Dap News...Admin

ភ្នំពេញ ៖ លោក ឈួន ហួត អាយុ ៣៥ឆ្នាំ មុខរបរ ជាអ្នកចែកចាយស្រាបៀរ ហើយស្នាក់នៅក្រុម៣៣ សង្កាត់ផ្សារដើមថ្កូវ ខណ្ឌចំការមន បានរងរបួសធ្ងន់ បន្ទាប់ពីរថយន្ដកូរ៉ូឡា មួយគ្រឿង បុកពេញទំហឹង កាលពីវេលាម៉ោង ១២ យប់ថ្ងៃទី២២ ខែកុម្ភៈ ឆ្នាំ២០១២ ខណៈដែល លោកកំពុងបើកម៉ូតូ បត់ខាងឆ្វេងដៃ ស្ថិតនៅមុខ វិទ្យាល័យបឹងត្របែក កែងផ្លូវលេខ ៤៨៤ សង្កាត់ផ្សារដើមថ្កូវ ខណ្ឌចំការមន ។

ប្រភពព័ត៌មានបានបន្ដថា មុនពេលកើតហេតុ គេឃើញរថយន្ដកូរ៉ូឡាមួយគ្រឿង ពណ៌ស្លែ មិនចាំស្លាកលេខ បើកពីជើងទៅត្បូង បញ្ច្រាសទិស ជាមួយជនរងគ្រោះ ដែលជិះម៉ូតូម៉ាក វ៉ាន់ឌឺឡាវ ពណ៌ក្រហម ពេលបត់ឆ្វេង ក៏ត្រូវរថយន្ដបុកតែម្ដង។ ភ្លាមៗនោះ រថយន្ដបង្កហេតុ ប្រុង បើករត់គេចខ្លួន ប៉ុន្ដែបើកបាន ៥០ម៉ែត្រ ត្រូវប្រជាពលរដ្ឋ ស្ទាក់ចាប់បាន ប្រគល់ឱ្យសមត្ថកិច្ច ដោយឡែកជនរងគ្រោះ ត្រូវបានដឹកបញ្ជូនទៅ កាន់មន្ទីរពេទ្យ៕

ភ្នំពេញ ៖ ជាទម្លាប់ទូទៅ គេសង្កេតឃើញថា បណ្ដាអ្នកបើកបរ រថយន្ដតាក់ស៊ីម៉ែត្រ នៅរាជធានីភ្នំពេញ តែងតែហៅគ្នីគ្នា របស់ពួកគេ មកជួយអន្ដរាគមន៍ ពេលមានគ្រោះថ្នាក់ចរាចរណ៍ កើតឡើងម្ដងៗ ជាហេតុធ្វើឱ្យមានភាព អនាធិបតេយ្យយ៉ាង ខ្លាំង ដោយបង្ហាញថា សមត្ថកិច្ចមូលដ្ឋាន គ្មានសមត្ថភាព ក្នុងការដោះស្រាយ។ ដូច្នេះ អាជ្ញាធរនិងសមត្ថកិច្ចពាក់ព័ន្ធ គួរពិនិត្យមើល ចំពោះករណីទាំងនេះ ចៀសវាងកុំឱ្យ អ្នកបើកបររយន្ដតាក់ស៊ីម៉ែត្រ ដែលពេលខ្លះបង្កគ្រោះថ្នាក់ចរាចរណ៍ បង្កភាពអនាធិបតេយ្យ នៅក្នុងសង្គមបែបនេះ។

ជាក់ស្ដែង កាលពីវេលាម៉ោង ១និង៣០នាទី យប់រំលងអធ្រាត្រ ចូលថ្ងៃទី២៣ ខែកុម្ភៈ រថយន្ដតាក់ស៊ីម៉ែត្រ ពណ៌ស មួយ គ្រឿង ពាក់ស្លាកលេខ ភ្នំពេញ ២ឈ-១០៤៩ បានបើកបុកម៉ូតូស្មាស់ ១គ្រឿង ស៊េរី ២០១២ ពណ៌សលាយខ្មៅ ពាក់ស្លាក លេខ ភ្នំពេញ ១ពែ-៦២០៦ បណ្ដាលឱ្យជនរងគ្រោះ ២នាក់ ជាសិស្សវិទ្យាល័យ ហ៊ុន សែន ដើមថ្កូវ មួយឈ្មោះ សឿន ចាន់សុទ្ធ អាយុ ១៩ឆ្នាំ និងទី២ ឈ្មោះ សុខ រាជ ជិះពីក្រោយ អាយុ ១៨ឆ្នាំ ស្នាក់នៅសង្កាត់ទំនប់ទឹក ខណ្ឌចំការមន បានរងរបួសស្រាល ។

