left
Safe Home
Safe Home
Safe Home

Dap News...Admin

Sunday, Apr 26th

| English Version | dapnews: 012 571 704, 097 9999 883, email: lim.cheavutha@gmail.com

You are here:
 
AAP

អ្នកម្នាង អ៊ុក ផល្លា ត្រូវបានបញ្ជូន ទៅសង្រ្គោះ នៅថៃ ខណៈអ្នកនាំពាក្យ អះអាងថា គ្រោះថ្នាក់ចរាចរនេះ ជារឿងចេតនា

E-mail Print PDF

ភ្នំពេញ៖ អ្នកនាំពាក្យគណបក្សហ៊្វុនស៊ិនប៉ិច លោក ញ៉េប ប៊ុនជិន បានថ្លែងឲ្យដឹងថា នៅព្រឹកថ្ងៃអាទិត្យ ទី២៦ ខែ មេសា ឆ្នាំ២០១៥ អ្នកម្នាង អ៊ុក ផល្លា កំពុងស្ថិតនៅលើយន្តហោះរបស់ពេទ្យ ដើម្បីដឹកបញ្ជូនទៅសង្រ្គោះនៅក្រៅ ប្រទេស បន្ទាប់រងគ្រោះថ្នាក់ធ្ងន់ធ្ងរក្នុងហេតុការណ៍រថយន្តដឹកដី បើកបុកក្បួនព្រះទីនាំង (រថយន្ត) របស់សម្តេច ក្រុមកាលពីម្សិលមិញនេះ។

លោក ញ៉េប ប៊ុនជិន បានឲ្យដឹងថា អ្នកម្នាង អ៊ុក ផល្លា ដែលរងរបួសចំក្បាលនោះ ត្រូវបានដឹកបញ្ជូនទៅសង្រ្គោះ នៅក្នុងប្រទេសថៃ។

ហេតុការណ៍គ្រោះថ្នាក់ពីម្សិលមិញនេះ លោក ញ៉េប ប៊ុនជិន បានបញ្ជាក់ថា គឺជារឿងចេតនា សុទ្ធសាធមិនមែន ជារឿងអចេតនានោះឡើយ លោកទទូចឲ្យសមត្ថកិច្ចស៊ើបអង្កេតលើករណីនេះ ឲ្យជាក់ច្បាស់ និងយកចិត្តទុកដាក់ ជាទីបំផុត។

លោក ញ៉េប ប៊ុនជិន បានរៀបរាប់ហេតុការណ៍ម្សិលមិញថា «វាមិនជារឿងចៃដន្យនោះទេ ហេតុអីរថយន្តដឹកដីនេះ គ្រាន់តែផុតរថយន្តសារ៉ែនក្នុងក្បួនភ្លាម ស្រាប់តែកាច់ចង្កូតសំដៅមកបុកព្រះទីនាំងរបស់ សម្តេចក្រុមព្រះ ដែល នៅពីក្រោយរថយន្តសារ៉ែនតែម្តង។ ខ្ញុំសូមឲ្យសមត្ថកិច្ច ចាប់អារម្មណ៍ និងយកចិត្តទុកដាក់ឲ្យបានខ្ពស់ទៅលើ រឿងនេះ ខ្ញុំគិតថា ជាចេតនាក្នុងការធ្វើគត់សម្តេចក្រុមព្រះ»។

កាលពីម៉ោង១២ និង៥០នាទីរសៀលថ្ងៃទី២៥ ខែមេសា ឆ្នាំ២០១៥ រថយន្ដដឹកដីមួយគ្រឿង  បានបើកបុកចូល ក្បួនព្រះទីនាំងរបស់សម្ដេចក្រុមព្រះ ដែលកំពុងធ្វើដំណើរត្រឡប់មកពីជួបសំណេះសំណាលជាមួយអ្នកគាំទ្រ របស់ព្រះអង្គនៅក្នុងខេត្តកំពង់ចាម ឆ្ពោះមករាជធានីភ្នំពេញ។

រថយន្តដឹកដីបានបើកកៀរព្រះទីនាំងរបស់សម្តេចក្រុមព្រះ នរោត្តម រណឫទ្ធិ ម៉ាក BMW យ៉ាងធ្ងន់ធ្ងរ និងបន្តបុក រះរថយន្តក្នុងក្បួនដទៃទៀត បណ្ដាលឱ្យអ្នកម្នាង អ៊ុក ផល្លា រងរបួសត្រង់ក្បាល សម្តេចក្រុមព្រះរងរបួសបន្តិច បន្តួច រីឯអ្នករួមដំណើរក្នុងក្បួន ៤នាក់ផ្សេងទៀត ក៏រងរបួសធ្ងន់-ស្រាលផងដែរ។ ហេតុការណ៍គ្រោះថ្នាក់ចរាចរ នេះ កើតឡើងនៅលើកំណាត់ផ្លូវជាតិលេខ៧ ក្នុងភូមិព្រៃខ្វិត ឃុំខ្វិតធំ ស្រុកព្រៃឈរ ខេត្ដកំពង់ចាម។

អធិការនគរបាលស្រុកព្រៃឈ លោក កែវ សៀងហ៊ន បានបញ្ជាក់ថា ខណៈដែលក្បួនរថយន្ដរបស់សម្ដេចក្រុម ព្រះ ដែលមានរថយន្ដស៊ីរ៉ែននាំមុខ កំពុងធ្វើដំណើរមកកាន់រាជធានីភ្នំពេញនោះ ស្រាប់តែរថយន្ដដឹកដីមួយគ្រឿង ពាក់ស្លាកលេខ ភ្នំពេញ 3B-4495 ធ្វើដំណើរបញ្ច្រាសទិសក្បួន ហើយពេលផុតរថយន្ដស៊ីរ៉ែន រថយន្ដដឹកដីបាន បើកចូលក្បួនទៅកៀរព្រះទីនាំងរបស់ព្រះអង្គ រួចបន្ដទៅបុកគល់ឈើ។

ទោះបីជាយ៉ាងក្រោយកើតហេតុភ្លាមៗម្ចាស់រថយន្តដឹកដីឈ្មោះ លី សុផាត អាយុ ៤៨ឆ្នាំ រស់នៅភូមិទី៣ សង្កាត់ វាលវង់ ក្រុងកំពង់ចាម ក៏បានចូលបង្ហាញខ្លួនចំពោះមុខសមត្ថកិច្ច និងប្រាប់អត្តសញ្ញាណអ្នកបើកបរបង្គ្រោះថ្នាក់ ដែលកំពុងរត់គេចខ្លួនផងដែរ។

