លើសពីនេះ សម្តេចតេជោ ហ៊ុន សែន តែងបានអះអាង បញ្ជាក់ម្តងហើយម្តងទៀត អំពីការបន្តដង្ហែតាមព្រះរាជតម្រិះ របស់អង្គសម្តេចឪ ពិសេសការបន្តរិតចំណងមិត្តភាព សាមគ្គីភាព ឲ្យកាន់តែរឹងមាំបន្ថែមទៀតជាមួយភាគីចិន។

កន្លងមកគេសង្កេតឃើញថា រាជរដ្ឋាភិបាលកម្ពុជា ដែលដឹកនាំដោយសម្តេចតេជោ ហ៊ុន សែន គឺបានប្រកាន់គោលជំហរច្បាស់លាស់បំផុត ក្នុងការរក្សានូវទំនាក់ទំនងល្អ ជាមួយប្រទេសចិនគ្រប់ជ្រុងជ្រោយ ទាំងផ្នែកការទូត នយោបាយ សេដ្ឋកិច្ច និងសិល្បៈ វប្បធម៌។ល។ ហើយនេះក៏មិនមែនជារឿងចម្លែកដែរ ដែលសម្តេចតេជោ នៅតែបន្តកសាង ក៏ដូចជាពង្រឹងនៅទំនាក់ទំនងយ៉ាងជិតស្និទ្ធ ជាមួយប្រទេសចិន។ ខណៈដែលចិនបានបន្តជួយកសាង និងចូលរួមអភិវឌ្ឍន៍ប្រទេសកម្ពុជា លើគ្រប់វិស័យ ដោយបច្ចុប្បន្ននេះ ក្រុមហ៊ុនចិនធំៗជាច្រើន បានបន្តបោះទុនវិនិយោគច្រើនបំផុតនៅកម្ពុជា។ ឯរដ្ឋាភិបាលចិនវិញ ក៏បានផ្តល់ជំនួយយ៉ាងច្រើនសន្ធឹកសន្ធាប់ មកដល់កម្ពុជាផងដែរ មានទាំងហេដ្ឋារចនាសម្ព័ន្ធ ផ្លូវថ្នល់ ស្ពាន ប្រព័ន្ធធារាសាស្រ្ត និងមន្ទីរពេទ្យ សាលារៀនជាដើម។ ចំណុចសំខាន់ ដែលធ្វើឲ្យរាជរដ្ឋាភិបាលកម្ពុជា ផ្តល់អាទិភាពដល់ទំនាក់ទំនងជាមួយចិននោះ គឺមកពីចិនតែងតែប្រកាន់យកនូវ គោលការណ៍ មិនជ្រៀតជ្រែកកិច្ចការផ្ទៃក្នុងកម្ពុជា។ រាល់ជំនួយដែលចិនផ្តល់មកកម្ពុជា ចិនមិនមានដាក់លក្ខខណ្ឌដូចជាជំនួយប្រទេស លោកខាងលិចនោះទេ ដែលតែងតែភ្ជាប់ជំនួយទៅនឹងបញ្ហាមួយចំនួន ដូចជាការគោរពសិទ្ធិមនុស្ស បញ្ហាពុករលួយ និងការគោរព គោលការណ៍ប្រជាធិបតេយ្យជាដើម។

ចំណែកចិន ដែលជួយកម្ពុជាយ៉ាងច្រើនបែបនេះ ក៏សម្លឹងឃើញនូវផលប្រយោជន៍ធំ នៅកម្ពុជាដែរ។ ទំនាក់ទំនងជាមួយកម្ពុជា គឺជាផ្នែកមួយ នៃយុទ្ធសាស្រ្តរបស់ចិន ក្នុងការបង្កើនឥទ្ធិពល ក្នុងតំបន់អាស៊ីអាគ្នេយ៍ ដើម្បីទប់ទល់នឹងសហរដ្ឋអាមេរិក។ ប៉ុន្តែយ៉ាងណាក៏ដោយ បើទោះបី ជារាជរដ្ឋាភិបាលកម្ពុជា មានទំនាក់ទំនងស្អិតល្មួតជាមួយចិនក៏ពិតមែន ប៉ុន្តែកម្ពុជានៅតែប្រកាន់ជំហរអព្យាក្រិតជានិច្ច ពិសេសបញ្ហាជម្លោះ ក្នុងសមុទ្យចិនខាងត្បូង។ ដោយកម្ពុជានៅតែរក្សាជំហរអព្យាក្រិតជានិច្ច លើបញ្ហាសមុទ្រចិនខាងត្បូង ដោយមិនលម្អៀង ទៅរកភាគីណា មួយនោះទេ។