ប្រភពព័ត៌មានពីសាក្សី បានឱ្យដឹងថា មុនពេលកើតហេតុ រថយន្ដតាក់ស៊ីម៉ែត្រ បានបើកចេញពីផ្លូវ ២៧១ ហើយវៀងរង្វង់ មូលផ្សារដើមថ្កូវ រួចបត់ចូលផ្លូវលេខ ១៦៣ ស្រាប់តែមក ដល់កន្លែងកើតហេតុ បុកម៉ូតូជនរងគ្រោះទាំងពីរ បណ្ដាលឱ្យ ដាច់កន្ទុយក្រោយ ទៅមុខលែងរួច។ ភ្លាមៗនោះ អ្នកបើកបររថយន្ដតាក់ស៊ីម៉ែត្រ បានបន្ថែមល្បឿន រហូតដល់វិមានឯករាជ្យ ទើបជនរងគ្រោះទាំងពីរ ដែលជិះម៉ូតូឌុបដេញពី ក្រោយទាន់ ស្រាប់តែឱ្យម្ចាស់រថយន្ដតាក់ស៊ីម៉ែត្រឈប់ ។ ប៉ុន្ដែអ្នក បើកបររថយន្ដ មិនបានឈប់នោះទេ បន្ដបើករហូតដល់ជិតណាហ្គា ទើបជនរងគ្រោះកាក់ឱ្យឈប់។

សេចក្ដីរាយការណ៍ បានបន្ដថា ភ្លាមៗនោះ អ្នកបើកបររថយន្ដតាក់ស៊ីម៉ែត្រ បានហៅគ្នីគ្នា របស់គេចំនួន ២គ្រឿង ទៀត មកជួយអន្ដរាគមន៍ រហូតដល់មានការ វាយតប់គ្នាទៀតផង គឺដោយសារតែ ខឹងមិនព្រមដោះស្រាយ និងចោទថា ជនរងគ្រោះ ជាមុខសញ្ញា ដេញប្លន់ពីក្រោយ ទើបជនរងគ្រោះវាយកញ្ចក់ រថយន្ដឱ្យបែក ចំនួន ២ គ្រឿង ។

ក្រោយកើតហេតុនោះ រថយន្ដនិងអ្នកពាក់ព័ន្ធ ទាំងអស់ ត្រូវបានសមត្ថកិច្ច នាំយកទៅដោះស្រាយ នៅអធិការដ្ឋាននគរបាល ខណ្ឌចំការមន។

គេសង្ឃឹមថា សមត្ថកិច្ចនឹងដោះស្រាយ ប្រកប ដោយភាពយុត្ដិធម៌ ដោយហេតុថា ភាគច្រើនបំផុត អ្នកបើកបររថយន្ដតាក់ស៊ី ម៉ែត្រ តែងតែបង្កព្យុះភ្លៀង នៅរាជធានីភ្នំពេញ ពេលមាន គ្រោះថ្នាក់ចរាចរណ៍ម្ដងៗ ពោលពួកគេ បានហៅគ្នីគ្នមកទាំង រថយន្ដ ធ្វើឱ្យកកស្ទះតាមផ្លូវ និងបង្កភាពអនាធិបតេយ្យ យ៉ាងខ្លាំង៕

កំពង់ស្ពឺៈ យុវជនម្នាក់បានស្លាប់បន្ទាប់ពីបញ្ជូន ដល់មន្ទីរពេទ្យ និងម្នាក់ទៀត បាក់ដៃរបួសយ៉ាងធ្ងន់ធ្ងរ ក្រោយពេលជួបឧប្បត្តិហេតុគ្រោះថ្នាក់ ចរាចរណ៍រថយន្តហ៊ីយ៉ាន់ដាយប្រភេទធំ មួយគ្រឿង បុកម៉ូតូស្មាស់ លើកំណាត់ផ្លូវជាតិលេខ៤ កាលពីយប់ថ្ងៃពុធ ទី២២ ខែកុម្ភៈ ឆ្នាំ២០១២ ស្ថិតក្នុងភូមិព្រៃស្តុក ឃុំមហា សាំង ស្រុកភ្នំស្រួច ខេត្តកំពង់ស្ពឺ។