អ្នកបើកបរបង្កគ្រោះថ្នាក់ខាងលើ មានឈ្មោះ ឈឿន រ៉ុន រស់នៅភូមិភ្នំ ឃុំទន្លេបិទ ស្រុកត្បូងឃ្មុំ ខេត្តកំពង់ចាម អាយុ ២៥ឆ្នាំ។ អ្នកស៊ីឈ្នួលបើករថយន្តដឹកដីរូបនេះ ទទួលបានប្រាក់កម្រៃថ្លៃបាយ ២៥០០០រៀល ក្នុង១ថ្ងៃ និង ទទួលបានប្រាក់ខែ ១៧០ដុល្លារ ក្នុង១ខែ រូបគេបានបើករថយន្តដឹកដីតាំងពីថ្ងៃទី២០ ខែមេសា ឆ្នាំ២០១៥ ដោយ យកទៅចាក់នៅការដ្ឋានទឹកឆា។

ស្នងការខេត្តកំពង់ចាម លោក ប៉ែន រ័ត្ន បានបញ្ជាក់ថា តាមការសន្និដ្ឋានជាជំហានដំបូង គ្រោះថ្នាក់ចរាចរនេះ បាន កើតឡើង ដោយសារតែអ្នកបើករថយន្តដឹកដី ប្រជែងគេប្រជែងឯង ដែលអ្នកផ្សេងទៀតអែបខាងឲ្យក្បួនទៅស្រាប់ តែរេចង្កូតបើកបុកចូលក្បួនតែម្តង៕

ព្រះទីនាំងសម្តេចក្រុមព្រះ ដែលរថយន្តដឹកដីបុកកៀរយ៉ាងដំណំ

រន្ទះបាញ់ សម្លាប់មនុស្សម្នាក់ ខណៈលោក យឹម ឆៃលី កំពុង ចែកអំណោយនៅទីនោះ

E-mail Print PDF

កំពង់ចាម ៖ បុរសម្នាក់ ត្រូវបានរន្ទះបាញ់ស្លាប់ ខណៈដែល លោកឧបនាយករដ្ឋមន្រ្តី យឹម ឆៃលី និងថ្នាក់ដឹកនាំ ខេត្តកំពង់ចាម កំពុងចុះចែកអំណោយ ជូនប្រជាពលរដ្ឋ ដែលរងគ្រោះ ដោយសារ ខ្យល់ព្យុះ នៅឃុំសណ្តែក ស្រុកបាធាយ ខេត្តកំពង់ចាម នាព្រឹកថ្ងៃ ទី២៦ ខែមេសា ឆ្នាំ២០១៥ ។

មន្រ្តីនគរបាល ស្រុកបាធាយ ខេត្ត កំពង់ចាម បានឲ្យដឹងថា បុរសម្នាក់ដែលត្រូវរន្ទះបាញ់ស្លាប់នោះ រស់នៅភូមិស្វាយព្រៃ ឃុំសណ្តែក ស្រុកបាធាយ ទីដែល កាកបាទក្រហមដឹកនាំ ដោយលោក យឹម ឆៃលី កំពុងចែកអំណោយ នៅឃុំនោះ។

សូមបញ្ជាក់ថា នៅព្រឹកថ្ងៃទី២៦ ខែមេសា ឆ្នាំ២០១៥នេះ លោកឧបនាយករដ្ឋមន្រ្តី យឹម ឆៃលី បានយក អំណោយ របស់កាកបាទក្រហមកម្ពុជា មកចែកជូនប្រជាពលរដ្ឋ ដែលរងគ្រោះ ដោយសារខ្យល់ព្យុះ ឃុំសណ្តែក ចំនួន១៣០គ្រួសារ ឃុំតាំងក្រសាំង ចំនួន៤៥គ្រួសារ នឹងឃុំត្រប់ របស់ស្រុកបាធាយ ចំនួន៤១២ គ្រួសារ សរុប៥៨៧គ្រួសារ ។

សម្រាប់ប្រជាពលរដ្ឋ ១គ្រួសារ ទទួលបាន  អង្ករ ២៥Kg ភួយ ១ ក្រមារ ១ សារុង១ ដោយឡែក គ្រួសារខូចខាតធ្ងន់ចំនួន១៥០គ្រួសារ ទទួលបាន សង្ក័សី១៥សន្លឹក។

សម្រាប់គ្រោះធម្មជាតិ រន្ទះបាញ់នេះ ក៏បានកើតឡើង ផងដែរ កាលពីវេលាម៉ោង ៤៖៣០នាទីទាបភ្លឺ នៅថ្ងៃ២៦ ខែមេសា ឆ្នាំ២០១៥ នៅវត្ដថ្មី សង្កាត់សំបួរមាស ក្រុងកំពង់ចាម ដោយបាញ់កំពូលសាលាឆទាន(ជៀវា) បណ្ដាលឲ្យ ក្ដាច់ចំឡាក់ (ជៀវា) បែកជាច្រើនចំណែក ក្នុងនោះ មានចំណែកខ្លះ បានធ្លាក់មកត្រូវ ញ៉ាបរោងប្រចាំការ គោលដៅ F2.បណ្ដាលឲ្យ ខូចខាតដំបូលរោងយាម មួយចំនួនផងដែរ។

សម្រាប់ស្រុកបាធាយ ខេត្តកំពង់ចាម បានរងគ្រោះខ្លាំងជាងគេ ដោយសារខ្យល់ព្យុះ កាលពីប៉ុន្មាន ថ្ងៃមុននេះ ប៉ុន្តែកងកម្លាំងអាវុធ និងអាជ្ញាធរ គ្រប់លំដាប់ថ្នាក់ បានចុះជួយរុះរើ និងសាងសង់ឡើងវិញ ជាបន្តបន្ទាប់ផងដែរ៕

ភ្លៀងលាយ ខ្យល់កន្រាក់ បំផ្លាញផ្ទះពលរដ្ឋ អស់ចំនួន៨ខ្នង នៅស្រុកឈូក

E-mail Print PDF

កំពត៖ផ្ទះប្រជាពលរដ្ឋ ចំនួន០៨ខ្នង ត្រូវបានបំផ្លាញ ខណៈភ្លៀងធ្លាក់មួយមេ និងលាយឡំខ្យល់កន្ទ្រាក់ ផង កាលពីវេលាម៉ោង៣និង៣០នាទីរសៀល ថ្ងៃទី២៥ ខែមេសា ឆ្នាំ២០១៥ ម្សិលមិញ កើតឡើងក្នុង ស្រុកឈូក ខេត្តកំពត។