តែអ្វីដែលគេចាប់អារម្មណ៍បំផុតនោះ គឺកាលពីពេលកន្លងទៅ មេដឹកនាំគណបក្សសង្គ្រោះជាតិ លោក សម រង្ស៊ី ដែលគេធ្លាប់ ឃើញតែមានទំនោទៅរកសហរដ្ឋអាមេរិក បែរជាងាកមកសម្លឹង ចង់តោងចាប់ប្រទេសចិនទៅវិញ។ ដោយកាលពីថ្ងៃទី២៨ ខែមីនា ឆ្នាំ២០១២ លោក សម រង្ស៊ី មេបក្សប្រឆាំងធំជាងគេនៅកម្ពុជា បានបង្ហាញនូវការស្វាគមន៍ ចំពោះដំណើរទស្សនកិច្ចរបស់ប្រធានាធិបតីចិន និងបានចាត់ទុក ដំណើរទស្សនកិច្ចនោះថា ជាប្រវត្តិសាស្រ្ត ក្នុងការរឹតចំណងមិត្តភាពរវាងប្រទេសទាំងពីរ។ ប៉ុន្តែអ្វីដែលធ្វើឲ្យ មហាជន និងអ្នកនយោបាយជាច្រើន មានការភ្ញាក់ផ្អើលនោះ គឺការបង្ហាញនូវជំហររបស់លោក សម រង្ស៊ី គាំទ្រយ៉ាងពេញទំហឹង ចំពោះប្រទេសចិន ក្នុងជម្លោះនៅប្រជុំកោះ របស់ប្រទេសចិន ឈ្មោះ ណានចា និងជីចា ដែលស្ថិតនៅក្នុងដែលសមុទ្រចិនខាងត្បូង។

ការប្រឹងប្រែងចូលទៅជិតចិន របស់លោក សម រង្ស៊ីនេះ គឺបង្ហាញឲ្យឃើញយ៉ាងច្បាស់ពីភាពមិនពិតប្រាកដ និងគ្មានគោល នយោបាយការបរទេសច្បាស់លាស់ ដោយម្តងងាកទៅអាមេរិក ម្តងងាកទៅចិន ហើយចំពោះការងាកចុះឡើង  និងរេទៅតាមខ្យល់បក់ ពីសំណាក់លោក សម រង្ស៊ីនេះ អាចធ្វើឲ្យប្រទេសកម្ពុជា ងាយធ្លាក់ចូលក្នុងអន្លង់គ្រោះថ្នាក់ នៃស្រមោលអន្ធកាល ពិសេសបាត់បង់នូវ ទំនាក់ទំនងការទូត ជាមួយប្រទេសជិតខាង និងប្រទេសមហាអំណាចធំៗក្នុងពិភពលោក។

ដោយឡែកចំពោះសម្តេចតេជោវិញ បើទោះបីជាមិននិយាយ ក៏គេអាចដឹងយ៉ាងច្បាស់ដែរថា សម្តេចមានគោលនយោបាយការទូតយ៉ាងរឹងមាំ និងឯករាជ្យ ហើយតាមរយៈនយោបាយការបរទេស ឯករាជ្យនេះហើយ ទើបធ្វើឲ្យកម្ពុជា អាចគេចចេញផុតពីអន្លង់គ្រោះថ្នាក់ នៃស្រមោល អន្តកាល មានសុខសន្តិភាពពេញលេញ និងការអភិវឌ្ឍន៍រហូតបច្ចុប្បន្ននេះ៕

រដ្ឋមន្ត្រីក្រសួងព័ត៌មានក្រើនរំលឹកអ្នក ស្រលាញ់ស្លាកលេខ Press ប្រយ័ត្ន ចូលគុក

E-mail Print PDF

ភ្នំពេញ៖ រដ្ឋមន្ត្រីក្រសួងព័ត៌មាន លោក ខៀវ កាញ៉ារីទ្ធ នៅថ្ងៃទី១៣ ខែកុម្ភៈ ឆ្នាំ២០១៦នេះ បានក្រើនរំលឹក ទៅដល់អ្នកដែលស្រលាញ់ និងប្រើប្រាស់យានជំនិះ មានស្លាកលេខ Press ទាំងអស់ប្រយ័ត្នជាប់គុក ដោយសារស្លាកលេខរបៀបនេះ។