យោងតាមន្រ្តីនគរបាលស្រុកភ្នំស្រួចបានឲ្យដឹងថា នៅវេលាម៉ោងកើតហេតុខាងលើ មានរថយន្តហ៊ី យ៉ាន់ដាយ ពណ៌សមួយគ្រឿង ពាក់ស្លាកលេខភ្នំពេញ 3B-3154 បើកបរដោយបុរសមិនស្គាល់អត្ត សញ្ញាណ ក្នុងទិសដៅពីលិចទៅកើត លុះដល់ចំណុចកើតហេតុបានបុកជាមួយម៉ូតូស្មាស់ ដែលបើកបរ បញ្ច្រាសទិសគ្នា បណ្តាលបុរសជាអ្នកបើកបរម៉ូតូ ឈ្មោះ តេង ប៊ុនឌឿន អាយុ ២៩ស្លាប់ និងអ្នករួម ដំណើរជាមួយឈ្មោះ ភិន ចន្ថា រងរបួសបាក់ដៃ។ ជនរងគ្រោះទាំងពីរនាក់រស់នៅភូមិក្រឡាញ់ ឃុំមហា សាំង ស្រុកភ្នំស្រួច ខេត្តកំពង់ស្ពឺ។

ក្រោយពេលកើតហេតុបុរសជាអ្នកបើកបររថយន្ត បានព្យាយាមបើកគេចខ្លួន តែត្រូវកម្លាំងសមត្ថកិច្ច ដេញតាម រហូតឃាត់បានរថយន្តទៅរក្សាទុកនៅការិយាល័យនគរបាលចរាចរណ៍ នៃស្នងការដ្ឋាននគរ បាលខេត្ត តែបុរសជាអ្នកបើកបរមិនស្គាល់អត្តសញ្ញាណបានរត់គេចខ្លួនបាត់ហើយ៕

កំពង់ធំ ៖ ប្រជាពលរដ្ឋ ដែលរស់នៅក្រុង  ស្ទឹងសែន ខេត្ដកំពង់ធំ បានត្អូញត្អែរផ្នែកឯក ជន ដែលទទួលម៉ៅការផ្គត់ផ្គង់អគ្គិសនីផ្ដាច់ មុខប្រចាំនៅខេត្ដកំពង់ធំ ដោយសាររយៈ ពេលពីរបីថ្ងៃមកនេះ ចរន្ដអគ្គិសនីដែលផ្គត់ ផ្គង់នៅទីរួមខេត្ដកំពង់ធំ បានដាច់ជាញឹក ញាប់ជាពិសេសអំឡុងម៉ោង៧-៨យប់ ។

ប្រជាពលរដ្ឋនៅទីរួមខេត្ដកំពង់ធំ បាន អំពាវនាវអាជ្ញាធរឱ្យជួយមានដំណោះស្រាយ ចំពោះបញ្ហានេះផង បើពុំដូច្នោះទេ នោះ សម្ភារៈប្រើប្រាស់ ដូចជា កុំព្យូទ័រ ទូរទស្សន៍ នឹងត្រូវខូចខាត ដោយសារតែចរន្ដភ្លើងបុក មួយពេលៗ ។

យោងតាមមន្ដ្រីអគ្គិសនី ខេត្ដកំពង់ធំ បានឱ្យដឹងថា ចំពោះបញ្ហានេះ មិនបណ្ដាល មកពីផ្នែកឯកជន ដែលផ្ដល់ចរន្ដអគ្គិសនី ផ្ដាច់មុខប្រចាំខេត្ដកំពង់ធំនោះឡើយ ពោល គឺបណ្ដាលមកក្រុមហ៊ុនធំតែម្ដង ។

សូមបញ្ជាក់ថា ផ្នែកឯកជន ឈ្មោះខេម ជីលបូ អេឡិចទ្រេចផៅវើ បានដេញថ្លៃផ្ដាច់ មុខផ្គត់ផ្គង់ បណ្ដាញអគ្គិសនីនៅខេត្ដកំពង់ធំ ពីក្រុមហ៊ុនរបស់វៀតណាម ឈ្មោះប៊ីវីស៊ី ហើយយកតម្លៃ ១៩៥០រៀល ក្នុង១គីឡូ ។