មន្ត្រីសាលាស្រុកឈូក បានប្រាប់មជ្ឈមណ្ឌលព័ត៌មានដើមអម្ពិលឲ្យដឹងថា យ៉ាងហោចណាស់ ផ្ទះ ប្រជាពលរដ្ឋចំនួន០៨ខ្នង ក្នុងស្រុកឈូក ត្រូវភ្លៀងលាយខ្យល់កន្ទ្រាក់បំផ្លាញ បណ្តាលឲ្យខូចខាត ក្នុងភូមិត្រពាំងស្តៅ ឃុំត្រពាំងភ្លាំង ផ្ទះខូចខាតទាំងស្រុង ចំនួន០២ខ្នង និងប៉ើងដំបូល,ជញ្ជាំងចំនួន ០៤ខ្នង។ ចំណែកនៅភូមិត្រពាំងថ្ម ឃុំល្បើកវិញ ផ្ទះហក់ចេញពីជើងតាងចំនួន០១ខ្នង និង០១ខ្នង ទៀត ដួលរលំ។

មន្ត្រីដដែលបន្តថា ក្នុងហេតុការណ៍គ្រោះធម្មជាតិបំផ្លាញផ្ទះរបស់ប្រជាពលរដ្ឋខាងលើ ពុំបណ្តាលឲ្យ មនុស្ស ឬសត្វណាមួយ ទទួលរងគ្រោះឡើយ។ ក្រោយហេតុការណ៍គ្រោះធម្មជាតិភ្លាម ត្រូវបានក្រុម ការងាររបស់ស្រុក និងអាជ្ញាធរមូលដ្ឋាន បានចុះទៅពិនិត្យ និងវាយតម្លៃ នៃការខូចខាតអស់ទាំងនេះ ហើយ ដើម្បីរាយការណ៍ទៅថ្នាក់លើ។     

គួរបញ្ជាក់ថា កាលពីវេលាម៉ោង២និង១០នាទីរសៀល ថ្ងៃទី២២ ខែមេសា ឆ្នាំ២០១៥ ក៏មានករណី ធ្លាក់ភ្លៀង០១មេ និងខ្យល់កន្ទ្រាក់ កើតឡើងក្នុងឃុំខាងលើដូចគ្នានេះដែរ ដែលបានបំផ្លាញផ្ទះរបស់ ប្រជាពលរដ្ឋ ទាំងធ្ងន់ និងស្រាល អស់១៥ខ្នងផ្ទះ ក្នុងនោះ ខ្យល់កន្ទាក់បំផ្លាញផ្ទះទាំងធ្ងន់ និងស្រាល ក្នុងភូមិត្រពាំងថ្ម ឃុំល្បើក ចំនួន១៣ខ្នង និងរន្ទះបាញ់ត្រូវផ្ទះបណ្តាលឲ្យខូចខាតស្រាល ចំនួន០២ខ្នង ស្ថិតក្នុងភូមិស្រែលាវ ឃុំត្រពាំងភ្លាំង នៃស្រុកឈូក ខេត្តកំពត៕

លោក ស៊ុន ចាន់ថុល ជួបពិភាក្សា ការងារជាមួយ សមាសភាគី ហុងកុង

E-mail Print PDF

ភ្នំពេញ៖ លោក ស៊ុន ចាន់ថុល ទេសរដ្ឋមន្រ្តី និងជារដ្ឋមន្រ្តី ក្រសួងពាណិជ្ជកម្មកម្ពុជា បានជួបពិភាក្សា ការងារមួយលោក ក្រេត ក្រីសូ រដ្ឋមន្រ្តីពាណិជ្ជកម្ម ក្រុងហុងកុង ដោយបានសន្យារួមគ្នាក្នុងការពង្រីក ទំហំពាណិជ្ជកម្ម នៃប្រទេសកម្ពុជា និង ហុងកុង ឲ្យកាន់តែមានទំហំធំជាងមុនទៀត តាមរយៈការជំរុញ អ្នកវិនិយោគទុន ពីហុងកុងមកកាន់ប្រទេសកម្ពុជា។ នេះបើតាមទំព័រហ្វេសប៊ុករបស់លោក កឹម គុណវឌ្ឍ។

នៅក្នុងជំនួបពិភាក្សាការងារ ដែលធ្វើឡើងនៅទីក្រុងកូឡាឡាំពូរ ប្រទេសម៉ាឡេស៊ី នាព្រឹកថ្ងៃអាទិត្យ នេះ លោក ស៊ុន ចាន់ថុល មានប្រសាសន៍ ថា ទំហំពាណិជ្ជកម្មរវាងប្រទេស កម្ពុជា និង ហុងកុង មានការកើនឡើងជាបន្តបន្ទាប់ ក្នុងនោះ ឆ្នាំ២០១៣ទំហំពាណិជ្ជកម្មទ្វេភាគី មានទំហំជាង ២ពាន់លាន$ ដុល្លាអាម៉េរិក ហើយទំហំពាណិជ្ជ កម្ម នេះនឹងមានការកើនឡើងថែមទៀត។

លោក ទេសរដ្ឋមន្រ្តី បានស្នើដល់សមាសភាគី ជួយជំរុញស្ថាប័នសភាពាណិជ្ជកម្ម សមាគមនពាណិ្ជកម្ម និងការវិនិយោគ និងសមាគមដទៃទៀត ទៅធ្វើទស្សនកិច្ចក្នុងប្រទេសកម្ពុជា ដើម្បីរកឱកាស បណ្តាក់ ទុននៅកម្ពុជា។ តាមរយៈជំនួបពិភាក្សា ជាថ្មីម្តងទៀតនេះ លោក បានស្នើឲ្យលោករដ្ឋមន្រ្តីពាណិជ្ជកម្ម ហុងកុង ជួយជំរុញសមាគម ទាំងនោះ ទៅធ្វើទស្សនកិច្ចស្វែងយល់ និងរកឱកាសវិនិយោគនៅកម្ពុជា។

ជាការឆ្លើយតប លោក ក្រេត ក្រីសូ បានឯកភាពទៅនិង សំណើរសុំរបស់ រដ្ឋមន្រ្តីពាណិជ្ជកម្មកម្ពុជា ជាមួយគ្នានេះលោករដ្ឋមន្រ្តីមានការចាប់អារម្មណ៍យ៉ាងខ្លាំង ចំពោះការនាំចេញអង្កររបស់កម្ពុជា តាម រយៈខិតខំយ៉ាងណាហុងកុង នឹងធ្វើការ ទិញអង្ករពីប្រទេសកម្ពុជានៅពេលខាងមុខ។