 លោក ខៀវ កាញ៉ារីទ្ធ បានលើកឡើងតាមរយៈបណ្តាញទំនាក់ទំនងសង្គម (Facebook) ថា “រំលឹកអ្នកស្រលាញ់ស្លាកលេខ Press ថា បើនគរបាលចាប់មិនមែនពិន័យទេ តែគឺ គុក”។

សូមបញ្ជាក់ថា រាល់ថ្ងៃនេះមានយាន្តយន្តជាច្រើន ពិសេសម៉ូតូ មានពាក់ស្លាកលេខបែបនេះជាច្រើន ហើយម៉ូតូខ្លះទៀត មានទាំងដាក់ស្លាកលេខ ជាឈ្មោះស្ថាប័ន ព័ត៌មានរបស់ខ្លួនទៀតផង៕

ឃាត់ករសម្លាប់នារីកាត់ក្បាល មានគ្នាពីរនាក់ ម្នាក់ឃាត់ខ្លួននៅសៀមរាប ម្នាក់ទៀតឃាត់ខ្លួននៅឧត្តរមានជ័យ

E-mail Print PDF

សៀមរាប៖ មន្រ្តីកងរាជអាវុធហត្ថខេត្តសៀមរាប បានឲ្យដឹងថា ឃាតករដែលសម្លាប់នារីម្នាក់កាត់ក្បាល នៅក្នុងផ្ទះសំណាក់ប្រាសាទកែវ ត្រូវបានឃាត់ខ្លួននៅម៉ោងជិត៧យប់ថ្ងៃទី១៣ ខែកុម្ភៈនេះ ស្ថិតនៅក្រោយផ្ទះ ស្ថិតនៅភូមិព្រៃចាស់ សង្កាត់ដូង ក្រុងសៀមរាប ពោលជិតព្រលានយន្តហោះ ខណៈដែលជនសង្ស័យរូបនេះ បានព្យាយាមយកក្បាលនារីរងគ្រោះដុតចោល ឯម្នាក់ទៀតត្រូវបានឃាត់ខ្លួននៅខេត្តឧត្តរមានជ័យ។

មន្រ្តីកងរាជអាវុធហត្ថខេត្តសៀមរាប បានឲ្យដឹងថា តាមការសន្និដ្ឋានជំហានដំបូងករណីនេះ គឺកើតចេញពីរឿងស្នេហាត្រីកោណ ហើយឃាតករដែលបានសម្លាប់នារីរងគ្រោះនេះ មានឈ្មោះ ច័ន្ទ ឆៃយ៉ា ហៅសារ៉ាត់ មុខមុខរបរជាអ្នកនាំភ្ញៀវទេសចរណ៍ថៃ គ្រោងការឃាតកម្មនេះ គឺមានផែនការច្បាស់លាស់ និងមានជំនាញថែមទៀតផង។ មុនធ្វើសកម្មភាពសម្លាប់ជនរងគ្រោះ បានណាត់ជួបគ្នាជាមួយនារីរងគ្រោះ ក្នុងបន្ទប់ផ្ទះសំណាក់ ខណៈនេះ ជនសង្ស័យបានវាយចំកណ្តាលដើមទ្រូងនារីរងគ្រោះឲ្យសន្លប់ រួចបានយកខ្សែរិតកឲ្យស្លាប់ បន្ទាប់ក៏បានអារក នារីរងគ្រោះរួចរត់គេចខ្លួនបាត់។

មន្រ្តីកងរាជអាវុធហត្ថ ក៏បានបញ្ជាក់បន្ថែមទៀតថា ដោយឡែកឃាតករម្នាក់ទៀត ត្រូវបានឃាត់ខ្លួននៅក្នុងខេត្តឧត្តរមានជ័យ ហើយពេលនេះកំពុងបញ្ជូនខ្លួនមកកាន់ខេត្តសៀមរាប៕

Page 1 of 837