ភ្នំពេញ ៖ ឯកអគ្គរដ្ឋទូតបារាំង ប្រចាំកម្ពុជា និងមន្ដ្រីជាន់ខ្ពស់ ក្រសួងសេដ្ឋកិច្ច បានចុះហត្ថលេខា លើកិច្ចព្រមព្រៀង ហិរញ្ញប្បទាន ដែលមាន ទឹកប្រាក់ចំនួន ៣,៥លានអឺរ៉ូ (ប្រមាណ ៤,៥៥លានដុល្លារ សហរដ្ឋអាមេរិក) សម្រាប់គម្រោង ជួយគាំទ្រដល់ការ ធ្វើពាណិជ្ជកម្មអង្ករកម្ពុជា។

កំពង់ស្ពឺ ៖ នារីជាកម្មការិនី នៅរោងចក្រសាន់វ៉េ ត្រូវបានបងប្រុសបង្កើត អគតិរបស់ខ្លួន អារកប៉ងសម្លាប់ចោល កាលពីវេលាម៉ោង ១២ និង៣០នាទី យប់រំលងអធ្រាត្រ ចូលថ្ងៃទី២៣ ខែកុម្ភៈ ដោយសារតែបងប្រុសរូបនេះ ខឹងជនរងគ្រោះ ដែលជាប្អូនស្រី យករឿងទៅប្រាប់ ម្ដាយនិងប្រពន្ធ ការដែលជនសង្ស័យរូបនេះ ដាក់ថ្នាំសណ្ដំទៅលើរូបនាង ដើម្បីយកទ្រព្យសម្បត្ដិដូចជា លុយ និងគ្រឿងអលង្ការជាដើម យកកាំបិតអារកប្អូនស្រី ប៉ងសម្លាប់ចោល ។  

មន្ដ្រីនគរបាល ព្រហ្មទណ្ឌកម្រិតធ្ងន់ ខេត្ដកំពង់ស្ពឺ បានឱ្យដឹងថា ហេតុការណ៍នេះ បានកើតឡើង នៅភូមិត្រញំងពោធិ៍ ឃុំត្រញំងល្វា ស្រុក  ឧដុង្គ ហើយជនរងគ្រោះមានឈ្មោះ តុង វិត ហៅ ស្រីលក្ខណ៍ អាយុ ២៥ឆ្នាំ រីឯបងប្រុសអគតិ ដែលកំពុងរត់គេចខ្លួន មានឈ្មោះ តុង ហួត ហៅ ឡុង អាយុ ៤៣ឆ្នាំ ដែលអ្នកទាំងពីរ រស់នៅភូមិឃុំកើតហេតុខាងលើ។

សាក្សីដែលបានដឹងរឿងនេះ បានឱ្យដឹងថា មុនពេលកើតហេតុ ជនសង្ស័យជាបងប្រុស បានឌុបប្អូនស្រីរបស់ខ្លួន ទៅធ្វើការរោងចក្រ កាលពីពីរថ្ងៃមុន រួចដាក់ថ្នាំសណ្ដំ យកលុយ ១០០ដុល្លារ និងគ្រឿង អលង្ការចំនួន ៥ជី ។ ប៉ុន្ដែ នៅពេលប្អូនស្រីដឹងខ្លួន បានយករឿងនេះប្រាប់ម្ដាយ និងប្រពន្ធរបស់បងប្រុស រួចហើយស្រាប់តែជនសង្ស័យខឹង ក៏នៅវេលាម៉ោងកើតហេតុខាងលើ ខណៈជនរងគ្រោះកំពុងដេក ស្រាប់តែយកកាំបិត មកអារកប៉ងសម្លាប់ចោល ប៉ុន្ដែមិនស្លាប់ ជនរងគ្រោះ ក៏ត្រូវបានក្រុមគ្រួសារ បញ្ជូនមកសង្គ្រោះបន្ទាន់ នៅរាជធានីភ្នំពេញ ។ បច្ចុប្បន្នសមត្ថកិច្ច កំពុងតាមចាប់ជនសង្ស័យ ដែលជាបងប្រុសចិត្ដអប្រិយរូបនេះ ៕