ជាមួយគ្នានេះ លោករដ្ឋមន្រ្តីក្រសួងពាណិជ្ជកម្មហុងកុង ក៏បានថ្លែងអំណរគុណជូនដល់ ប្រទេសកម្ពុជា ដែលបានគាំទ្រឲ្យហុងកុង បានចរចា នៅក្នុងពាណិជ្ជកម្មសេរីរបស់អាស៊ាន៕

វគ្គបណ្តុះបណ្តាល ជំនាញ “ការគ្រប់គ្រង ធនធានមនុស្ស”

E-mail Print PDF

សេចក្តីផ្តើម

នៅក្នុងសតវត្សទី២១នេះ ការងារគ្រប់គ្រងធនធាន មនុស្ស បានជួបផលវិបាកជាច្រើន ពិសេសបំលាស់ប្តូរ ការងារ របស់និយោជិតមានសន្ទស្សន៍ឡើងខ្ពស់ខុស ពីការប្រមើលមើលរបស់សេដ្ឋវិទូល្បីៗ នៃបស្ចឹមលោក។ នៅក្នុងបរិបទដ៏ជឿនលឿននៃសម័យសេដ្ឋកិច្ចនេះ បានធ្វើឱ្យក្រុមហ៊ុនឯកជនមួយចំនួនជួបបញ្ហាធំៗ ជាច្រើន ដូចជា ជម្លោះផ្ទៃក្នុងអង្គភាព, ការរិះគន់រវាងនិកយោជិតនិងនិយោជក, អត្រាហូរចេញនិងចូលរបស់បុគ្គលិកខ្ពស់, ការមិនគោរពគោលការណ៍អង្គភាពជាដើម។ដោយមើលឃើញផលវិបាកទាំងនេះ ទើបក្រុមហ៊ុន អេជអា ខេមបូឌា សហការជាមួយសាកលវិទ្យាល័យធនធានមនុស្ស បានរៀបចំវគ្គជំនាញខ្លីប្រធានបទ “ប្រសិទ្ធភាព នៃការគ្រប់គ្រងធនធានមនុស្ស” សម្រាប់ក្រុមហ៊ុនឯកជន, អង្គការមិនមែនរដ្ឋាភិបាល និងស្ថាប័នអាជីវកម្មនានា ក្នុងព្រះរាជាណាចក្រកម្ពុជា។

រាល់ឯកសារពាក់ព័ន្ធនានា និងលិខិតបញ្ជាក់ការសិក្សាចេញ ដោយសាកលវិទ្យាល័យធនធានមនុស្ស។

ពិពណ៌នាវគ្គសិក្សា

វគ្គសិក្សានេះ ត្រូវបានបង្កើតឡើងដើម្បីជួយដឹកនាំការងារ ឱ្យមានរបៀបរៀបរយនិងបទដ្ឋានអន្តរជាតិ

ទីមួយៈ តួនាទីនៃអំណាចក្នុងការអនុវត្ត និងការកែលម្អការអនុវត្តការងារគ្រប់គ្រងធនធានមនុស្ស

ទីពីរៈ វគ្គបណ្ដុះបណ្តាលនេះមានបំណងផ្តល់ជូននូវឱកាស ដើម្បីដោះស្រាយបញ្ហាសូចនាករបច្ចុប្បន្នភាព រួម បញ្ចូលទាំងការវិភាគការងារការ ជ្រើសរើសបុគ្គលិកការបណ្តុះបណ្តាលនិងការអភិវឌ្ឍ ការវាយតំលៃនិងការ តបស្នង ដែលបានកំណត់ប្រសិទ្ធភាពនៃការគ្រប់គ្រងធនធានមនុស្ស។

ទីបីៈ វគ្គសិក្សានេះនឹងផ្តោតលើទ្រឹស្ដី, តក្ក, ការអនុវត្តន៍និងវិធីសាស្ត្រ អនុវត្តជាក់ស្តែងលើវិស័យនិងសីលធម៌ ដែលបានផ្សារភ្ជាប់ជាមួយនឹង ករណីសិក្សាពីអ្នកអនុវត្តការងារនៅក្នុងអង្គភាពពិតប្រាកដ។

មាតិកាសង្ខេប

ជំពូកទីI សេចក្តីផ្តើមស្តីពីការគ្រប់គ្រងធនធានមនុស្ស

ជំពូកទី II ការវិភាគការងារគ្រប់គ្រងធនធានមនុស្ស

ជំពូកទី III ផែនការបុគ្គលិកនិងការជ្រើសរើសនិយោជិត

ជំពូកទី IV ការបណ្តុះបណ្តាលហ្វឹកហ្វឺននិងអភិវឌ្ឍន៍និយោជិត

ជំពូកទីV ការវាយតម្លៃនិងគ្រប់គ្រងធនធានមនុស្ស

ជំពូកទី VI អត្ថប្រយោជន៍និងសេវាកម្មនៃការងារធនធានមនុស្ស

ជំពូកទី VII វិធីសាស្រ្តស្រាវជ្រាវ

មាតិកាបន្ថែម

វិធីសាស្រ្តបង្រៀន                                                 ‘

បណ្តុះបណ្តាជាភាសាខ្មែរ, ដោះស្រាយលំហាត់,ពិភាក្សាករណីសិក្សាលើផ្នែកធនធានមនុស្សក្នុង បច្ចុប្បន្នភាព, ធ្វើការងារជាក្រុមនិងជាលក្ខណៈបុគ្គល

កាលបរិច្ឆេទនិងពេលវេលា នៃវគ្គបណ្តុះបណ្តាល                                         ‘

រយៈពេល: 32ម៉/4សប្តាហ៍ នៅថ្ងៃសប្តាហ៍

អង្គារ, ពុធ, និង ព្រហស្សតិ៍ៈ ៦:០០ម៉-៨:០០ម៉ (យប់)

នៅថ្ងៃចុងសប្តាហ៍

ថ្ងៃសៅរ៍ : ម៉ោង 01:30-05:30រសៀល

ថ្ងៃអាទិត្យ: ម៉ោង 08:00-12:00 ព្រឹក

កាលបរិច្ឆេទ: ថ្ងៃទី 25 ខែមេសាឆ្នាំ 2015

ថ្លៃសិក្សា                                                                      ‘

• តម្លៃ200.00ដុល្លារ

• តម្លៃ 160.០០ដុល្លារសម្រាប់ការចុះឈ្មោះមុនពេលថ្ងៃទី០១ ខែមេសាឆ្នាំ ២០១៥

• សម្រាប់ការចុះឈ្មោះជាក្រុមចំនួន 5 នាក់នឹងបន្ថែមដោយឥតគិតថ្លៃមួយនាក់

• សិក្ខាកាមដែលធ្លាប់សិក្សាពីមុនមកបញ្ចុះតម្លៃ២៥%

• ផ្តល់ជូនអាហារសំរ៉ន់, សម្ភារៈសិក្សានិងវិញ្ញាបនប័ត្រដែលចេញដោយសាកលវិទ្យាល័យធនធានមនុស្ស

កន្លែងចុះឈ្មោះនិងទីកន្លែងនៃការសិក្សា:     ‘

ក្រុមហ៊ុនរបស់ក្រុមហ៊ុន (ធនធានមនុស្សកម្ពុជា) អគារប៊ីជាន់ទី២សាកលវិទ្យាល័យធនធានខាងត្បូងវត្តមហាមន្ត្រី ផ្លូវ 284 និងកែងផ្លូវ 163, សង្កាត់អូឡាំពិក ខណ្ឌចំការមនរាជធានីភ្នំពេញ។

ទូរស័ព្ទ: 855 (0) 93 888 772

អ៊ីម៉ែល:men.tum@hrcambodia.com.

វេបសាយ:www.hrcambodia.com.

ផុតកំណត់: ថ្ងៃទី២៤ ខែមេសា ឆ្នាំ២០១៥

អគ្គិសនីក្នុងខេត្ត សៀមរាប មានប្រើប្រាស់វិញហើយ បន្ទាប់ពីកាត់ផ្តាច់ អស់រយៈពេល ៤ថ្ងៃ

E-mail Print PDF

ភ្នំពេញ៖ នៅម៉ោង ៥ និង១៣នាទីព្រឹកថ្ងៃអាទិត្យ ទី២៦ ខែមេសា ឆ្នាំ២០១៥នេះ អគ្គិសនីក្នុងខេត្តសៀមរាប ត្រូវ មានប្រើប្រាស់ឡើងវិញហើយ បន្ទាប់ពីក្រុមបច្ចេកទេស បានចំណាយពេលដំឡើងបង្គោល និងអូសខ្សែភ្លើងអស់ រយៈពេល ៤ថ្ងៃ ៤យប់។ នេះបើយោងតាមមន្រ្តីអគ្គិសនីកម្ពុជា បញ្ជាក់ប្រាប់មជ្ឈមណ្ឌលព័ត៌មានដើមអម្ពិលនៅ ព្រឹកថ្ងៃនេះ។

មន្រ្តីអគ្គិសនីកម្ពុជា បានបញ្ជាក់ថា ប្រតិបត្តិការដំឡើងបង្គោលភ្លើង ២៧ដើម និងអូសខ្សែភ្លើង ដែលត្រូវខ្យល់វាយ ផ្តួលឲ្យរលំនេះ អគ្គិសនីកម្ពុជា បានប្រើក្រុមបច្ចេកទេស ២១៧នាក់ គ្រឿងចក្រ រថយន្តស្ទួច ១២គ្រឿង អេសស្កា កាយដី ៥គ្រឿង រថយន្តដឹកជញ្ជូន ១២គ្រឿង និងសម្ភារៈបន្ទាប់បន្សំជាច្រើនទៀត។ ប្រតិបត្តិការត្រូវបានធ្វើឡើង ទាំងថ្ងៃ ទាំងយប់។

សូមបញ្ជាក់ថា ភ្លៀង និងខ្យល់កន្ត្រាក់ កាលល្ងាចថ្ងៃទី២២ ខែមេសា ឆ្នាំ២០១៥ បង្គោលអគ្គិសនី ២៧ដើម ដែល ជាបង្គោលតភ្ជាប់ចរន្តអគ្គិសនីតង់ស្យុងខ្ពស់ ចូលទៅផ្គត់ផ្គង់ក្នុងខេត្តសៀមរាប បានបាក់និងដួលរលំបណ្តាលឲ្យ ចរន្តអគ្គិសនីក្នុងក្រុងសៀមរាប ត្រូវបានកាត់ផ្តាច់ទាំងស្រុង។ បង្គោលអគ្គិសនី ដែលបាក់នោះមានចំនួន ៣ទីតាំង ចាប់ពីភូមិតាប៉ុន ស្រុកព្រះនេត្រព្រះ ខេត្តបន្ទាយមានជ័យ ដល់ភូមិក្រឡាញ់ ស្រុកក្រឡាញ់ ខេត្តសៀមរាប៕

សម្តេច ហ៊ុន សែន ប្រាប់លោក សម រង្ស៊ី កុំឲ្យសងសឹក ពេលសម្តេច ចេញពីតំណែង (មានវីដេអូ)

E-mail Print PDF

ម៉ាឡេស៊ី៖ ពិតជាសារមួយជាប្រវត្តិសាស្រ្តផង និងបង្កប់ នូវអត្ថន័យផង ដែលនាយករដ្ឋមន្រ្តីកម្ពុជា សម្តេចតេជោ ហ៊ុន សែន ប្រាប់ទៅលោក សម រង្ស៊ី នៅថ្ងៃសៅរ៍ ទី២៥ ខែមេសា នេះថា «កុំឲ្យមានគំនិតសងសឹក បន្ទាប់ពី សម្តេចចេញពីតំណែង»។ នេះបើយោងតាមលោក ពុយ គា អ្នកឆ្លងឆ្លើយព័ត៌មានក្យូដូរបស់ជប៉ុន បានស្តាប់ឮនៅ ក្នុងកម្មវិធីជួបសំណេះសំណាល រវាងសម្តេចតេជោ ហ៊ុន សែន និងលោក សម រង្ស៊ី ជាមួយពលករ និងនិស្សិតខ្មែរ កំពុងធ្វើការ និងសិក្សា នៅប្រទេសម៉ាឡេស៊ី។