កំពង់ធំ ៖ គ្រោះថ្នាក់ចរាចររវាងម៉ូតូបុក ម៉ូតូកាលពីវេលាម៉ោង៦និង៤២នាទីល្ងាចថ្ងៃ ទី២២ ខែកុម្ភៈ ឆ្នាំ២០១២ បានបណ្ដាលឱ្យ ស្លាប់ម្នាក់ និងរបួសធ្ងន់ម្នាក់ ស្ថិតនៅលើផ្លូវ លំក្រាលគ្រួសក្រហម ភូមិបន្ទាយយមរាជ ឃុំប្រាសាទ ស្រុកសន្ទុក ខេត្ដកំពង់ធំ ។

មន្ដ្រីនគរបាលចរាចរណ៍បានឱ្យដឹងថា ជនរងគ្រោះដែលស្លាប់ មានឈ្មោះអ៊ឹម កែវ ភេទប្រុស អាយុ៥០ឆ្នាំ រស់នៅភូមិព្រែក ក្រោល ឃុំត្នោតជុំ ស្រុកបារាយណ៍ ។ រីឯ ជមរងគ្រោះដែលរងរបួសធ្ងន់ មានឈ្មោះ យិន ប៊ុនឡេង ភេទប្រុស អាយុ២៤ឆ្នាំ រស់ នៅភូមិត្នោតជុំ ឃុំត្នោតជុំ ស្រុកបារាយណ៍ ។

មន្ដ្រីនគរបាលបានបន្ដថា គ្រោះថ្នាក់ចរាចរណ៍នេះបានកើតឡើង បណ្ដាលមកពីជនរងគ្រោះដែលស្លាប់ជិះម៉ូតូ C100កូរ៉េ បានបុកជាមួយភាគីម្ខាងទៀត ស្ថិតនៅកណ្ដាលទ្រូងផ្លូវ បណ្ដាលឱ្យស្លាប់និងរបួសតែម្ដង៕

ខេត្តព្រះសីហនុ ៖ ជនដៃដល់ចំនួន ២ រូប រួមនឹងអ្នកសមគំនិតចំនួន ២ រូប ត្រូវបានកម្លាំងនគរបាលខេត្តព្រះសីហនុ ធ្វើការចាប់ខ្លួន ក្រោយពីពួកគេ បានធ្វើសកម្មភាព ឆក់យកកាបូប ពីជនជាតិបារាំងពីរនាក់ប្តីប្រពន្ធ ខណៈពេលពួកគេ ទាំងពីរនាក់ កំពុងតែអង្គុយលំហែកាយ នៅមាត់សមុទ្រ នៅវេលាម៉ោង ១០ ព្រឹក ថ្ងៃទី ២២ ខែ កុម្ភៈ ឆ្នាំ ២០១២ នៅចំណុចឆ្នេរអូរតែល ប្រាំពីរជាន់ ក្នុងភូមិ ១ សង្កាត់លេខ ៣ ក្រុងព្រះសីហនុ ខេត្តព្រះសីហនុ ។

លោកវរសេនីយ៍ឯក កុល ផាលី ស្នងការរងនគរបាលខេត្ត ទទួលបន្ទុកព្រហ្មទណ្ឌ បានឲ្យដឹងថា ក្រោយពីជនដៃដល់ ចំនួនពីររូប បានធ្វើសកម្មភាព ឆក់យកកាបូបដៃ ពីជនបរទេសខាងលើនោះ កម្លាំងនគរបាលខេត្តព្រះសីហនុ ក្រោមបញ្ជាយ៉ាងម៉ឺងម៉ាត់ ពីសំណាក់លោក ឧត្តមសេនីយ៍ត្រីយ៍ តាក់ វណ្ណថា ស្នងការនគរបាល និង ដោយមានការយកចិត្តទុកដាក់ ពី សំណាក់កម្លាំងនគរបាល ក្រោមឱវាទនោះ ក៏បានធ្វើការឃាត់ខ្លួនជនដៃដល់ ក្នុងអំពើឆក់ចំនួនពីរនាក់ រួមនឹងអ្នកពាក់ព័ន្ធ ចំនួនពីរនាក់ ផ្សេងទៀតផងដែរ ។