បើយោងតាម Facebook របស់លោក ពុយ គា បានបង្ហាញ និងបញ្ជាក់ឲ្យដឹងថា ក្នុងឱកាសសំណេះសំណាល ដ៏កម្រមួយរវាងសម្តេចតេជោ និងលោក សម រង្ស៊ី នៅក្នុងទីក្រុងកូឡាឡាំពួរ ប្រទេសម៉ាឡេស៊ី សម្តេចតេជោ ហ៊ុន សែន បាននិយាយត្រង់ៗទៅកាន់ លោក សម រង្ស៊ី ថា «ឥឡូវខ្ញុំកំពុងធ្វើជានាយករដ្ឋមន្ត្រីនរណា ក៏អាចនៅជាមួយ បានដែរ ប៉ុន្តែស្រាប់តែដល់ពេលណាមួយ ឯកឧត្តម សម រង្ស៊ី ធ្វើជានាយករដ្ឋមន្រ្តីម្តង ឧទាហរណ៍ទេណា! ស្រាប់ ដល់ពេលហ្នឹង ឯកឧត្តមរុញអត់ឲ្យខ្ញុំរស់នៅ ស្រាប់តែទៅធ្វើបាបខ្ញុំ ហើយខ្ញុំមានកម្លាំងវ៉ៃបកវិញ ធ្វើឲ្យឯកឧត្តម រស់នៅមិនសុខដែរ!។ គណបក្សណា ទោះបីតូច ធំ តែងមានអ្នកគាំទ្រជានិច្ច បើសិនជាយើងធ្វើចំពោះគេមិនត្រឹម ត្រូវទេ ច្បាស់ណាស់ថា គេនឹងវ៉ៃបកហើយ។ យើងបានដកពិសោធន៍រាប់រយឆ្នាំហើយ ដែលខ្មែរបែកបាក់គ្នា តាំង ពីទឹកដីធំរហូតដល់ទឹកដីតូច ហើយយើងស្លាប់អស់ពលរដ្ឋប៉ុន្មាន? ល្មមគ្រប់គ្រាន់ហើយ ហើយទោះបីជាយើងមាន បក្សនយោបាយ មានអ្នកស្រលាញ់បក្សនេះ ឬបក្សនោះ តែយើងមិនត្រូវយកគ្នាជាសត្រូវទេ។ យើងអត់ជំរើសទេ ដីនេះជាដីរបស់យើងទាំងអស់គ្នា មិនមែនជាដីសំរាប់ ហ៊ុន សែន ឬដីរបស់ សម រង្ស៊ី ឬ សម្រាប់នរណាមួយទេ ដី សម្រាប់អ្នកទាំងអស់គ្នា ពលរដ្ឋខ្មែរទាំអស់គ្នា»។

សូមជំរាបថា នាយករដ្ឋមន្រ្តីកម្ពុជា សម្តេចតេជោ ហ៊ុន សែន និងលោក សម រង្ស៊ី ប្រធានគណបក្សសង្រ្គោះជាតិ នៅថ្ងៃសៅរ៍ ទី២៥ ខែមេសា នេះ បានជួបជាមួយប្រជាពលរដ្ឋខ្មែរ ពលករ និស្សិត ដែលកំពុងរស់នៅ សិក្សា និង ធ្វើការ ក្នុងប្រទេសម៉ាឡេស៊ី ប្រមាណ ២៩០នាក់ ខណៈមេដឹកនាំទាំងពីរ កំពុងស្ថិតនៅប្រទេសម៉ាឡេស៊ី ចូលរួម កិច្ចអាស៊ាននៅទីនោះ៕

សម្តេច ហ៊ុន សែន - លោក សម រង្ស៊ី លើក យកវប្បធម៌សន្ទនា ប្រាប់ពលរដ្ឋខ្មែរ នៅម៉ាឡេស៊ី

E-mail Print PDF

ភ្នំពេញ៖ នាយករដ្ឋមន្រ្តីកម្ពុជា សម្តេចតេជោ ហ៊ុន សែន និងលោក សម រង្ស៊ី ប្រធានគណបក្សសង្រ្គោះជាតិ  នៅថ្ងៃនេះ បានលើកយកវប្បធម៌សន្ទនា ទៅបង្ហាញដល់ប្រជាពលរដ្ឋខ្មែរ ដែលកំពុងរស់នៅ សិក្សា និងធ្វើការ  នៅក្នុងប្រទេសម៉ាឡេស៊ី ប្រមាណ ២៩០នាក់។ ទាំងសម្តេចតេជោ ហ៊ុន សែន និង លោក សម រង្ស៊ី បានលើក  បង្ហាញថា វប្បធម៌សន្ទនានេះ បាននាំមកការរីកចម្រើន និងបង្ហាញការរួបរួមដ៏អស្ចារ្យមួយនៅកម្ពុជា ដែលគ្មានប្រទេសណាធ្វើដូចឡើយ។

នៅលើទំព័រហ្វេសប៊ុក លោក កឹម គុណវឌ្ឍ អគ្គនាយកទូរទស្សន៍ជាតិ បានឲ្យដឹងថា នៅថ្ងៃទី២៥ ខែមេសា ឆ្នាំ  ២០១៥នេះ សម្តេចតេជោ ហ៊ុន សែន លោក សម រង្ស៊ី រួមនិងមន្រ្តីជាន់ខ្ពស់កម្ពុជាជាច្រើនទៀត បានជួបសំ  ណេះសំណាលជាមួយប្រជាពលរដ្ឋ កម្មករ កម្មការិនី និងនិស្សិតកម្ពុជាចំនួន ២៩០នាក់ ដែលកំពុងស្នាក់នៅ បំពេញការងារ និងសិក្សានៅប្រទេសម៉ាឡេស៊ី។

សម្តេចតេជោ ហ៊ុន សែន និង លោក សម រង្ស៊ី បានមានប្រសាសន៍សំណេះសំណាលរួមគ្នា ដោយបានបង្ហាញ ជូនដល់ប្រជាពលរដ្ឋ កម្មករ កម្មការិនី និងនិស្សិតទាំងអស់ថា ការជួបជុំគ្នាថ្ងៃនេះ កើតចេញពីការដាក់ចេញនូវ វប្បធម៌សន្ទនាគ្នា ដែលបង្កើតឡើងដោយសម្តេច និងលោក សម រង្ស៊ី។

សម្តេចតេជោមានប្រសាសន៍សង្កត់ធ្ងន់ថា លទ្ធផល នៃការបង្កើតឡើងនូវវប្បធម៌សន្ទនានេះ ជាជំហានថ្មីមួយ ទៀត ដែលជនជាតិកម្ពុជាខ្លួនឯងផ្ទាល់ជាអ្នកបង្កើតឡើង បន្ទាប់ពីការដាក់ចេញនូវនយោបាយឈ្នះឈ្នះ មក នោះ។ សម្តេចបានបញ្ជាក់ថា «នេះជាបទពិសោធន៍ថ្មីមួយទៀតរបស់កម្ពុជា ដើម្បីឲ្យអន្តរជាតិមើលឃើញ  ហើយ ក៏មិនមានប្រទេសណាមួយ អាចធ្វើបានដូចជាកម្ពុជាយើងនេះបាននោះទេ»។

លោក សម រង្សី បានមានប្រសាសន៍ថា មិនយូរមិនឆាប់កម្ពុជា នឹងទទួលបានភាពរីកចម្រើន តាមរយៈផ្លែផ្កា នៃ  វប្បធម៌សន្ទនាគ្នានេះ ដែលអ្នកនយោបាយលែងហែកហួរគ្នា និងនាំគ្នាងាកមកនិយាយគ្នាពីអ្វី ដែលជាការស្ថាប នាជាតិ និងការរីកចម្រើនរបស់ប្រជាជនកម្ពុជាទាំងអស់៕

CALD ចង់ឃើញវប្បធម៌ សន្ទនា នៅកម្ពុជា ដក់ជាប់ក្នុងស្មារតី មេដឹកនាំពិភពលោក

E-mail Print PDF

ភ្នំពេញ៖ ក្រុមប្រឹក្សាសេរី និងប្រជាធិបតេយ្យអាស៊ី ហៅកាត់ថា CALD បានបង្ហាញនូវការស្ងប់ស្ងែងរបស់ខ្លួន  ជាខ្លាំងចំពោះវប្បធម៌សន្ទនារវាងសម្តេចតេជោ ហ៊ុន សែន នាយករដ្ឋមន្រ្តីកម្ពុជា និង លោក សម រង្ស៊ី ប្រធាន គណបក្សសង្រ្គោះជាតិ នាំមកនូវការបញ្ចប់វិវាទនយោបាយ និងធ្វើឲ្យមានការផ្លាស់ប្តូរចំពោះអនាគតប្រទេស ជា តិ។ CALD ចង់ឲ្យវប្បធម៌មួយនេះ កើតមាន និងដក់ជាប់ក្នុងស្មារតីថ្នាក់ដឹកនាំគ្រប់រូបនៅលើពិភពលោក។

នៅក្នុងសេចក្តីថ្លែងការណ៍បង្ហាញការគាំទ្រវប្បធម៌សន្ទនារបស់សម្តេចតេជោ ហ៊ុន សែន និង លោក សម រង្ស៊ី  នាថ្ងៃទី២៥ ខែមេសា ឆ្នាំ២០១៥នេះ CALD បានលើកឡើងថា គ្រប់ទម្រង់ចរចារទាំងអស់ នឹងឆ្ពោះទៅរកការ ចូលរួមពិតប្រាកដ និងជាស្ពានដោះស្រាយបញ្ហាជម្លោះនយោបាយ។ ការចរចារ គឺជាទម្រង់សហប្រតិបតិ្តការ សំខាន់បំផុតរវាង គណបក្សនយោបាយ និង អ្នកពាក់ព័ន្ធ។

តាមរយៈសេចក្តីថ្លែងការណ៍នេះ CALD ទទួលស្គាល់ថា «ការសម្រេចចិត្តរបស់មេដឹកនាំ គឺជាកត្តាដ៏សំខាន់បំ  ផុត ធ្វើឲ្យផ្លាស់ប្តូរនូវអនាគតប្រទេសជាតិ។ វាជាការចាំបាច់ វប្បធម៌យោគយល់គ្នាទៅវិញទៅមក ធ្វើឲ្យមាន សន្តិភាព និង បន្តការប្រុងប្រយ័ត្នលើកំណែទម្រង់នយោបាយប្រជាធិបតេយ្យ ហើយវាពិតជាដក់ជាប់ក្នុងស្មារតី មេដឹកនាំទៅថ្ងៃអនាគត»។

ក្រុមប្រឹក្សា CALD ក៏បានលើកទឹកចិត្តដល់គណបក្សនយោបាយទាំងអស់នៅកម្ពុជា ឲ្យបន្តសហការជាមួយគ្នា  ក្នុងផ្លូវសន្តិភាព និងស្ថាបនាសហប្រតិបត្តិការ។ ការចរចារ គឺជាស្ពានមួយ ដែលអាចនាំមតិសាធារណជន តាមរ យៈអ្នកនយោបាយជាន់ខ្ពស់ ទៅកាន់រដ្ឋាភិបាលជួបពិភាក្សា និង វែកញែក។ CALD គាំទ្រដល់ការជំរុញឲ្យមាន វប្បធម៌សន្ទនា ដែលជួយនាំទៅកាន់ភាពជោគជ័យ ក្នុងការផ្សះផ្សាជាតិ និង ជួយពង្រឹង សិទ្ធិមនុស្ស, ច្បាប់, និង ប្រជាធិបតេយ្យនៅក្នុងប្រទេសកម្ពុជា ក៏ដូចជាទូទាំងសកលលោកផងដែរ។

ក្រុមប្រឹក្សា CALD ប្រកាសស្វាគមន៍ចំពោះវប្បធម៌សន្ទនា ដែលបានបង្ហាញដោយនាយករដ្ឋមន្រ្តី សម្តេចតេជោ ហ៊ុន សែន និង លោក សម រង្សី ក្នុងការធ្វើការជាមួយគ្នា។ នេះ គឺជាបំណងប្រាថ្នារបស់មេដឹកនាំនយោបាយ  គ្រប់រូបនៅក្នុងតំបន់អាស៊ី និង ពិភពលោកផងដែរ។

តាមរយៈសេចក្តីថ្លែងការណ៍នេះ លោក សម រង្សី ក៏បានបង្ហាញឆន្ទៈរបស់លោកផងដែរថា វប្បធម៌សន្ទនានេះ គឺ  លោកចង់បង្ហាញថា វប្បធម៌សន្ទនានឹងទទួលបានជោគជ័យគ្រប់កាលៈទេសៈទាំងអស់ ទោះបីរូបលោក និង ស ម្តេច ហ៊ុន សែន នៅឆ្ងាយគ្នាក្តី។