ជនដៃដល់ ដែលត្រូវបានចាប់ខ្លួន ទី១ មានឈ្មោះ គង់ វណ្ណា ភេទ ប្រុស អាយុ ២៤ ឆ្នាំ ជាអ្នកឆក់កាបូប ពីជនបរទេស, ទី២ ឈ្មោះ ចិន ភារុន ហៅ គ្រុនអាយុ ២៣ ឆ្នាំ ជាអ្នកបើកម៉ូតូ អ្នកទាំងពីរ រស់នៅក្បែរកន្លែងធ្វើសកម្មភាព ។ ចំណែកអ្នករួម គំនិតចំនួន ២ នាក់ , ១ ឈ្មោះ គង់ ចាន់ហេង ភេទ ប្រុស អាយុ ២០ ឆ្នាំ ជាប្អូនប្រុសរបស់ឈ្មោះ គង់ វណ្ណា, ទី ២ ឈ្មោះ រៀម សុផាត ភេទ ប្រុស អាយុ ២៦ ឆ្នាំ មានមុខរបរ លក់ចាប់ហួយ ជាមួយប្រពន្ធ នៅក្រោយពេទ្យចំការចេក ក្នុងភូមិ ៤ សង្កាត់ លេខ ៤  ។

លោកវរសេនីយ៍ឯក កុល ផាវី បានបន្តថា ក្រោយពីជនដៃដល់ទាំងពីរ ខាងលើ បានធ្វើសកម្មភាព ឆក់យកកាបូបដៃ ពីជន បរទេសនោះ រូបគេទាំងពីរនាក់ បានជិះម៉ូតូទៅកាន់ ក្រោយពេទ្យចំការចេក ផ្ទះរបស់ រៀម សុផាត ដើម្បីផឹកស្រា និង ឲ្យឈ្មោះ រៀម សុផាត រួមនឹងឈ្មោះ គង់ ចាន់ហេង យករបស់របរ ដែលគេឆក់បានដូចជា ម៉ាស៊ីនថត ចំនួន២គ្រឿង ទូរស័ព្ទដៃ ចំនួន ២គ្រឿង ទៅលក់ ខណៈដែលពួកគេ កំពុងរៀបចំទៅលក់នោះ ក៏ត្រូវបានកម្លាំងនគរបាល ចាប់ខ្លួនបាន និង បញ្ជូនមក កាន់ស្នងការ នគរបាលខេត្ត ទាំងអស់គ្នាតែម្តង ។

នៅចំពោះមុខសមត្ថកិច្ច ជនសង្ស័យបានសារភាពថា ខ្លួនគេពិតជាបានប្រព្រឹត្ត នូវអំពើខាងលើ ពិតប្រាកដមែន។ បច្ចុប្បន្ន ជនសង្ស័យទាំងបួនរូប ត្រូវបានកម្លាំងនគរបាល ខេត្តព្រះសីហនុ រៀបចំកសាងសំណុំរឿង បញ្ជូនទៅកាន់តុលាការ ដើម្បី ចេញដីកាឃុំខ្លួន ដាក់ពន្ធនាគារ រង់ចាំការផន្ទាទោស តាមច្បាប់ ៕

កំពង់ចាម ៖ កម្មករ កម្មការិនី រោងចក្រវាយនភ័ណ្ឌ នៅខេត្ដកំពង់ចាម នាព្រឹកថ្ងៃទី២៣ ខែកុម្ភៈ ឆ្នាំ២០១២នេះ បាននិងកំពុង តានតឹងយ៉ាង ខ្លាំង បន្ទាប់ពីកម្មករ កម្មការិនី ជាង១ពាន់នាក់ ដែលប្រមូលផ្ដុំគ្នាតវ៉ា បានសម្រុកចូលក្នុងរោងចក្រ ហើយយក ដុំថ្ម គប់កញ្ចក់រោងចក្រ។

ជាមួយគ្នានេះ កម្លាំងសមត្ថកិច្ចជាច្រើននាក់ របស់ខេត្ដកំពង់ចាម បានដាក់ពង្រាយការពារ និងទប់ស្កាត់ការសម្រុកចូល ក៏ដូចជាការគប់កញ្ចក់ រោងចក្រ ពីសំណាក់កម្មករ ។

កាលពីព្រឹកមិញ ក្រុមកម្មករ បាននាំគ្នាបិទផ្លូវកណ្ដាលក្រុង មួយរយៈខ្លី ប៉ុន្ដែត្រូវបានសមត្ថកិច្ចបំបែកចេញ ហើយនៅពេល នេះ ពួកគេបាននាំគ្នាប្រមូលផ្ដុំ នៅខាងមុខរោងចក្រ និងសម្រុកចូលក្នុងរោងចក្រ។  តែទោះជាយ៉ាងណា ប្រធានសហជីព របស់ ពួកគេ ក៏បានចូលរួមអំពាវនាវ កុំឱ្យក្រុមកម្មករ ធ្វើសកម្មភាពបែបនេះ ។

ក្រុមកម្មករ នៅព្រឹកថ្ងៃទី២៣ ខែកុម្ភៈនេះ បានបង្កសកម្មភាព យ៉ាងដូច្នេះ ដោយសារតែពួកគេ មិនទទួលបានដំណោះស្រាយ ពីភាគីរោងចក្រ តាមការសម្របសម្រួល របស់អាជ្ញាធរខេត្ដ ទាំង១២ចំណុច របស់ពួកគេ ។

យោងតាម សេចក្តីរាយការណ៍ ចុងក្រោយ បានឲ្យដឹងថា នៅវេលាម៉ោង ១១និង១០នាទី ព្រឹកថ្ងៃដដែលេនេះក្រុមកម្មករ បានដកថយវិញហើយ៕

ខេត្តកោះកុងៈ ជនសង្ស័យជាចោរស្រីម្នាក់ បានឆក់ខ្សែ ក ឆ្លងខេត្ត ត្រូវនគរបាល ខេត្តកោះកុង ចាប់បាន នៅពេល កំពុងធ្វើសកម្មភាព កាត់ផ្តាច់ខ្សែ ក ពីប្រជា ពលរដ្ឋ នៅក្នុងហ្វូងមហាជន ដែលកំពុងដើរ មើលរកទិញឥវ៉ាន់ នៅ កន្លែងតាំងពិព័រណ៍ជាលក្ខណៈ ទ្រុងទ្រាយ តូចមួយ ដែលនៅ កន្លែងទីលានបាល់ទាត់ កាលពីយប់ថ្ងៃទី២២ ខែកុម្ភៈ ឆ្នាំ២០១២ នៅវេលាម៉ោង៩និង៣០នាទី ស្ថិតនៅក្នុងសង្កាត់ស្មាច់មានជ័យ ក្រុងខេមរៈភូមិន្ទ ខេត្តកោះកុង ។

នគរបាលបានឲ្យដឹងថាជនសង្ស័យខាងលើ មានឈ្មោះ វង់ វិមល់ ភេទស្រី អាយុ២២ឆ្នាំ ស្នាក់នៅភ្នំពេញ ។

លោក ដាត់ គយណួ អធិការក្រុងខេមរៈភូមិន្ទ បានឲ្យដឹងថា ក្រោយពីបានទទួលព័ត៌មាន ពីប្រជាពលរដ្ឋ មានបាត់ខ្សែ កភ្លាម កម្លាំងរបស់លោក ដែល នៅការពារ ទីនោះ បានរៀបចំកម្លាំង តាមដានមើលមុខសញ្ញា ហើយចាប់បានភ្លាមតែម្តង ដោយនៅក្នុងដៃជនសង្ស័យ មានខ្សែ កប្លាទីនចំនួន ២ខ្សែ ជាភស្តុតាង ។

លោកអធិកាបានបន្តថា នៅពេលសាកសួរចំលើយ ជនសង្ស័យបានសារភាពថាខ្លួន ពិតជាបានលួចកាត់ខ្សែ ក ពីប្រជាពលរដ្ឋពិតប្រាកដមែន ហើយក្រុមរបស់ពួក គេមានគ្នាចំនួន៥នាក់ ស្រី៣នាក់ ប្រុស២នាក់ ហើយ នេះលើកទី២ហើយ ដែលពួកគេមកលួចផ្តាច់ខ្សែ កតែត្រូវជាប់អន្ទាក់របស់នគរបាល ។ បច្ចុប្បន្នជនសង្ស័យ កំពុងធ្វើសំណុំរឿង បញ្ជូនទៅស្នងការដ្ឋាននគរបាលខេត្ត ដើម្បីចាត់ការបន្ត ៕