លោក សម រង្ស៊ី បានបញ្ជាក់យ៉ាងដូច្នេះ «នាយករដ្ឋមន្រ្តី ហ៊ុនសែន និង ខ្ញុំ ចង់បង្ហាញថា វប្បធម៌ចរចារត្រូវបាន ជោគជ័យគ្រប់កាលៈទេសៈទាំងអស់ បើទោះបីជាពួកយើងនៅឆ្ងាយពីគ្នាក៏ដោយ។ ដោយក្តីគោរពក្នុងនាមជានា  យករដ្ឋមន្រ្តី និង ជាមេដឹកនាំគណបក្សប្រឆាំង យើងនឹងបន្តគោរពគ្នាទៅវិញទៅមក ក៏ដូចជាផ្សព្វផ្សាយសហគមន៍របស់យើង ដោយធ្វើការរួមគ្នា ដើម្បីប្រយោជន៍រួម។ វាជាក្តីសង្ឃឹមរបស់យើង ដែលចង់ឃើញប្រទេសមិត្តភក្តិ ទាំងអស់ប្រើប្រាស់វប្បធម៌សន្ទនានេះ មកដោះស្រាយគ្រប់បញ្ហាទាំងអស់ ដែលនេះ ជាចំណុចបញ្ជាក់ពីលិទ្ធិ ប្រជាធិបតេយ្យចាស់ទុំមួយ»។

សូមបញ្ជាក់ថា វប្បធម៌សន្ទនានៅកម្ពុជារវាងសម្តេចតេជោ ហ៊ុន សែន និង លោក សម រង្ស៊ី បានចាប់បដិសន្ធិ ឡើងនាថ្ងៃទី២២ ខែកក្កដា ឆ្នាំ២០១៤ បន្ទាប់ភាពជាប់គាំងផ្នែកនយោបាយក្រោយការបោះឆ្នោតនាឆ្នាំ២០១៣  ត្រូវបានអូសបន្លាយអស់រយៈពេលជិតមួយឆ្នាំ។ តាមរយៈវប្បធម៌សន្ទនានេះ បញ្ហានយោបាយ និង សង្គមជា ច្រើនត្រូវបានដោះស្រាយ ហើយកំណែទម្រង់ជាច្រើន ក៏ត្រូវបានចាប់ផ្តើមផងដែរតាមរយៈវប្បធម៌សន្ទនានេះ៕

ពលករខ្មែរនៅថៃ ត្រូវថៅកែ បាញ់ ៦គ្រាប់ ស្លាប់រឿងទៅទារ លុយថ្លៃជំពាក់

E-mail Print PDF

បាងកក ៖ តាមសេចក្តីរាយការណ៍ ពីសមត្ថកិច្ច ខេត្តបន្ទាយមានជ័យ បានឲ្យដឹង ថា នៅល្ងាចថ្ងៃទី២៥ ខែមេសា ឆ្នាំ២០១៥ ថៅកែ ជនជាតិថៃ វ័យប្រហែល៤០ឆ្នាំ បានដកកាំភ្លើងខ្លី របស់ខ្លួនបាញ់ចំនួន៦គ្រាប់ ទៅលើកម្មករខ្មែរម្នាក់ ដែលទៅទារលុយ ថ្លៃជំពាក់ ជំនួសមិត្តរួមការងារ របស់ខ្លួន នៅក្នុង ខេត្តឆាឈឿនសៅ ប្រទេសថៃ កាលពីថ្ងៃទី២៤ ខែមេសា ហើយរត់គេចខ្លួនបាត់ ។

សេចក្តីរាយការណ៍ បានឲ្យដឹងថា សាកសពរបស់ពលករខ្មែរ ដែលរងការបាញ់ ប្រហារនោះ មានឈ្មោះ ផាត សុខអិន អាយុ ២៤ឆ្នាំ រស់នៅខេត្តកំពង់ធំ បានបញ្ជូនមកដល់ទឹកដីកម្ពុជា តាមច្រកអូរបីជាន់ ក្នុងខេត្ត បន្ទាយមានជ័យ នៅល្ងាចថ្ងៃសៅរ៍ ទី២៥ ខែមេសានេះ ហើយបានប្រគល់សព ជូនដល់ក្រុមគ្រួសារដើម្បីធ្វើបុណ្យ៕

ភ្លៀងលាយ ខ្យល់កន្ទ្រាក់ បំផ្លាញផ្ទះប្រជាពលរដ្ឋ អស់ចំនួន០២ខ្នង នៅឃុំល្បើក

E-mail Print PDF

កំពត ៖ ផ្ទះប្រជាពលរដ្ឋ យ៉ាងហោចណាស់ ចំនួន០២ខ្នង ត្រូវបានបំផ្លាញ ខណៈភ្លៀង ធ្លាក់មួយមេ និងលាយឡំខ្យល់ កន្ទ្រាក់បក់បោក នៅវេលាម៉ោង៣និង៣០នាទី រសៀល ថ្ងៃទី២៥ ខែមេសា ឆ្នាំ២០១៥ ក្នុងភូមិត្រពាំងថ្ម ឃុំល្បើក ស្រុកឈូក ខេត្តកំពត។

មន្ត្រីសាលាស្រុកឈូក បានប្រាប់មជ្ឈមណ្ឌល ព័ត៌មានដើមអម្ពិលឲ្យដឹងថា យ៉ាងហោច ណាស់ផ្ទះចំនួន០២ខ្នង របស់ប្រជាពលរដ្ឋ ត្រូវភ្លៀងលាយខ្យល់កន្ទ្រាក់ បោកបក់បំផ្លាញ ដោយហក់ចេញពីជើងតាង និងដួលរលំ។

មន្ត្រីដដែលឲ្យដឹងទៀតថា ក្នុងហេតុការណ៍ គ្រោះធម្មជាតិបំផ្លាញផ្ទះ របស់ប្រជាពលរដ្ឋខាងលើ សំណាងល្អដែរ ដែលពុំបណ្តាលឲ្យមនុស្ស ឬសត្វស្រុកគ្រប់ប្រភេទ ណាមួយ ទទួលរងគ្រោះឡើយ។ ក្រោយហេតុការណ៍ គ្រោះធម្មជាតិភ្លាម ត្រូវបានក្រុមការងារ របស់ស្រុក និងអាជ្ញាធរមូលដ្ឋាន បានចុះទៅពិនិត្យ និងវាយតម្លៃ នៃការខូចខាតអស់ទាំងនេះហើយ ដើម្បីរាយការណ៍ទៅថ្នាក់លើ ។

គួរបញ្ជាក់ថា កាលពីវេលាម៉ោង២និង១០នាទី រសៀលថ្ងៃទី២២ ខែមរសា ឆ្នាំ២០១៥ ក៏មានករណី ធ្លាក់ភ្លៀង០១មេ និងខ្យល់កន្ទ្រាក់ កើតឡើងក្នុងភូមិ-ឃុំខាងលើ ដូចគ្នានេះដែរ ដែល

បានបំផ្លាញផ្ទះរបស់ ប្រជាពលរដ្ឋ ទាំងធ្ងន់ និងស្រាល អស់ជាង១០ខ្នងផ្ទះ៕

Page 2 of 391